އީދު ކުޅިވަރުގެ ނަމުގައި އަންހެނުން ނެރެގެން ނެއްޓުވުމަކީ ހިތާމަ ހުރި ކަމެއް: ޝެއިހް ފިކުރީ
ސަގާފަތާއި ގައުމިއްޔަތުގެ ނަމުގައި ސަރުކާރާއި ދައުލަތުގެ މުއައްސަސާތަކުން ހިންގާ މުންކަރާތްތަކާ މެދު ކަންބޮޑުވެ ހިތާމަ ކުރައްވާ ކަމަށް ރާއްޖޭގެ މަޝްހޫރު ދީނީ އިލްމުވެރިއެއް ކަމަށްވާ އައްޝެއިހް ހަސަން މޫސާ ފިކުރީ ވިދާޅުވެއްޖެ އެވެ.
ޝެއިހް ފިކުރީ އެހެން ވިދާޅުވެފައި ވަނީ އިއްޔެ "އެކްސް" ގައި ކުރެއްވި ޕޯސްޓެއްގަ އެވެ.
"ސަގާފަތާއި ގައުމިއްޔަތުގެ ނަމުގައި ދައުލަތުގެ ވުޒާރާތަކާއި ކައުންސިލުތަކުން އީދު ކުޅިވަރުގެ ނަމުގައި ދެ ޖިންސު މަސްހުނިކޮށް އަންހެންވެރިން ނެރެގެން ނައްޓުވައިގެން ހިންގާ މުންކަރާތްތައް ދިރުވާ އާލާ ކުރުމަކީ ހިތާމަހުރި ކަމެއް،" ޖަމްއިއްޔަތުއްސަލަފުގެ އިލްމުވެރިންގެ މަޖުލީހުގެ މެމްބަރު ޝެއިހް ފިކުރީ ކަންބޮޑުވުން ފާޅުކުރައްވަމުން ލިޔުއްވާފައިވެ އެވެ.
އަދި މި މުންކަރާތްތައް ހުއްޓާލުމަށް ޝެއިހް ވަނީ ދައުލަތަށް ގޮވާލައްވާފަ އެވެ.
"އެކްސް" ގައި ލިޔުއްވާފައިވާ ލިޔުންކޮޅު ނިންމަވާލައްވާފައި ވަނީ ކުރިއަށް މި އޮތް ހައްޖު މަހުގެ ދުވަސްތަކުގައި އީދު ކުޅިވަރުގެ ނަމުގައި ހިންގާ ފާހިޝް މުންކަރާތްތަކުގައި ބައިވެރިނުވުމަށް އެންމެހާ ދިވެހި ލޮބުވެތި ރައްޔިތުންނަށް ނަސޭހަތްތެރިވަމުންނެވެ.
މި އަހަރު ވެސް ރަސްމީކޮށް ސަރުކާރުން ބޮޑު އީދު ތިން ރަށެއްގައި ފާހަގަކުރުމަށް ވަނީ ނިންމާފަ އެވެ.
