ގޮއިދޫގައި ގާއިމުކުރާ ގްރީން ހައުސްތަކުގެ 75 ޕަސެންޓް ނިމިއްޖެ
ށ. ގޮއިދޫގައި ގާއިމުކުރާ ގްރީން ހައުސްތަކުގެ 75 ޕަސެންޓް ނިމިއްޖެ އެވެ.
އިންޓަރނޭޝަނަލް ފަންޑް ފޯ އެގްރިކަލްޗަރ ޑިވެލޮޕްމެންޓް (އިފާޑް)އާއި ސަރުކާރާއި ގުޅިގެން އެގްރިކަލްޗާ މިނިސްޓްރީން ކުރިއަށް ގެންދާ މޯލްޑިވްސް އެގްރިބިޒްނަސް ޕްރޮގްރާމް(މެޕް) އިން، ށ. ގޮއިދޫގައި ގާއިމު ކުރާ ގްރީން ހައުސްތަކުގެ މަސައްކަތުގެ 75 އިންސައްތަ ނިމިއްޖެ އެވެ.
އެ މަސައްކަތް ކުރަމުންދަނީ އެރަށުގެ ކައުންސިލްގެ ފުރިހަމަ އެހީތެރިކަމާއި އެކުގައެވެ.
ށ. ގޮއިދޫ ފާހަގަ ކުރެވެނީ ޒަމާނީ ދަނޑުވެރިކަމަށް ލޯ ހުޅުވިފައިވާ، އަދި ދަނޑުވެރިކަމުގައި ކުރިޔަށް ދިއުމަށް ޝައުގާއި އެކު މަސައްކަތް ކުރަމުން އަންނަ ދަނޑުވެރިންތަކެއް ތިބި ރަށެކެވެ. އެގޮތުން އެރަށުން 10 ދަނޑެއް ވަނީ ރާއްޖޭގައި އެންމެ ފުރަތަމަ ފަސް މޮޑިއުލް ހިމެނޭ މޯލްޑިވްސް ގުޑް އެގްރިކަލްޗަރަލް ޕްރެކްޓިސް(އެމްގެޕް)ގައި ސެޓްފައިޑްވެސް ވަނީ ވެފައެވެ.
އޭގެ އިތުރުން އެރަށުގައި، ދަނޑުވެރިކަމުގެ އުފެއްދުންތަކުން އަގު އެއްކޮށް ބާޒާރަށް ނެރުމަށް، ފެސިލިޓީއެއް ވަނީ ގާއިމުކޮށްފަ އެވެ. މިހާރު ކުރަމުން ދަނީ އެތަނަށް ބޭނުންވާ މެޝިނަރީތައް ހޯދުމުގެ މަސައްކަތެވެ.
މެޕް ޕްރޮޖެކްޓުން ރާއްޖޭގެ ދަނޑުވެރިކަން ކުރިއެރުވުމަށް އަންނަނީ ގިނަ ޕްރޮޖެކްޓުތަކާއި، ތަމްރީންތައް ހިންގަމުންނެވެ
ދަނޑުވެރިކަމުގައި ކުރިއަރާ ދިއުމަށް ށ. ގޮއިދޫ ރައްޔިތުންނަށް އެރަށު ކައުންސިލުން އަންނަނީ، ވަރަށް ބޮޑަށް އެހީތެރިވަމުންނެވެ. އަދި ހާއްސަކޮށް ރާއްޖޭގައި ދަނޑުވެރިކަން ކުރިއެރުވުމަށް ވުޒާރާއިން ކުރަމުންދާ މަސައްކަތުގައި، ވެސް އެރަށުގެ ކައުންސިލާއި ދަނޑުވެރިންގެ ފަރާތުން ފުރިހަމަ އެއްބާރުލުމެއް އަންނަނީ ދެމުން ނެވެ.
