ކުޑަކުއްޖަކު ގްރޫމްކޮށް ޖިންސީ ގޯނާކުރި މައްސަލައެއްގައި ދެ މީހަކު ހައްޔަރުކޮށްފި
ކުޑަކުއްޖަކު ގްރޫމްކޮށް ޖިންސީ ގޯނާކުރިކަމުގެ ތުހުމަތުގައި ދެ މީހަކު ހައްޔަރުކޮށްފިއެވެ.
އެ މައްސަލައިގައި ހައްޔަރުކުރީ ހދ. ކުޅުދުއްފުށި / ސިލްވަރސްޓަރ، އަލީ ހަސަން (44އ)އާއި ހދ. ކުޅުދުއްފުށި / ކަސްތޫރިގެ، މުހައްމަދު އިހުސާން (21އ)އެވެ.
އެ ދެ މީހުން ހައްޔަރުކުރީ ފެމިލީ އެންޑް ޗައިލްޑް ޕްރޮޓެކްޝަނާއި، ކްރައިމް އިންޓެލިޖެންސް އަދި އަތޮޅުތެރޭގެ ޕޮލިސް ސްޓޭޝަނެއް ގުޅިގެން ހިންގި އޮޕަރޭޝަނެއްގައެވެ.
އެގޮތުން މިދިޔަ ޑިސެމްބަރު މަހުގެ 24ވަނަ ދުވަހު އަލީ ހައްޔަރުކުރި އިރު އިހުސާން ހައްޔަރުކުރީ މި މަހުގެ ތިންވަނަ ދުވަހުއެވެ.
އަލީ އަންނަ މަހުގެ އެކަކާ ހަމައަށް ބަންދުގައި ބެހެއްޓުމަށް ކޯޓުން އަމުރު ނެރެފައިވާ އިރު އިހުސާން ބަންދުގައި ބަހައްޓަން އަމުރު ނެރެފައި ވަނީ އަންނަ މަހުގެ ހަވަނަ ދުވަހާ ހަމައަށެވެ.
ފުލުހުން ބުނީ އެ ދެ މީހުން ގްރޫމްކޮށް އެކްސްޕްލޮއިޓްކޮށް، ޖިންސީ ގޯނާކޮށްފައި ވަނީ 15އަހަރުގެ ދިވެހި އަންހެން ކުއްޖަކަށް ކަމަށެވެ.
ކުޑަކުދިން "ގްރޫމް"ކޮށް އެ ކުދިންގެ މަޖުބޫރުކަމުގެ ނާޖާއިޒު ފައިދާ ނަގައިގެން، މަސްތުވާތަކެއްޗާއި ގޭންގު ކުށްތަކުގެ އިތުރުން ޖިންސީ ގޯނާގެ އަމަލުތަކުގައި ކުޑަކުދިން ބައިވެރިކުރުވާ ފަރާތްތަކާ މެދު ދިވެހި ފުލުހުންގެ ހިދުމަތުން ހާއްސަ އިސްކަމެއް ދީގެން ފިޔަވަޅުތަކެއް އަޅަމުންދާކަމަށް ފުލުހުން ބުންޏެވެ.
