ހިތަށްއަރާ ބައެއް މީހުންނާއި ޙަޔާތުގައި ދިމާނުވިނަމައޭ!
މީ ހަމަ ޔަޤީނުންވެސް ވަރަށް ގިނަ ބައެއްގެ ހިތަށް ކޮންމެ ދުވަހަކު އަރާ ފައިބަމުން ދާނެ ޝުޢޫރަކަށް ވާނެ ކަން ހަމަ ޔަޤީނެވެ. އަދި ހަމަ މި އާއި އެކު ބައެއް މީހުންނާއި ޙަޔާތުގައި ތަންކޮޅެއް ކުރިން ދިމާވި ނަމައޭ މިހާރުހިތަށް އަރާ އެތައް ބަޔަކު ވެސް ތިބޭނެކަން ހަމަ ޔަޤީނެއެވެ.
ޙަޔާތެއް ފުރިހަމަ ވަނީ އެ ޙަޔާތެއްގައި އުފަލާއި ، ހިތާމައާއި ، ހިނިތުންވުމާއި ، ކަރުނަ ވެސް އެކުލެވިގެންނެވެ. މިއިން ކޮންމެ އިހްސާސް ހުޅުވާލަ ދެނީ ޙަޔާތުގެ ސަފްޙާތަކެކެވެ. ކޮންމެ މީހެއްގެ ޙަޔާތުގައި ވެސް މި އިހްސާސްތައް ކޮންމެ ވެސް މީހަކާއި ޙިއްޞާ ކޮށްފައި ވާނެއެވެ. ނުވަތަ ޙިއްސާ ކުރަން ބޭނުންވެފައި ވާނެއެވެ.
ގިނަފަހަރު ޙަޔާތުގެ މިސްރާބު އޮޅި ދާން ބޭނުން ނުވާ މަންޒިލަކަށް ހުންގާނު ދީއްލައިލަނީ ޙަޔާތުގެ ކޮންމެވެސް ހިސާބަކުން ބައްދަލުވާ މީހެއްގެ ސަބަބުންނެވެ. އެކަން އިހްސާސް ކުރެވެނީ ޙަޔާތުގެ ބޭނުންތެރި މުހިއްމު އެތަކެއް ވަގުތެއް ބޭކާރު ވެގެންދާ ފަހުންނެވެ.
އަދި އެފަދަ މީހެއްގެ ސަބަބުން ޙަޔާތުގެ އުންމީދުތައް ވިއްސި ވިހާލި ވެގެންދެއެވެ. ކުޑަ އިރު ދުއް ހުވަފެންތައް ބިލާހަކަށް ވެގެން ވެސް ދެއެވެ. އެ ހަނދާންތައް މުސްތަޤްބަލަށް އުނދަގޫ ކުރަމުންދެއެވެ. އެހެން ވުމުގެ ސަބަބުން ބައެއް މީހުންނަށް އެމީހުންގެ ޙަޔާތުގައި ދިމާވި މީހުންގެ ހަނދާންތައް މާޒީގެ ޤަބްރުސްތާނުގައި ވަޅުނުލެވި މުޅި ޙަޔާތް ނިންމާލަން ޖެހި އަމިއްލަ ހަށިގަނޑު ކަފުން ކުރަންޖެހޭ ފަހަރު ވެސް އާދެއެވެ.
އަދި އަނެއް ބަޔަކަށް ޙަޔާތުގައި ދިމާވާ މީހެއްގެ ސަބަބުން ޙަޔާތުގެ ކަފިވެ ނިވެމުންދާ ބައްތީގެ ހުޅުކޮޅު އަލުން ދިއްލި މުޅި ޙަޔާތް އަލިވެ އުޖާލާ ވެގެން ވެސް ދެއެވެ. ނަމަވެސް މިހެން ދިމާވަނީ މިހާރު މަދު މީހަކަށެވެ. ސަބަބަކީ ދުނިޔޭގެ ކެހިވެރި ކަމާއި އިންސާނުންގެ އަމިއްލަ އެދުން ބޮޑު ކަމެވެ. މި ފަދައިން ދިމާވެފައިވާ މީހުން މިއަދު ކުރާނެ ޝަކުވާއަކީ ޙަޔާތުގައި ކުރިން ދިމާނުވީ ކީއްވެބާއޭ ނުވަތަ ކުރިން ދިމާވިނަމަ ހާދަ ރަނގަޅުވީސްތާ އެވެ.
ދުނިޔޭގައި އެއްބަޔަކު އުފާކުރަމުން ދާއިރު އަނެއްބަޔަކު ހިތާމަވެސް ކުރާނެއެވެ. އެއީ ދުނިޔޭގެ ޤާނޫނެވެ. ކަން ހިނގަމުންދާ އަދި ހިނގަމުންދާނެ ވެސް އުސޫލެވެ. ޙަޔާތުގައި ބައެއް މީހުންނާއި ދިމާވުމަކީ ނަސީބަކަށްވާއިރު ބައެއް މީހުންނާއި އެއް ގޮތަކަށް ވެސް ދިމާނުވިނަމަ އެއީ ހާދަ ބޮޑު ނަސީބަކަށްވީހޭ މިއަދު ހިތަށް އަރައެވެ.
Ads by STO
