މިއަހަރުގެ ބޮޑު ދަރަނި މިހާރު ދައްކަން ޖެހުނަސް ދެއްކޭވަރަށް ފައިސާ އެބަހުރި: ރައީސް
ރާއްޖެއިން މިއަހަރު ދައްކަން ޖެހޭ އެންމެ ބޮޑު ބޭރުގެ ދަރަނި ކަމަށްވާ 500 މިލިއަން ޑޮލަރުގެ ސްކޫކް މިހާރު ދައްކަން ޖެނުނަސް ދެއްކޭނެ ފައިސާ ރައްކާކޮށްފައި އެބަހުރި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ސަރުކާރުން މިވަގުތު 650 މިލިއަން ޑޮލަރަށްވުރެ ގިނަ ފައިސާ ރައްކާކޮށްފައިވާ ކަމަށެވެ. އޭގެތެރެއިން ސޮވަރިން ޑިވެލޮޕްމެންޓް ފަނޑް (އެސްޑީއެފް) ގައި 320 މިލިއަން ޑޮލަރު އަދި ޔޫޒަބަލް ރިޒާވްގައި 330 މިލިއަން ޑޮލަރަށްވުރެ ގިނަ ފައިސާ އެބަހުރި ކަމަށް ރައީސް ވިދާޅުވިއެވެ.
"އެއްވެސް ކަންބޮޑުވުމެއް ނެތް، މިއަދު ފައިސާ ދައްކަން ޖެހުނަސް އެ ފައިސާ އެބަހުރި ރައްކާކޮށްފައި،" ރައީސް ވިދާޅުވިއެވެ.
ސަރުކާރުން ބޮޑު ދަރަނި ދައްކަން ނިންމާފައިވަނީ އަންނަ މަހުގެ 8 ވަނަ ދުވަހުއެވެ.
ރައީސް ވިދާޅުވީ ރާއްޖޭގެ ގްރޮސް ރިޒާވްގައި މިހާރުވެސް 1.27 ބިލިއަން ޑޮލަރު އެބަހުރި ކަމަށާއި އެއީ ދިވެހި ތާރީހުގައި ދުވަހަކުވެސް ރައްކާކުރެވުނު އަދަދެއް ނޫން ކަމަށެވެ. އަދި ރާއްޖޭގެ އިގުތިސޯދު މިހާރު ވަރަށް ރަނގަޅަށް ހިނގަމުންދާކަން ވެސް ފާހަގަކުރެއްވިއެވެ.
