އެއްވުން ހަނިވާ ގޮތަށް އޮތް ގާނޫނު އުވާލަން އެމްޑީޕީން ހުށަހަޅައިފި
އެއްވެ އުޅުމުގެ މިނިވަންކަމާއި މުޒާހަރާކުރުން ހަނިކޮށްފައިވާ، އެއްވެ އުޅުމުގެ މިނިވަންކަމުގެ ގާނޫނު އުވާލުމަށް އިދިކޮޅު އެމްޑީޕީން ހުށަހަޅައިފި އެވެ.
މި ބިލު ރައްޔިތުންގެ މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ. މާދަމާ ބާއްވާ މަޖިލީހުގެ ޖަލްސާއަށް ބިލުގެ ފުރަތަމަ ކިއުން އިއްވުމަށް ތާވަލުކޮށްފައި ވެސް ވެ އެވެ.
މި ގާނޫނަކީ ކުރީގެ ރައީސް މުހައްމަދު ވަހީދުގެ ވެރިކަމުގައި އޭރު ވެސް އިދިކޮޅުގައި އެމްޑީޕީ އޮވެގެން ކުރަމުން ދިޔަ މުޒާހަރާތައް ހަލަބޮލިވެގެން 2013ގައި ވުޖޫދުކުރި ގާނޫނެކެވެ.
ގާނޫނު ވުޖޫދުކުރުމާއެކު މާލޭގެ ހަތް ސަރަހައްދެއްގައި މުޒާހަރާކުރުން މަނާވި އެވެ. އެއިން ބޮޑު ސަރަހައްދަކީ ގްރީން ޒޯން ކަމަށް ކިޔާ، ބަންޑާރަ ކޮށި، ރައީސް އޮފީސް، ޖުމްހޫރީ މައިދާން، މުލިއާގެ ހިމެނޭ ސަރަހައްދެވެ.
އޭގެ ފަހުން ކުރީގެ ރައީސް އަބްދުﷲ ޔާމީނުގެ ވެރިކަމުގައި ސަރުކާރުން ކަނޑައަޅާ ތަނެއްގައި ނޫނީ މާލޭގައި އެއްވާން ފުލުހުންގެ ހުއްދަ ކުރިއާލާ ހޯދަން ޖެހޭ ގޮތަށް ގާނޫނަށް އިސްލާހެއް ގެނަ އެވެ. އެއީ އޭރު ސަރުކާރު ހިންގާ ޕީޕީއެމްގެ މެޖޯރިޓީ އޮތް މަޖިލީހެކެވެ.
2016ވަނަ އަހަރު ގެނައި އެ އިސްލާހު އުވާލުމަކީ ކުރީގެ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ. ނަމަވެސް ވެރިކަމުގެ ފަސް އަހަރު، އެމަނިކުފާނުގެ އެމްޑީޕީއަށް މަޖިލީހުގެ ސުޕަ މެޖޯރިޓީ އޮވެމެ ނިންމާލީ އެ ވައުދު ނުފުއްދަ އެވެ.
މިއީ މިހާރުގެ ރައީސް ޑރ. މުހައްމަދު މުއިއްޒުގެ ވެސް ވައުދުފުޅެކެވެ. މި ވައުދު އޮތް ގޮތުގައި އޮވެމެ، އެންމެ ފަހުން މިދިޔަ މަހު ތިންވަނަ ދުވަހު އެމްޑީޕީން ފުލުހުން ދިން އިރުޝާދާ ހިލާފަށް އަމީނީ މަގުގެ ބަދަލުގައި މަޖީދީ މަގުން މުޒާހަރާ ގެންދަން އުޅުމުން ހުރަސް އަޅާފައިވެ އެވެ.
މި ގާނޫނު އުވާލުމަށް އެމްޑީޕީން މަޖިލީހަށް ހުށަހެޅި އިރު މި މަހުގެ 17 ވަނަ ދުވަހު، ސަރުކާރަށް ދެ އަހަރު ފުރުމާ ދިމާކޮށް މާލޭގައި ބޮޑު މުޒާހަރާއެއް ކުރުމަށް އެމްޑީޕީން ރާވާފައިވެ އެވެ.
