މުދަލު ޒަކާތުގެ ގޮތުގައި މިދިޔަ އަހަރު 107 މިލިއަން ރުފިޔާ ލިބުނު
މުދަލު ޒަކާތުގެ ގޮތުގައި މިދިޔަ އަހަރު 107 މިލިއަން ރުފިޔާ ލިބިފައިވާ ކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގެ ތަފާސްހިސާބުތަކުން ދައްކައިފިއެވެ.
މީރާއިން އާންމުކުރި ތަފާސްހިސާބުތަކުން ދައްކާ ގޮތުގައި، 2025ވަނަ އަހަރު މުދަލުގެ ޒަކާތުގެ ގޮތުގައި ލިބިފައިވާ 107 މިލިއަން ރުފިޔާއަކީ 2024 އަހަރާ އަޅާބަލާއިރު 4.8 ޕަސެންޓް އިތުރު އަދަދެކެވެ. 2024 ގައި ލިބިފައި ވަނީ 102 މިލިއަން ރުފިޔާއެވެ.
ތަފާސްހިސާބުން ދައްކާ ގޮތުގައި މިދިޔަ އަހަރު މުދަލު ޒަކާތުގެ ގޮތުގައި އެންމެ ބޮޑު އަދަދެއް ބަލައިގެންފައި ވަނީ މާޗު މަހުގައެވެ. އެއީ 23 މިލިއަން ރުފިޔާއެވެ. ދެވަނައަށް އެންމެ ބޮޑު އަދަދެއް ބަލައިގަތް ޖުލައި މަހު، 12 މިލިއަން ރުފިޔާ ބަލައިގެންފައިވެއެވެ.
މުދަލު ޒަކާތުގެ ނިސޯބަށް އެންމެ ފަހުން ބަދަލު އައިސްފައި ވަނީ މިދިޔަ ޑިސެމްބަރު މަހުގެ 21 ވަނަ ދުވަހުއެވެ. ޒަކާތު ހައުސްއިން އާންމުކޮށްފައިވާ ގޮތުގައި މިހާރު މުދަލު ޒަކާތުގެ ނިސޯބަކީ 19،527.90ރ.އެވެ.
