އެމްޑީޕީއަށް ދަތި ދުވަސްތަކެއް, އެކަމަކު އަރައިގަންނާނެ: ނަޝީދު
އިދިކޮޅު އެމްޑީޕީއަށް މި ވަގުތު ޖެހިފައިވަނީ ދަތި ދުވަސްތަކެއް ކަމަށާއި ނަމަވެސް މި ހާލަތުން އެމްޑީޕީ އަރައިގަންނާނެ ކަމަށް އެ ޕާޓީގެ އިސް ލީޑަރެއް ގޮތުގައި ދަހަރަކަށްވުރެ ގިނަ އަހަރު ހުންނެވި، ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރިޔާސީ ޓިކެޓަށް އެމްޑީޕީގެ އެތެރޭގައި ވާދަވެރިކަން ބޮޑެވެ. އެކަމަށް އެކި ލީޑަރުން ތިއްބެވި އިރު، މައިގަނޑު ގޮތެއްގައި އޮތީ ދެ ފެކްޝަނެކެވެ.
އެއް ފެކްޝަނަކީ މިދިޔަ ދެ ރިޔާސީ އިންތިހާބުގައި އެމްޑީޕީގެ ރިޔާސީ ކެންޑިޑޭޓް އަދި ކުރީގެ ރައީސް އިބްރާހިމް މުހައްމަދު ސޯލިހްގެ ފެކްޝަނެވެ. އޭގެ ކުރީގެ ދެ ރިޔާސީ އިންތިހާބުގައި ކެންޑިޑޭޓް ނަޝީދާއި މިދިޔަ ހަފުތާ ޗެއާޕާސަން ކަމުން އިސްތިއުފާ ދެއްވި ފައްޔާޒަކީ އަނެއް ފެކްޝަނެވެ.
ޗެއާޕާސަންގެ މަގާމު ހުސްވުމުން ވަގުތީ ޗެއާޕާސަނެއް ހޮވަން ރޭ ކުރިއަށް ގެންދިޔަ ބައްދަލުވުން ހޫނުވެ، ވަގުތީ ޗެއާޕާސަނެއް ނުހޮވި ބައްދަލުވުން ނިންމާލަން ޖެހުނެވެ. އަދި ފައްޔާޒު ރިޔާސީ އިންތިހާބަށް ނެރުއްވުމަށް ނަޝީދު ކުރައްވާ މަސައްކަތުން އެތެރޭގައި މިދިޔަ ދެ ހަފުތާ ދިޔައީ ވަރަށް ބޮޑެތި ޒުވާބުތަކާއި ދެބަސްވުންތައް ތެރެއިންނެވެ.
މި ކަންކަން ހިނގަމުން ދަނިކޮށް ނަޝީދު މިއަދު އެކްސްގައި ލިއުއްވީ "އެމްޑީޕީ މި ވަގުތު މި ދަނީ އުނދަގޫ ދުވަސްތަކެއް ތަޖުރިބާ ކުރަމުން" ކަމަށެވެ. "ނަމަވެސް އެ ކަމުން އެމްޑީޕީ އަރައިގަންނާނެ ކަމީ އަޅުގަނޑު ޝައްކު ކުރާ ކަމެއް ނޫން" ކަމަށް ލިއުއްވާފައިވެ އެވެ.
މިއަދު އެމްޑީޕީގެ ގިނަ މެންބަރުން ބޭނުންވަނީ އެއްބައިވަންތަކަމާ އެކު ޕާޓީ ދެމިއޮންނަން ކަން ނަޝީދު ފާހަގަކުރެއްވި އެވެ.
ދެން ނަޝީދު ފާހަގަކުރެއްވީ ކުރީގެ ރައީސް މުހައްމަދު އަމީން ދީދީގެ ވެރިކަމުގައި ހިނގި މީޓަރު ބޯޓު ގަޑުބަޑުގެ ހާދިސާގައި އަމީން ވިދާޅުވި ބަސްފުޅެކެވެ. އެއީ އަމީންގެ ކެބިނެޓުގެ އެއްބައިވަންތަކަން މުހިންމު ކަން ދޭހަކޮށްދިނުމުގެ ގޮތުން އެމަނިކުފާނު ވިދާޅުވި ބަސްފުޅެކެވެ.
"ކެބިނެޓުގެ އެކަކަށް ލިބުނު ގެއްލުމެއް އަނެކަކަށް ވެސް ލިބެން ޖެހޭނެ ކަމަށް," ރާއްޖޭގެ ވެރިކަން ތިން އަހަރެއްހާ ދުވަހު ކުރެއްވި އަދި މަޖިލީހުގެ ރައީސްކަން ހަތަރު އަހަރު ކުރެއްވި ނަޝީދު ލިއުއްވާފައިވެ އެވެ.
ދެން އެމަނިކުފާނު ލިއުއްވީ އެ ހާދިސާގައި މޮޓަރު ބޯޓުގައި މުޅި ކެބިނެޓުގެ ކޮޅުނބަށް ވަޑައިގެން އެ ތަނުގައި އަހަރެއްހާ ދުވަހު ތިއްބެވި އިރު ހުސައިން ސަލާހުއްދީން ލިއުއްވި ބައިތެކެވެ.
"އުނިކަން ނުވާ މާތް ދޫފުޅުން، އެ ދުވަހު ވިދާޅުވީ ޔުނިޓީ އަކީ ފަހެ ހަސަދައާއި މަކަރަށް ނުވާނެބާ," ނަޝީދު ލިއުއްވާފައިވެ އެވެ.
