ދެމެހެއްޓެނިވި އަމާޒުތައް ހާސިލުކުރަން ރާއްޖެއަށް ލިވަޕޫލުން އެހީވާނަން: އިޔަން
ދެމެހެއްޓެނިވި އަމާޒުތަކަށް ރާއްޖެއިން ދިއުމަށް އިނގިރޭސިވިލާތުގެ މަޝްހޫރު ފުޓްބޯޅަ ކްލަބް، ލިވަޕޫލުން އެހީވާނެ ކަމަށް އެ ކްލަބުގައި މިހާތަނަށް އުފެދުނު އެންމެ މޮޅު އެއް ކުޅުންތެރިޔާ އިޔަން ޖޭމްސް ރަޝް ވިދާޅުވެއްޖެ އެވެ.
ލިވަޕޫލްއާ ގުޅިގެން ރާއްޖޭގެ ފަތުރުވެރިކަން އިޝްތިހާރު ކުރުމުގެ ކެމްޕޭން ފެށުމަށް ރައީސް ޑރ. މުހައްމަދު މުއިއްޒު މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ރައީސް ވަނީ އިޔަންއާ ބައްދަލުކުރައްވާފަ އެވެ.
ކެމްޕޭން ފެށުމަށް އެންފީލްޑް ސްޓޭޑިއަމްއަށް ކުރެއްވި ޒިޔާރަތުގެ ތެރެއިން ރައީސް އާއެކު ނަންގަވާފައިވާ ފޮޓޯތަކެއް އިޔަން ވަނީ އިންސްޓަގްރާމްގައި ހިއްސާކުރައްވާފަ އެވެ. އޭނާ ވިދާޅުވީ ރާއްޖެއިން ލިވަޕޫލްއާއެކު ހެދި ޕާޓްނާޝިޕްއަކީ ވަރަށް މުހިންމު ނިންމުމެއް ކަމަށެވެ.
އިޔަން ވިދާޅުވީ ލިވަޕޫލުގެ ފޭނުންގެ އަދަދު 200 މިލިއަަނުން މަތީގައި އުޅޭއިރު، އެންމެފަހު ސީޒަންގައި އެ ކްލަބުގެ މެޗުތަކަށް 12 ބިލިއަން ވިއުސް ލިބުނު ކަމަށެވެ.
އަދި ރާއްޖެއާއެކު ހެދި ޕާޓްނާޝިޕްއަކީ ހަމައެކަނި ފަތުރުވެރިކަމާ ގުޅޭ ޕާޓްނާޝިޕްއެއް ނޫން ކަމަށާއި މިއީ ދުނިޔޭގެ ތިމާވެށި ރައްކާތެރިކޮށް ދެމެހެއްޓިނިވި ތަރައްގީއާ ގުޅޭ ފިކުރުގެ ޕާޓްނާޝިޕްއެއް ކަމަށް ވިދާޅުވި އެވެ.
