އިންތިޚާބުގެ ބޮޑު ކާމިޔާބީއަށްފަހު ރައީސް ރަސްދޫއަށް ވަޑައިގަތުމުން ކުލަގަދަ މަރުޙަބާއެއް ކިޔައިފި
ނިމިދިޔަ ލޯކަލް ކައުންސިލް އިންތިޚާބުގައި ސަރުކާރު ހިންގާ ޕާޓީން ހޯދި ކާމިޔާބީއާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހަވީރު އަރިއަތޮޅު އުތުރުބުރީ ރަސްދޫއަށް ވަޑައިގަތުމުން އެރަށުގެ ރައްޔިތުން އެމަނިކުފާނަށް ވަރަށް ފުރިހަމަ އިސްތިޤުބާލެއް ކޮށްފިއެވެ.
އޭޕްރީލް މަހުގެ 4ވަނަ ދުވަހު ބޭއްވި އިންތިޚާބަށް ފަހު ރައީސް އަތޮޅުތެރެއަށް ކުރައްވާ މި ފުރަތަމަ ދަތުރުފުޅުގައި ދައުލަތުގެ ގިނަ ވަޒީރުން ބައިވެރިވެވަޑައިގަންނަވައެވެ. ރައީސްގެ އިސްތިޤުބާލުގައި ގިނަ އަދަދެއްގެ ރައްޔިތުން ބަނދަރު ސަރަޙައްދުގައި ސަފުހަދާފައިވާއިރު، އެމަނިކުފާނު ވަނީ ރައްޔިތުންނާ ބައްދަލުކުރައްވައި ސަލާމްކުރެއްވުމުގައި ގިނަ ވަގުތުތަކެއް ހޭދަކުރައްވާފައެވެ.
ސިޔާސީ ގޮތުން ބަލާއިރު، ރަސްދޫއަކީ މީގެ ކުރިން އިދިކޮޅު އެމްޑީޕީގެ ތާއީދު ބޮޑު ރަށެކެވެ. އެހެންނަމަވެސް ފަހުގެ އިންތިޚާބުގައި ޕީއެންސީން ވަނީ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އެއް ގޮނޑި ފިޔަވައި ކައުންސިލްގެ ހުރިހާ ގޮނޑިއެއް ބޮޑު ތަފާތަކުން ކާމިޔާބުކޮށްފައެވެ.
މީގެ އިތުރުން، އެމްޑީޕީގެ މައި މަރުކަޒުތައް ކަމުގައި ބެލެވުނު އއ. އުކުޅަހުގެ ހުރިހާ ގޮނޑިއަކާއި ތޮއްޑޫން ވެސް ޕީއެންސީން ވަނީ ތާރީޚީ ކާމިޔާބީތަކެއް ހޯދާފައެވެ. މުޅި އަރިއަތޮޅު އުތުރުބުރީގެ ނަތީޖާއަށް ބަލާއިރު، ވޯޓުގެ އެންމެ ބޮޑު އިންސައްތައަކާ އެކު ގިނަ ގޮނޑިތައް ކާމިޔާބުކޮށްފައި ވަނީ ވެސް ސަރުކާރު ހިންގާ މައި ޕާޓީންނެވެ.
