މުދަލާއެކު ކުރިނބީން ދޯންޏެއް ބަންޑުން ޖަހާލައިފި
ހދ. ކުޅުދުއްފުށިން އެއަތޮޅު ކުރިނބީ އަށް ދަތުރުކުރި ދޯންޏެއް ބަންޑުން ޖަހާލައިފިއެވެ.
ބަންޑުން ޖަހާލާފައިވަނީ "ވިންދު" ނަމަކަށް ކިޔާ ދޯންޏެއް ކަމަށް މައުލޫމާތު ލިބެއެވެ. އަދި އެއީ ކުރިނބި ގެ ދޯންޏެއް ކަމަށާއި އެ ދޯނި ބަންޑުން ޖަހާލާފައި ވަނީ ކުނބުރުދުއާއި ކުރިނބީއާއި ދޭތެރެއިން، ކުނބުރުދުއާ ކައިރިން ކަމަށް ވެސް މައުލޫމާތު ލިބެއެވެ.
ކުރިނބީ ކައުންސިލު ރައީސް މުޙައްމަދު އަފްރާޙް "ދެން" އަށް މައުލޫމާތު ދެއްވަމުން ބުނީ، ބަންޑުން ޖަހާލާފައިވަނީ "މުދާ އުފުލާ" ދޯންޏެއް ނޫން ކަމަށާއި އާދައިގެ ކުޑަ ދޯންޏެއް ކަމަށެވެ.
"އަނެއްހެން ހަމަ ކުޑަ ދޯންޏެއް އެއީ. 35 ފޫޓު ވަރުގެ ދޯންޏެއް. އޭގައި ތިބީ ތިން މީހުން. އެއީ އަންހެނަކާ ދެ ފިރިހެނުން. މަސް ދޯންޏެއް ގޮސް މީހުން ނަގައިގެން، ރަށަށް އެބަ ގެނޭ. އެންމެންގެ ހާލު ވެސް ރަނގަޅު" އަފްރާޙް ވިދާޅުވިއެވެ.
މިހާދިސާ އާއި ގުޅޭގޮތުން ފުލުހުންނާއި ސިފައިންގެ ބަހެއް އަދި ލިބިފައެއް ނުވެއެވެ.
