މެންޓަލް ހޮސްޕިޓަލް މާލެ ސަރަހައްދުގައި އަޅަން ޖެހެނީ މާލެއަށް އެހެން ފަރުވާތައް ޖަމާކޮށްފައިވާތީ: މިނިސްޓަރު
މެންޓަލް ހޮސްޕިޓަލް މާލެ ސަރަހައްދުގައި އަޅަން ޖެހެނީ މާލެއަށް އެހެން ފަރުވާތައް ޖަމާކޮށްފައިވާތީ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެއެވެ.
ގީލާ މިފަދައިން ވިދާޅުވީ މިއަދު ރައްޔިތުންގެ މަޖިލީހުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ކުރެއްވި ސުވާލަށް ޖަވާބު ދެއްވަމުންނެވެ. ކުޑޫ ކުރެއްވި ސުވާލަކީ ނަފްސާނީ ބަލިތަކަށް ހާއްސަ ހޮސްޕިޓަލް ބިނާކުރަން ނިންމާފައި ވަނީ ކޮން ތަނެއްގައިތޯއާއި، އެފަދަ ހޮސްޕިޓަލެއް އެހެން ހޮސްޕިޓަލްތަކާ ވަކިން ހުންނަންޖެހޭ ސަބަބަކީ ކޮބައިތޯއެވެ. އަދި މިފަދަ ހޮސްޕިޓަލެއް މާލެއިން ބޭރުގައި ހުރުމުން ލިބޭނެ ފައިދާއާއި ގެއްލުމާ ގުޅޭގޮތުން އެއްވެސް ދިރާސާއެއް ކުރެވިފައިވާ ނަމަ، އެކަމުގެ ތަފްސީލު ހިއްސާކޮށްދެއްވަށް މެންބަރު އެދިވަޑައިގެންނެވިއެވެ.
ކުޑޫގެ މި ސުވާލުގެ ޖަވާބުގައި ގީލާ ވިދާޅުވީ ނަފްސާނީ ބަލިތަކަށް ހާއްސަ ހޮސްޕިޓަލެއް ބިނާކުރުމަށް ސަރުކާރުން ނިންމާފައި ވަނީ މާލޭ ސަރަހައްދުގައި ކަމަށާއި މި ކަމަށް ބޭނުންވާ ބިން ހުޅުމާލެއިން ހަމަޖައްސާފައިވާ ކަމަށެވެ. އެ ގޮތުން މި މަޝްރޫއުއަށް ބޭނުންވާ 10،000 އަކަފޫޓުގެ ބިމެއް ހަމަޖެހިފައިވާ ކަމަށް ވެސް ވިދާޅުވިއެވެ.
"މިފަދަ ހޮސްޕިޓަލެއް ވަކިން ބިނާކުރަން ޖެހޭ އެންމެ ބޮޑު އެއް ސަބަބަކީ ނަފްސާނީ ބަލިތަކަކީ ވަރަށް ހާއްސަ ފަރުވާތަކެއް ބޭނުންވާ ބަލިތަކަކަށްވެފައި، އެ ފަރުވާ ދިނުމަށް ބޭނުންވާ އިންސާނީ ވަސީލަތްތަކާއި އެކި ފަންނުތަކުގެ ސްޕެޝަލިސްޓުންނަކީ ތަފާތު ތަމްރީނުތަކެއް ލިބިފައިވާ ބަޔަކަށް ވާންޖެހޭތީ. މާލޭ ސަރަހައްދުގައި މި ހޮސްޕިޓަލް އެޅުމަށް ނިންމީ ގިނަ ރިސޯސްތައް މިވަގުތު މާލޭގައި ހުރުމާ އެކު، ބޭނުންވާ ތަފާތު ޓެސްޓުތަކާއި ދޭންޖެހޭ އެހެނިހެން ފަރުވާތައް ޖަމާވެފައި ވަނީ މާލޭ ސަރަހައްދަށް ވާތީ" ގީލާ ވިދާޅުވިއެވެ.
ގީލާ ވިދާޅުވީ 2023ވަނަ އަހަރުން ފެށިގެން 3 އަހަރުތެރޭގައި 70،000އަށް ވުރެ ގިނަ ފަރާތުން ސައިކްރޭޓްރިސްޓުންގެ އެހީތެރިކަން ހޯދާފައިވާ ކަމަށާއި އޭގެ ތެރެއިން 45،000 މީހުން ފަރުވާ ހޯދާފައި ވަނީ މާލޭ ސަރަހައްދުން ކަމަށެވެ.
މީގެ އިތުރުން ގީލާ ވިދާޅުވީ އައިޖިއެމްއެޗްގައި ސެންޓާ ފޯ މެންޓަލް ހެލްތް ކިޔާ މަރުކަޒެއް ވަރަށް މަދު އެނދުތަކަކާއި އެކު ގާއިމް ކުރެވިފައިވާ ކަމަށާއި ރާއްޖޭގައި ނަފްސާނީ ބަލިތަކަށް ފަރުވާ ހޯދާ މީހުންގެ އަދަދަށް ބަލާއިރު، އެ މަރުކަޒަށް މި ”ވޯކްލޯޑް“ ކޭޓާއެއް ނުކުރެވޭކަމަށް ވިދާޅުވި އެވެ. އަދި އަތޮޅުތެރޭގައި ވެސް ހިދުމަތްތައް ފުޅާކުރުމަށް މަސައްކަތް ކުރަމުންދާކަމަށާއި ނަފްސާނީ ބަލިމީހުންނަށް ބޭނުންވާ ހާއްސަ ބޭސްތައް ފޯރުކޮށްދިނުމަށް ވެސް ސަރުކާރުން ސަމާލުކަންދޭކަމަށް ވިދާޅުވިއެވެ.
އޭގެ އިތުރުން ގީލާ ވިދާޅުވީ ފާއިތުވި އަހަރުތަކުގައި ނަފްސާނީ ފަރުވާއަށް ވަކި ހޮސްޕިޓަލެއް ކަނޑައެޅިފައި ނެތުމާއި، އެކަމަށް ދެވިފައިވާ އަހައްމިއްޔަތު ކުޑަވުމުގެ ސަބަބުން އެކަށީގެންވާ ގޮތެއްގައި މި ހިދުމަތް ފޯރުކޮށްދިނުމަށް ގޮންޖެހުން ކުރިމަތިވި ކަމަށެވެ.
