ވަގަށް އެތެރެކުރަން އުޅުނު ސިނގިރޭޓްތަކަކާ އެކު 3 މީހަކު ލަންކާ އެއަރޕޯޓުން ހައްޔަރުކޮށްފި
ވަގަށް އެތެރެކުރަން އުޅުނު ސިނގިރޭޓްތަކަކާ އެކު 3މީހަކު ލަންކާ ބަންޑަރަނައިކަ އިންޓަރނޭޝަނަލް އެއަރޕޯޓުން ހައްޔަރުކޮށްފިއެވެ.
އެ ޤައުމުގެ މީޑިއާތަކުން ހާމާކޮށްފައިވާ ގޮތުގައި މި 3 މީހުން ލަންކާއަށް އައިސްފައި ވަނީ މި ނޮވެމްބަރު މަހު 25ވަނަ ދުވަހުގެ ރޭ ދަންވަރު 1:00ގައި ދުބާއީން ލަންކާއަށް ދަތުރުކުރި އެމިރޭޓްސްގެ ފްލައިޓު (އީކޭ-648)އިންނެވެ. އަދި އެ މީހުންގެ ޢަމަލުތައް ހުރި ގޮތުން ޝައްކު ކުރެވިގެން ހުއްޓުވާ ޗެކްކުރުމުން ،ލަގެޖުގައި ފޮރުވާފައި ހުރި "ޕްލެޓިނަމް" ބްރޭންޑުގެ 595 ކާޓޫން ސިނގިރޭޓު ފެނިފައިކަމަށް މީޑިއާތައް ބުނެއެވެ.
މި މައްސަލަ އިތުރަށް ތަޙުޤީޤުކޮށް ކޯޓަށް ހާޒިރުކުރުމުން، ކޯޓުން ވަނީ ސިނގިރޭޓުތައް ފުލުހުންގެ ބެލުމުގެ ދަށަށް ގެންދިއުމަށް އަމުރުކޮށް 300،000ރ(ލަންކާ ރުޕީސް)އިން ޖޫރިމަނާކޮށްފައެވެ. އަދި ކޮންމެ މީހަކު 900،000ރ(ލަންކާ ރުޕީސް)އިން ޖޫރިމަނާކޮށްފައިވާ ކަމަށް އެ ޤައުމުގެ ފުލުހުންނާ ހަވާލާދީ މީޑިއާތަކުން ބުނެއެވެ.
