ބްރިކްސްގެ ސަލާމަތީ އޮފިޝަލުންނާ ބައްދަލުކުރައްވައި، ޓެރަރިޒަމާއި ސައިބަރ ސެކިއުރިޓީގެ ދާއިރާއިން އެއްބާރުލުން އިތުރުކުރުމަށް މޯދީ ގޮވާލައްވައިފި
ނިއުދިއްލީ: އިންޑިއާގެ ބޮޑުވަޒީރު ނަރެންދުރަ މޯދީ އަންގާރަ ދުވަހު ބްރިކްސް ގައުމުތަކުގެ ގައުމީ ސަލާމަތާބެހޭ މުޝީރުންނާއި އިސް އޮފިޝަލުންނާ ބައްދަލުކުރައްވައިފިއެވެ. މި ބައްދަލުކުރެއްވުމުގައި، ދުނިޔެއަށް ކުރިމަތިވެފައިވާ ސަލާމަތީ ގޮންޖެހުންތަކާ ކުރިމަތިލުމުގައި ބްރިކްސްގެ ދައުރު ފުޅާވަމުން އަންނަކަން އެމަނިކުފާނު ވަނީ ފާހަގަކުރައްވާފައެވެ.
އިންޑިއާގެ ބޮޑުވަޒީރުގެ އޮފީހުން ނެރުނު ބަޔާނެއްގައިވާ ގޮތުން، ޓެރަރިޒަމާއި ސައިބަރ ސެކިއުރިޓީގެ އިތުރުން އަލަށް އުފެދެމުން އަންނަ ޓެކްނޮލޮޖީތަކާ ގުޅޭގޮތުން ބްރިކްސްގެ މެމްބަރު ގައުމުތަކުގެ މެދުގައި މިހާރަށްވުރެ ގާތް ގުޅުމެއް ބޭއްވުމުގެ މުހިންމުކަމުގެ މައްޗަށް މޯދީ ވަނީ އަލިއަޅުއްވާލައްވާފައެވެ.
ޖިއޯޕޮލިޓިކަލް އަދި ޓެކްނޮލޮޖީގެ ގޮންޖެހުންތައް ބަދަލުވަމުންދާ މި ދަނޑިވަޅުގައި، މުހިންމު ސަލާމަތީ މައްސަލަތަކުގައި ގުޅިގެން މަސައްކަތްކުރުން ހަރުދަނާކުރުމުގައި ބްރިކްސް އިން މުހިންމު ދައުރެއް އަދާކުރަންޖެހޭ ކަމަށް ވެސް ބޮޑުވަޒީރު ވިދާޅުވިއެވެ.
މީގެ އިތުރުން، ކުރިއަށް އޮތް ތަނުގައި އިންޑިއާއިން ބްރިކްސްގެ ރިޔާސަތާ ހަވާލުވާއިރު އިސްކަންދޭނެ ކަންކަން މޯދީ ވަނީ ހާމަކުރައްވާފައެވެ. އެގޮތުން، މެމްބަރު ގައުމުތަކުގެ މެދުގައި އަމަލީ ގޮތުން އެއްބާރުލުން ކުރިއެރުވުމަށާއި، ގްލޯބަލް ސައުތުގެ މަސްލަހަތުތައް ހިމާޔަތްކުރުމަށް ނިއުދިއްލީން ހާއްސަ ސަމާލުކަމެއް ދޭނެކަމަށް ވިދާޅުވިއެވެ.
މި ބައްދަލުކުރެއްވުމަށްފަހު އެކްސްގައި ކުރެއްވި ޕޯސްޓެއްގައި މޯދީ ވިދާޅުވީ، "އިންޑިއާގެ ރިޔާސަތުގައި އަމަލީ އެއްބާރުލުން ކުރިއަރުވައި، ގްލޯބަލް ސައުތުގެ އިސްކަންދޭ ކަންކަމަށް ތާއީދުކޮށް، އަދި މިއަށްވުރެ ރައްކާތެރި، އަމާން އަދި އެންމެން ޝާމިލުވާ ދުނިޔެއެއް ބިނާކުރުމަށް މަސައްކަތްކުރާނެ" ކަމަށެވެ.
ބްރެޒިލް، ރަޝިއާ، އިންޑިއާ، ޗައިނާ އަދި ދެކުނު އެފްރިކާގެ އިތުރުން އަލަށް ގުޅުނު މެމްބަރުން ހިމެނޭ ބްރިކްސް ޖަމާއަތުން، ދުނިޔޭގެ ހިންގުމާއި، އިގްތިސާދީ ގުޅުމާއި، ސަލާމަތީ މައްސަލަތަކުގައި އެ ޖަމާއަތުގެ ނުފޫޒު ފުޅާކުރުމަށް މަސައްކަތްކުރަމުންދާ ދަނޑިވަޅެއްގައި މިފަދަ މަޝްވަރާތަކެއް ބޭއްވުން ވެގެންދަނީ ވަރަށް މުހިންމު ކަމަކަށެވެ.
އާންމު ގޮންޖެހުންތަކާ ކުރިމަތިލުމަށާއި ބައިނަލްއަގުވާމީ ސުލްހައާއި ސަލާމަތަށް މުހިންމު ދާއިރާތަކުން ގުޅުން ބަދަހިކުރުމަށް ބްރިކްސްގެ ބައިވެރިންނާއެކު މަސައްކަތްކުރުމަށް އިންޑިއާއިން އޮތީ ތައްޔާރަށްކަމުގެ ޔަގީންކަން މޯދީ ވަނީ އާކުރައްވާފައެވެ.
