އދ. ގެ އަންހެނުންގެ ހައްގުތަކާ ބެހޭ ކޮމިޝަނަށް ރާއްޖެ އިންތިހާބުވެއްޖެ

އދ. ގެ އަންހެނުންގެ ހައްގުތަކާ ބެހޭ ކޮމިޝަން، ކޮމިޝަން އޮން ދަ ސްޓޭޓަސް އޮފް ވިމެން (ސީއެސްޑަބްލިއު) ގެ 2026-2030 ދައުރަށް ރާއްޖެ އިންތިހާބުވެއްޖެ އެވެ.

Ads by MPL

ސީއެސްޑަބްލިއުއަކީ 1946 ވަނަ އަހަރުގެ ޖޫން މަހު އދ. ގެ އިކޮނޮމިކް އެންޑް ސޯޝަލް ކައުންސިލް (އިކޮސޮކް) ފާސްކުރި ގަރާރު ނަމްބަރު 11(II) ގެ ދަށުން އުފެދިފައިވާ ކޮމިޝަނެކެވެ.

ކޮމިޝަން އުފެދިފައިވަނީ ސިޔާސީ، އިގުތިސޯދީ، އިޖުތިމާއީ އަދި ތައުލީމީ ދާއިރާތަކުގައި އަންހެނުންގެ ހައްގުތައް ކުރިއެރުވުމާއި އަވަސް ހައްލެއް ބޭނުންވާ އަންހެނުންގެ ހައްގުތަކާ ބެހޭ މައްސަލަތަކާ ގުޅޭގޮތުން އިކޮސޮކްއަށް ލަފާ ދިނުމަށް މަސައްކަތްކުރާ ކޮމިޝަނެއްގެ ގޮތުގަ އެވެ.

ކޮމިޝަން އެކުލެވިގެންވަނީ އިކުއިޓަބަލް ޖިއޮގްރަފިކް ޑިސްޓްރިބިއުޝަން ތަމްސީލުކުރުމުގެ އުސޫލުގެ މައްޗަށް ބިނާކޮށް އިންތިހާބުކުރެވޭ 45 އދ. މެމްބަރު ގައުމުގެ މައްޗަށެވެ. އެއީ އެފްރިކާ ގައުމުތަކުން 13 މެމްބަރުން, އޭޝިއާ-ޕެސިފިކް ގައުމުތަކުން 11 މެމްބަރުން, އިރުމަތީ ޔޫރަޕުގެ ގައުމުތަކުން 4 މެމްބަރުން, ލެޓިން އެމެރިކާ އަދި ކެރިބިއަން ގައުމުތަކުން 9 މެމްބަރުން އަދި ހުޅަނގު ޔޫރަޕު އަދި އެހެނިހެން ގައުމުތަކުން 8 މެމްބަރުންނެވެ.

މެމްބަރުކަމުގެ މުއްދަތަކީ 4 އަހަރު ދުވަހެވެ. ކޮމިޝަން ބައްދަލުވަނީ އަހަރަކު އެއްފަހަރު ނިއުޔޯކުގައި ދެ ހަފުތާގެ މުއްދަތަކަށެވެ.

ކޮމިޝަނުގެ 2026-2030 ދައުރުގެ މެމްބަރުކަމަށް ކުރިމަތިލާ ގައުމުތަކުގެ އިންތިހާބު މިއަދު ނިއުޔޯކުގައި ވަނީ ބާއްވާފަ އެވެ.

ސީއެސްޑަބްލިއުއަށް ރާއްޖެ އިންތިހާބުވިކަން ހާމަކޮށް ފޮރިން މިނިސްޓްރީން މިރޭ "އެކްސް" ގައި ކުރި ޕޯސްޓެއްގައި ބުނީ މިއީ މި ސަރުކާރުން ބައިނަލްއަގުވާމީ މައިދާނުގައި އިންތިހާބެއްގައި ބައިވެރިވެ ރާއްޖެ ހޮވުނު ފުރަތަމަ ފަހަރު ކަމަށެވެ.

ރާއްޖެއިން ސީއެސްޑަބްލިއުއަށް ކުރިމަތިލާ, ހަރަކާތްތެރިވުމުން އަންހެނުންގެ ހައްގުތައް ހިމާޔަތް ކުރުމަށް ސަރުކާރުން ދޭ އަހައްމިޔަތު ފާހަގަވާ ކަމަށް ވެސް މިނިސްޓްރީން ބުންޏެވެ.

އެކަމާ ގުޅިގެން "އެކްސް" ގައި ކުރެއްވި ޕޯސްޓެއްގައި ރައީސް ޑރ. މުހައްމަދު މުއިއްޒު ވިދާޅުވީ ސީއެސްޑަބްލިއުއަށް އިންތިހާބުވުމަކީ ރާއްޖެއަށް ލިބުނު ބޮޑު ފަހުރެއް ކަމަށެވެ.

"ފާއިތުވި އަހަރުތަކުގައި ރާއްޖެއިން ވަނީ ގައުމީ އަދި ބައިނަލްއަގުވާމީ ފެންވަރުގައި އަންހެނުންގެ ހައްގުތައް ކުރިއެރުވުމުގައި ބޮޑެތި ކުރިއެރުންތަކެއް ހާސިލުކޮށްފައި. އެންމެން ބައިވެރިކޮށް ޝާމިލުވާ މުސްތަގުބަލަކާ ދިމާލަށް ދިއުމަށް ސީއެސްޑަބްލިއުގެ ހުރިހާ މެމްބަރުންނާއެކު މަސައްކަތްކޮށް ކޮމިޝަން އިތުރަށް ހަރުދަނާކުރަން ރާއްޖެއިން އޮތީ ތައްޔާރަށް،" ރައީސް ވިދާޅުވި އެވެ.

ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވީ އެ ކޮމިޝަަނަށް އިންތިހާބުވުމަކީ ރާއްޖެއިން މިންތީގެ ހަމަހަމަކަން ގާއިމްކުރަން ސަރުކާރުން ކުރަމުން ގެންދާ މަަސައްކަތުގެ ރަމްޒެއް ކަމަށެވެ.

"ރާއްޖެއިން އަބަދުވެސް ދަނީ އަންހެނުން ބާރުވެރިކުރުވުމަށް ގޮވާލަމުން އަދި ލީޑާޝިޕްގެ މަގާމުތަކާއި އެހެނިހެން ގިނަ ދާއިރާތަކުގައި އަންހެނުންގެ ދައުރު ފުޅާކުރަން ގާނޫނަށް ވެސް ބަދަލުތައް ގެނެސް ޕޮލިސީތައް އެކުލަވާލާފައި،" މިނިސްޓަރު ވިދާޅުވި އެވެ.