ޚަބަރު

ހަނިމާދޫ އެއާޕޯޓަކީ އެމްޑީޕީން ހޯދައިދިން ލާމަރުކަޒީ ކާމިޔާބީއެއް: ފައްޔާޒު

މުޙައްމަދު ޝިޔާމް ، ދެން އޮންލައިން
އެމްޑީޕީގެ ޗެއާޕާސަން ފައްޔާޒު އިސްމާއިލް

ހދ. ހަނިމާދޫ އިންޓަނޭޝަނަލް އެއާޕޯޓަކީ އެމްޑީޕީގެ މިިދިޔަ ސަރުކާރުން ހޯދައިދިން ލާމަރުކަޒީ އުސޫލުން ރާއްޖެ ތަރައްގީކުރުމުގެ ކާމިޔާބީއެއްކަމަށް އެ ޕާޓީގެ ޗެއާޕާސަން ފައްޔާޒު އިސްމާއިލް މިރޭ ވިދާޅުވެއްޖެއެވެ.

Ads by MPL

ކުރީގެ ސަރުކާރުން ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަސައްކަތް ފެށީ, އިންޑިއާއިން ދިން ކްރެޑިޓް ލައިންގެ އެހީގެ ތެރެއިންނެވެ. އެ މަސައްކަތުގެ ގާތްގަނޑަކަށް 30 ޕަސެންޓް އޭރުގައި ކުރިއަށް ގެންދެވުނެވެ. ބާކީ މަސައްކަތުގެ 70 ޕަސެންޓްގެ ބޮޑު ބައެއް މި ސަރުކާރުން ނިންމައި މިއަދު ހުޅުވުމުގެ ރަސްމިއްޔާތު ބޭއްވިއެވެ.

އެކަމާ ގުޅިގެން ފައްޔާޒު އެކްސްގައި ލިއުއްވީ ހަނިމާދޫ އެއާޕޯޓަކީ އިގުތިސޯދީ ގޮތުން ފުދުންތެރި އަދި ދެމެހެއްޓެނިވި އުތުރުގެ ސަރަޙައްދަކަށް ހެދުމަށް ލާމަރުކަޒީ އުސޫލުން ރާއްޖޭގެ ތަރައްގީއަށް އެޅުނު މުހިންމު ކާމިޔާބީއެއް ކަމަށެވެ.

"މި ކާމިޔާބީ ލިބުނީ [ކުރީގެ] ރައީސް އިބްރާހީމް މުހައްމަދު ސޯލިހުގެ ސަރުކާރާއި، އިކޮނޮމިކް މިނިސްޓްރީގެ ހުނަރުވެރި ޓީމާއި އިންޑިއާގެ ފަރާތުން ލިބުނު ވަރަށް ބޮޑު އެއްބާރުލުމާ އެކު," އެ ސަރުކާރުގެ އިކޮނޮމިކް މިނިސްޓަރަކަށް ވެސް ހުންނެވި ފައްޔާޒު ވިދާޅުވިއެވެ.

މި ޕްރޮޖެކްޓްގެ ފައިދާ އަންނަން އޮތް ޖީލުތަކަށް ކުރާނެ ކަމަށް ވެސް އޭނާ ވިދާޅުވިއެވެ.

ހަނިމާދޫ އިންޓަނޭޝަނަލް އެއާޕޯޓް ތަރައްގީކުރަން ޖުމުލަ 136.6 މިލިއަން ޑޮލަރު ހަރަދުކޮށްފައި ވެއެވެ. އިންޑިއާގެ ޖޭއެމްސީއާ ހަވާލުކޮށްގެން، އެ މަޝްރޫއުގެ ދަށުން 2،400 މީޓަރުގެ ރަންވޭއަކާއި 10،500 އަކަމީޓަރުގެ ޕެސެންޖާ ޓާމިނަލެއް ތަރައްގީކުރިއެވެ.

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!