ވިހި އަހަރުގެ ތަޖުރިބާއާއެކު ސްޓެލްކޯގެ އެމްޑީގެ މަޤާމަށް ޑރ. ޢަލީ އަޒްވަރު އައްޔަންކުރައްވައިފި
ދިވެހިރާއްޖޭގައި ކަރަންޓުގެ ޚިދުމަތް ފޯރުކޮށްދޭ މައި ކުންފުނި ކަމަށްވާ ސްޓެލްކޯގެ މެނޭޖިންގ ޑިރެކްޓަރުގެ މަޤާމަށް، ވިހި އަހަރުގެ ތަޖުރިބާކާރު ޑރ. ޢަލީ އަޒްވަރު އައްޔަންކުރައްވައިފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު(ޕީސީބީ) އިން މި ބަދަލު ގެންނަވާފައިވާއިރު، އޭގެ ކުރިން އޭނާ ހުންނެވީ އެ ކުންފުނީގެ ޑެޕިއުޓީ މެނޭޖިންގ ޑިރެކްޓަރު(ޑީއެމްޑީ) ގެ މަޤާމުގައެވެ. އަދި ކުންފުނީގެ އެންމެ އިސްވެރިޔާގެ މަޤާމު ހުސްކޮށް އޮތް މުއްދަތުގައި، ސްޓެލްކޯގެ ހިންގުމުގެ އެންމެހައި ކަންކަން ބަލަހައްޓަވަމުން ގެންދެވީ ވެސް ޑރ. އަޒްވަރުގެ ބެއްލެވުމުގެ ދަށުންނެވެ.
މީގެ ވިހި އަހަރަށްވުރެ ކުރިން، 1997ވަނަ އަހަރު އާދައިގެ ޓްރޭނީއެއްގެ ގޮތުގައި ސްޓެލްކޯއާ ގުޅިވަޑައިގަތުމަށް ފަހު، ޑރ. އަޒްވަރު ވަނީ އެ ކުންފުނީގެ އޮނިގަނޑުގެ އެކި ހަރުފަތްތަކުގައި ގިނަގުނަ މަސައްކަތްތަކެއް ކުރައްވާފައެވެ. އޭގެ ތެރޭގައި ޗީފް އޮޕަރޭޓިންގ އޮފިސަރު(ސީއޯއޯ) ކަމާއި، ސޭލްސް، ބިލިންގ، އަދި ބިޒްނަސް ޑިވެލޮޕްމަންޓް ފަދަ މުހިންމު ޑިޕާޓްމަންޓުތަކުގެ އިސްވެރިޔާކަން ހިމެނެއެވެ. ހަމައެހެންމެ، ސްޓެލްކޯގެ ބޯޑުގެ އެގްޒެކެޓިވް ޑިރެކްޓަރެއްގެ ގޮތުގައްޔާއި، ފިއުލް ސަޕްލައި މޯލްޑިވްސް(އެފްއެސްއެމް) ގެ ނޮން-އެގްޒެކެޓިވް ޑިރެކްޓަރެއްގެ ގޮތުގައި ވެސް އޭނާ ވަނީ ޚިދުމަތްކުރައްވާފައެވެ.
