މީސްމީޑިއާއަކީ ފުރައްސާރަ ކުރުމުގެ އައު ވަޞީލަތެއް، ޚާއްޞަކޮށް އަންހެނުންނަށް ފުރައްސާރަ ކުރުން އިތުރު: ޢާއިޝަތު ޝިހާމް
މީސްމީޑިއާއަކީ ފުރައްސާރަ ކުރުމުގެ އައު ވަޞީލަތެއް ކަމަށާއި ޚާއްޞަކޮށް މީސްމީޑިއާގައި އަންހެނުންނަށް ފުރައްސާރަ ކުރުން އިތުރުވެފައިވާ ކަމަށް އިޖުތިމާޢީ އަދި ޢާއިލީ ތަރައްޤީއާއި ބެހޭ ވަޒީރު ޢާއިޝަތު ޝިހާމް ވިދާޅުވެއްޖެއެވެ.
އިޖުތިމާޢީ އަދި ޢާއިލީ ތަރައްޤީއާއި ބެހޭ ވުޒާރާއިން، އެ ވުޒާރާގެ މަސައްކަތްތަކާއި ގުޅޭގޮތުން ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އިޖުތިމާޢީ އަދި ޢާއިލީ ތަރައްޤީއާއި ބެހޭ ވަޒީރު ޢާއިޝަތު ޝިހާމް ވިދާޅުވީ، މީސްމީޑިއާގައި އަންހެނުންނަށް ފުރައްސާރަކުރުން އިތުރުވުމުގެ ސަބަބުން އެކަމަށް ހޭލުންތެރިކުރުވުމުގެ ގޮތުން ކެމްޕެއިނެއް ކުރިއަށް ގެންދަން ޖެހުނު ކަމަށެވެ. އަދި އަންހެނުންނަށް އޮންނަ ރައްކާތެރިކަން ކަށަވަރުކުރުމަށް ސަރުކާރުގެ ސިޔާސަތުގެ ތެރެއިން ގިނަ ކަންތައްތަކެއް ކުރަމުންގެންދާކަން ވެސް އެކަމަނާ ފާހަގަކުރެއްވިއެވެ.
ހަމައެހެންމެ, ސަރުކާރުން އަނިޔާލިބޭ އަންހެނުންނަށް ރައްކާތެރި މާޙައުލެއް ހޯދައި ދިނުމަށް ކުރިއަށް ގެންދާ މަޝްރޫޢުތަކުގެ ދަށުން، ޑޮމެސްޓިކް ވައިލެންސް ސެންޓަރުތައް ރާއްޖޭގެ ތިން ސަރަހައްދެއްގައި ޤާއިމު ކުރުމަށް ނިންމާފައިވާ ކަމަށް ވަޒީރު ވިދާޅުވިއެވެ. އެގޮތުން، އައްޑޫ ސިޓީގައި ތަރައްޤީ ކުރާ ސެންޓަރުގެ މަސައްކަތް ފެށުމަށް ހަމަޖެހިފައިވާ ކަމަށާއި ހުޅުމާލޭގެ ސެންޓަރު އިމާރާތްކޮށްދޭނެ ފަރާތެއް ހޯދުމަށް ޢިއުލާންކޮށްފައިވާ ކަމަށް އެކަމަނާ ވިދާޅުވިއެވެ. އަދި ރ. އަތޮޅު އުނގޫފާރުގައި ވެސް ޑޮމެސްޓިކް ވައިލެންސް ސެންޓަރެއް ތަރައްޤީކުރުމުގެ ކަންކަން ކުރެވެމުންދާ ކަމަށް ވަޒީރު ޢާއިޝަތު ޝިހާމް ވިދާޅުވިއެވެ.
