އދ. ގެ އިކޯސޮކް މެންބަރުކަން ރާއްޖެއަށް ލިބުމަކީ ތާރީޚީ ފަޚުރެއް: ރައީސް
އިކޮނޮމިކް އެންޑް ސޯޝަލް ކައުންސިލް (އިކޯސޮކް)ގެ މެންބަރުކަން 2027 އިން 2029 އަށް ރާއްޖެއަށް ކާމިޔާބުވުމަކީ، މުޅި ދުނިޔެ ދިވެހިންނަށް ކުރާ އިތުބާރު ހާމަކޮށްދޭ ތާރީޚީ މުހިންމު ކާމިޔާބީއެއްކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
މީސްމީޑިއާ މަންސަ 'އެކްސް' މެދުވެރިކުރައްވައި އެމަނިކުފާނު ނެރުއްވި ބަޔާނެއްގައި ފާހަގަކުރެއްވި ގޮތުގައި، މި ފަޚުރުވެރި އިންތިޚާބުން ދައްކައިދެނީ ބައިނަލްއަޤުވާމީ މައިދާނުގައި ރާއްޖޭގެ ބައިވެރިވުމަށް އޮތް ޔަޤީންކަމެވެ. ތަރައްޤީވަމުން އަންނަ ކުދި ޖަޒީރާ ޤައުމަކަށް ވުމާއެކު، މޫސުމީ ނުރައްކާތަކާއި، އިޤްތިޞާދީ ގޮތުން ކުރިމަތިވާ ހުރަސްތަކުގެ އިތުރުން ދެމެހެއްޓެނިވި ތަރައްޤީގެ މުހިންމުކަން އެންމެ ފުރިހަމައަށް އިޙުސާސްކުރެވޭނެ އެއް ބަޔަކީ ދިވެހިންކަން ރައީސް ވަނީ ތަފްޞީލުކޮށްދެއްވާފައެވެ.
މި ކާމިޔާބީއާ އެކު އިކޯސޮކްގެ ތެރެއިން ރާއްޖެއިން އަދާކުރާނެ ދައުރަށް އަލިއަޅުއްވާލައްވަމުން ރައީސް ވިދާޅުވީ، މިއީ ހަމައެކަނި ރާއްޖޭގެ އަޑު އުފުލުމުގެ ބަދަލުގައި، އެހެނިހެން ކުދި ޖަޒީރާ ޤައުމުތަކާއި ތަރައްޤީވަމުން އަންނަ ދައުލަތްތަކުގެ ޙައްޤުގައި ވަކާލާތުކޮށް އެފަރާތްތަކުގެ އުންމީދުތައް ޙަޤީޤަތަކަށް ހެދުމަށް ލިބިގެންދިޔަ ރަނުގެ ފުރުޞަތެއް ކަމަށެވެ.
މީގެ އިތުރުން، ބައިނަލްއަޤުވާމީ މުޖުތަމަޢާ ގުޅިގެން ރާއްޖެއިން މަސައްކަތްކުރާނީ ދެމެހެއްޓެނިވި ތަރައްޤީގެ ލަނޑުދަނޑިތައް ޙާޞިލުކުރުމުގެ ދުވެލި ހަލުވިކުރުމަށް ކަމުގައި އެމަނިކުފާނު ވިދާޅުވިއެވެ. އަދި އޭގެ ނަތީޖާއެއްގެ ގޮތުން، މުޅި ދުނިޔެއަށް އިންސާފުވެރި އަދި ކާރިސާތަކުން އަރައިގަނެވޭނެ ފަދަ ހަރުދަނާ ނިޒާމެއް ބިނާކުރުމަށް ރާއްޖޭގެ ފުރިހަމަ އެއްބާރުލުން ލިބިގެންދާނެކަމުގެ ޔަޤީންކަންވެސް ރައީސް މުޢިއްޒު ވަނީ އަރުވާފައެވެ.
