އެކައުންޓެއް ހެކުކޮށް ގިނަ އަދަދެއްގެ ފައިސާ ނެގި 10 މީހަކު ހައްޔަރުކޮށްފި

މީހެއްގެ ސޯޝަލް މީޑިއާ އެކައުންޓުތަކެއް ހެކުކޮށް އޭނާގެ ހިއްސާ އޮންނަ ކުންފުނީގެ ބޭންކު އެކައުންޓުން ގިނަ އަދަދެއްގެ ފައިސާ ނެގި މައްސަލައެއްގައި 10 މީހަކު ހައްޔަރުކޮށްފިއެވެ.

Ads by STELCO

ފުލުހުން ބުނީ އެ މައްސަލަ ބަލަން ފެށީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބެންކު އެކައުންޓުން 279600 އަށްވުރެ ގިނަ ފައިސާ ނަގައިގެން ހުށަހެޅި މައްސަލައަކާ ގުޅިގެން ކަމަށެވެ.

އަދި އެ މައްސަލައާ ގުޅިގެން ކޯޓު އަމުރެއްގެ ދަށުން މިދިޔަ ބުދަ ދުވަހުން ފެށިގެން އޮޕަރޭޝަންއެއް ކުރިއަށް ގެންދިޔަ ކަމަށާއި އެ އޮޕަރޭޝަންގައި ގޭންގު ކްރައިމްއާއި ހިންމަފުށި ޕޮލިސް އަދި އައްޑޫ ސިޓީ ހިތަދޫ ޕޮލިސް ބައިވެރިވިކަމަށް ފުލުހުން ބުންޏެވެ.

އެ މައްސަލައިގައި ހައްޔަރުކުރި މީހުން

ލ. އިސްދޫ / ގުޑްލައިފް، މުހައްމަދު ހަސަން (59އ)
ސ. ހިތަދޫ / އުދަ، އަލީ އިރުފާނު އަހުމަދުދީދީ (26އ)
ސ. ހިތަދޫ / ނަންރީތިގެ، އަލީ ޝިރާޒު (38އ)
ހދ. ވައިކަރަދޫ / ޕެރިމްރޯޒް، އަބްދުﷲ ނާފިޒް (39އ)
ގއ. ކަނޑުހުޅުދޫ / ފޫހިވާގެ، މުހައްމަދު އަލީ (42އ)
މ. މާލޭގެއާގެ / މާލެ، މުހައްމަދު ނުހާދު އަލީ (30އ)
ހއ. ކެލާ / ޕެނަމާ، މުހައްމަދު ސިމާދު (38އ)
ގދ. ފިޔޯރީ / ހީނާމާގެ، އަލީ އިމްރާން (38އ)
ގދ. ތިނަދޫ / ގުލްބަކާގެ، އަބްދުﷲ އިސްރާގު (19އ)
ކ. ހިންމަފުށި / މެޑޯޒް، މުހައްމަދު އިބްރާހީމް (49އ)

ފުލުހުން ބުނީ އެ މީހުންގެ ތެރެއިން އެކަކު ހައްޔަރުކުރީ ހިންމަފުށިން ކަމަށާއި އަދި ތިން މީހަކު އައްޑޫ ސިޓީންވެސް ހައްޔަރުކުރި ކަމަށެވެ. ދެން ތިބި މީހުން ހައްޔަރުކުރީ މާލެއިންއެވެ.

ފުލުހުން އިތުރަށް ބުނިގޮތުގައި

އެ މީހުންގެ ތެރެއިން ހަ މީހަކު ސްކޭމްކޮށްގެން ހޯދާފައިވާ ފައިސާ އެ މީހުންގެ އެކައުންޓަށް ޖަމާކޮށް ނެގި
އަދި އެތަނުން އެކަކު، ސްކޭމްކޮށްގެން ހޯދާފައިވާ ފައިސާ އެކި ވިޔަފާރިތަކަށް ޖަމާކޮށް އެ ފައިސާ އަށް މުދާ ގަތް
އަނެއް ތިން މީހުން އެކި މީހުން އޭޓީއެމްއަށް ގެންގޮސްގެން އެ މީހުން މެދުވެރިކޮށް އޭޓީއެމްއިން ފައިސާ ނެގުމަށްފަހު އެ ފައިސާތަކާ ހަވާލުވި

އެ މައްސަލައާ ގުޅިގެން ހައްޔަރުކުރި 10 މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން މުޙައްމަދު އިބްރާހީމް ފަސްދުވަހަށް، މުހައްމަދު އަލީއާއި މުހައްމަދު ހަސަން ހަތްދުވަހަށް، ޢަލީ އިރުފާން އަހުމަދުދީދީ 10 ދުވަހަށް އަދި އަނެއް ހަ މީހުން 15 ދުވަހަށް ބަންދުކުރުމަށް ވަނީ އަމުރުކޮށްފައެވެ.

ފުލުޔުން ބުނީ އެ ފުލުހުންނާއި އެންޓި ސްކޭމް ސެންޓަރުން ތަހުގީގުކުރަމުންދާ ކަމަށެވެ.