ޑްރަގު ފެނުނު ލަންކާ ބޯޓުގައި ތިބި 5 މީހުން ހައްޔަރު ކޮށްފި
ރާއްޖޭގެ ކަނޑުގެ ސަރަހައްދުން ގިނަ އަދަދެއްގެ މަސްތުވާތަކެއްވާއެކު އަތުލައިގަތް ސްރީލަންކާއަށް ނިސްބަތްވާ މަސް ބޯޓުގައި ތިބި ފަސް މީހުން ހައްޔަރު ކޮށްފައިވާ ކަމަށް ފުލުހުން ބުނެފި އެވެ.
ފުލުހުން މިރޭ ނެރުނު ބަޔާނެއްގައި ބުނީ އެމްއެންޑީއެފުން އެ އުޅަނދު ބެލުމުގެ ދަށަށް ގެނެސް، މަސްތުވާތަކެތި ކަމަށް ޝައްކު ކުރެވޭ ގޯނިތަކެއް އޭގައި ހުރުމުން، އެ އުޅަނދާއި އޭގައި ތިބި ފަސް މީހުން އިއްޔެ އެ ހިދުމަތާ ހަވާލުކޮށްފައިވާ ކަމަށެވެ.
އަދި، މިއަދު ކޯޓު އަމުރެއްގެ ދަށުން ފުލުހުން އެ އުޅަނދު ބަލައިފާސްކުރިއިރު، މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 24 ގޯނި ފެނިފައިވާ ކަމަށެވެ. އޭގައި ހުރި 58.6 ކިލޯގެ ހެރޮއިން އާއި 297.3 ކިލޯގެ މެތަމްފެޓައިމް އެވެ.
މި މައްސަލައިގައި ފުލުހުން ހައްޔަރު ކޮށްފައި ވަނީ ލަންކާއަށް ނިސްބަތްވާ 36، 42، 28، 34 އަދި 63 އަހަރުގެ ފަސް ފިރިހެނުންނެވެ.
ފުލުހުން ބުނީ މި މައްސަލަ ލަންކާގެ ނޭތީ، ލަންކާ ޕޮލިސް އަދި އެމްއެންޑީއެފާ ގުޅިގެން ތަހުގީގު ކުރަމުންދާ ކަމަށެވެ.
