ތޫފާނުގެ ސަބަބުން ލަންކާއިން މަރުވި މީހުންގެ އަދަދު 410 އަށް އަރައިފި
ތޫފާން ޑިޓުވާގައި ސްރީލަންކާއަށް ކުރި ވިއްސާރައިގައި، ފެންބޮޑުވެ ހިނގި އެކި ހާދިސާތަކުގައި 410 މީހުން މަރުވެ، 300 އަށްވުރެ ގިނަ މީހުން ގެއްލިފައިވާ ކަމަށް އެ ގައުމުގެ ޑިޒާސްޓާ މެނޭޖްމަންޓް ސެންޓަރު (ޑީއެމްސީ) އިން ބުނެފި އެވެ.
މި ހާދިސާގެ ސަބަބުން އެންމެ ބޮޑަށް ގެއްލުން ވެފައި ވަނީ އައްސޭރިފަށުގައި ހުރި ސަރަހައްދުތަކަށެވެ. އޭގެ ތެރެއިން ގަމްޕަހާ، ޕުއްތަލަމް އަދި މަންނާރުފަދަ ސަރަހައްދުތަކަށް ވަރަށް ބޮޑަށް ގެއްލުންވެފައިވެ އެވެ.
މި ތޫފާނުގެ ސަބަބުން ލަންކާގެ 25 ހިސާބަކުން 1.4 މީލިއަން މީހުންނަށް ގެއްލުން ވެފައިވާ ކަމަށް ލަންކާގެ އިދާރާތަކާ ހަވާލާދީ ނޫސްތަކުން ވަނީ ރިޕޯޓު ކޮށްފަ އެވެ.
ގުދުރަތީ މި ކާރިސާގައި ލަންކާގެ 20،000 އެއްހާ ގެ ވަނީ ނޫޅެވޭ ވަރަށް ހަލާކުވެފަ އެވެ. އަދި 60،000 އަށްވުރެ ގިނަ މީހުންނަށް ވަނީ ވަގުތީ ބޯހިޔާވަހިކަން ފޯރުކޮށްދީފަ އެވެ.
ލަންކާއަށް އެހީތެރިވުމުގެ ގޮތުން ދިވެހި ސަރުކާރުން ދޭން ނިންމި 50،000 ޑޮލަރު މިހާރު ވަނީ އެ ގައުމުގެ ސަރުކާރާ ހަވާލުކޮށްފަ އެވެ. އަދި ރާއްޖޭގައި ހިންގި ޓެލެތޯނުން 80 ލައްކައަށްވުރެ ގިނަ ފައިސާ ވަނީ ލިބިފަ އެވެ. ލަންކާ ރައްޔިތުން ވަނީ ރާއްޖެއަށް ވަރަށް ބޮޑަށް ޝުކުރު އަދާކޮށްފަ އެވެ.
