އަމިއްލަ ފަރާތަކުން އުފެއްދި ފުރަތަމަ ރޮކެޓާއެކު އިންޑިއާއިން އެމެރިކާ އަދި ޗައިނާއާ އެއް ސަފަކަށް ޖެހިލައިފި

އިންޑިއާގެ އަމިއްލަ ކުންފުންޏަކުން އުފެއްދި ފުރަތަމަ އޯބިޓަލް ރޮކެޓް ކާމިޔާބުކަމާއެކު ޖައްވަށް ފޮނުވާލައިފިއެވެ. މިއީ އެ ޤައުމުގެ ވިޔަފާރި އުޞޫލުން ކުރިއަށްގެންދާ ޖައްވީ ސިނާޢަތަށް ލިބުނު ވަރަށް ބޮޑު ކުރިއެރުމެކެވެ. އަދި ބައިނަލްއަޤްވާމީ ޖައްވީ މާކެޓުގައި އިންޑިއާގެ ޙިއްޞާ ފުޅާކުރުމަށް ކުރާ މަސައްކަތަށް ލިބުނު ބޮޑު ކާމިޔާބީއެކެވެ.

"ވިކްރަމް-1" ގެ ނަން ދީފައިވާ މި ރޮކެޓް އުދުއްސާލާފައިވަނީ ހޮނިހިރު ދުވަހުގެ މެންދުރު 12:05 ގައި، އިންޑިއާގެ އިރުދެކުނު އައްސޭރީގައި އޮންނަ ސްރީހަރިކޯޓާގެ ސަތީޝް ދަވަން ސްޕޭސް ސެންޓަރުންނެވެ. ފުރަތަމަ ރޭވިފައި އޮތީ ހެނދުނު 11:30 ގައި މި ރޮކެޓް އުދުއްސާލުމަށެވެ. ނަމަވެސް ފަހު ވަގުތު ދިމާވި ކަމަކާ ގުޅިގެން ކުޑަކޮށް ލަސްކޮށްލަން ޖެހުނީއެވެ.

އުދުއްސާލިތާ 15 މިނެޓުގެ ތެރޭގައި މި ރޮކެޓް ވަނީ، ސެޓެލައިޓާއި ސައިންޓިފިކް އާލާތްތައް ހިމެނޭގޮތަށް 6 ޕޭލޯޑެއް، ދުނިޔޭގެ 450 ކިލޯމީޓަރު މަތީގެ އޯބިޓަށް ކާމިޔާބުކަމާއެކު ވާސިލުކޮށްދީފައެވެ. ސާންސްކްރިތް ބަހުން "އައުން" މި މާނަދޭ، "މިޝަން އާގަމަން" ގެ ނަމުން ނަންދީފައިވާ މި ދަތުރާއެކު، އިންޑިއާ ވެފައިވަނީ އަމިއްލަ ކުންފުންޏަކުން އޯބިޓަލް ރޮކެޓެއް އުފައްދައި ކާމިޔާބުކަމާއެކު ޖައްވަށް ފޮނުވި ތިންވަނަ ޤައުމަށެވެ. މީގެ ކުރިން މިކަން ހާސިލުކޮށްފައިވަނީ ހަމައެކަނި އެމެރިކާ އަދި ޗައިނާއިންނެވެ. މި ރޮކެޓް ފަރުމާކޮށްފައިވަނީ ހައިދަރުއާބާދުގެ ކުންފުންޏެއް ކަމަށްވާ ސްކައިރޫޓް އެރޯސްޕޭސް އިންނެވެ.

މިއީ އިންޑިއާގެ ޖައްވީ ސިނާޢަތަށް އައި ވަރަށް ބޮޑު ބަދަލެކެވެ. އެތައް ދަހަރެއް ވަންދެން އެ ޤައުމުގައި ރޮކެޓް އުދުއްސުމުގެ ހުރިހާ ކަމެއް ކުރަމުން އައީ ސަރުކާރުގެ ކުންފުނި ކަމަށްވާ އިންޑިއަން ސްޕޭސް ރިސާޗް އޯގަނައިޒޭޝަން (އިސްރޯ) އިންނެވެ. އޭރު އަމިއްލަ ކުންފުނިތަކުގެ ދައުރަކީ ހަމައެކަނި ބައެއް ސާމާނު ފޯރުކޮށްދިނުމެވެ. ނަމަވެސް 2020 ވަނަ އަހަރު ސަރުކާރުން ވަނީ އަމިއްލަ ފަރާތްތަކަށް މި ދާއިރާއިން އިންވެސްޓްކުރުމުގެ ފުރުސަތު ހުޅުވާލައި، "އިން-ސްޕޭސް" ޤާއިމުކޮށްފައެވެ. މީގެ ބޭނުމަކީ އިސްރޯގެ ލޯންޗް ސައިޓްތަކާއި، ޓެސްޓުކުރާ ވަސީލަތްތަކާއި ފަންނީ ތަޖުރިބާ އަމިއްލަ ސްޓާޓްއަޕްތަކަށް ފޯރުކޮށްދިނުމެވެ. އިންޑިއާ ސަރުކާރުގެ އަމާޒަކީ 2033 ވަނަ އަހަރު އަންނަންވާއިރަށް އެ ޤައުމުގެ ޖައްވީ އިޤްތިޞާދު 8 ބިލިއަން ޑޮލަރުން 44 ބިލިއަން ޑޮލަރަށް އިތުރުކުރުމެވެ. މިކަމުގައި އަމިއްލަ ކުންފުނިތަކުން އިސް ދައުރެއް އަދާކުރާނެކަމަށް ބެލެވެއެވެ.

އިން-ސްޕޭސްގެ ޗެއާމަން ޕަވަން ކުމާރު ގޮއެންކާ ވިދާޅުވި ގޮތުގައި މި ދަތުރު ވަނީ އުންމީދުކުރި ވަރަށްވުރެ މާ ފުރިހަމަ ކާމިޔާބީއެއް ހޯދާފައެވެ. ޕްރެސް ޓްރަސްޓް އޮފް އިންޑިއާ އަށް މަޢުލޫމާތު ދެއްވަމުން އޭނާ ވިދާޅުވީ، "މިޝަންގެ މައިގަނޑު އަމާޒަކަށް އޮތީ ހަމައެކަނި ޓަވަރުން ނެއްޓިގެން ދިއުން. ނަމަވެސް 450 ކިލޯމީޓަރުގެ އޯބިޓަށް ގޮސް، ހުރިހާ މަސައްކަތެއް ވަނީ ކާމިޔާބުކަމާއެކު ނިންމާލާފައި. މިއީ ފުރަތަމަ އުދުއްސާލުމަކާ ބަލާއިރު އުންމީދުކުރި ވަރަށްވުރެ މާ ބޮޑު ކާމިޔާބީއެއް،" ކަމަށެވެ.

ވިކްރަމް-1 ގައި އިންޑިއާ އަދި ބައިނަލްއަޤްވާމީ ޖަމާޢަތްތަކުގެ 6 ޓެކްނޮލޮޖީ ޑެމޮންސްޓްރޭޝަން ޕޭލޯޑް ގެންގޮސްފައިވެއެވެ. އޭގެ ތެރޭގައި ސްކައިރޫޓްގެ 'ސްކޯޕް' ސެޓެލައިޓާއި، ގްރާހާ ސްޕޭސްގެ 'ސޮލާރަސް' މިޝަން އާއި، ޖައްވީ ކުނި ނެގުމަށް އުފައްދާފައިވާ ރޮބޮޓިކް ޓެކްނޮލޮޖީ ޓެސްޓުކުރާ ކޮސްމޮސާވް ސްޕޭސްގެ 'އެމްބްރޭސް' އެކްސްޕެރިމެންޓްގެ އިތުރުން ޖަރުމަނުގެ ޑީކިއުބްޑް ކުންފުނީގެ ދެ ޕޭލޯޑް ހިމެނެއެވެ.

މީގެ އިތުރުން ރަމްޒީ ގޮތުން ގެންދިޔަ ތަކެތީގެ ތެރޭގައި، ލެބޯޓަރީގައި އުފައްދާފައިވާ ޖަވާހިރުން ނެލުމެއްގެ ސިފައިގައި ހަދާފައިވާ އާޓްވޯކެއް ކަމަށްވާ 'ކޮސްމިކް ބްލޫމް' އާއި، އިންޑިއާގެ ޖައްވީ ދިރާސާތަކުގެ ބައްޕަ (އަދި ރޮކެޓަށް ނަން ދެވިފައިވާ) ވިކްރަމް ސާރާބާއީ އާއި ސަރ ސީ.ވީ ރާމަން އަދި އޭ.ޕީ.ޖޭ އަބްދުލްކަލާމްގެ ޝަރަފުގައި ހަދާފައިވާ ކުޑަ ރަނުގެ ރޮކެޓެއް ހިމެނެއެވެ. ހަމައެހެންމެ، ބޮޑުވަޒީރު ނަރެންދުރަ މޯދީގެ އަތްޕުޅުން ލިޔުއްވާފައިވާ "ވަންދޭ މާތަރަމް" (މާނައަކީ: މަންމާއެވެ، އަހަރެން އިޙްތިރާމާއެކު ސަލާމް ކުރަމެވެ) ލިޔެފައިވާ ޕޯސްޓްކާޑެއްވެސް ގެންގޮސްފައިވެއެވެ.

މިއީ 2022 ވަނަ އަހަރު ސްކައިރޫޓުން ފުރިހަމަކުރި 'ވިކްރަމް-އެސް' މިޝަނަށްވުރެ އެތައް ގުނައެއް ކުރިއަރާފައިވާ ދަތުރެކެވެ. ވިކްރަމް-އެސް އަކީ ސަބްއޯބިޓަލް މިޝަނެކެވެ. އޭގެ މާނައަކީ އެ ރޮކެޓް ޖައްވުގެ އިން ފަހަނައަޅައި ދިއުމަށްފަހު ވަގުތުން އަނބުރާ ދުނިޔެއަށް ވެއްޓުމެވެ. ނަމަވެސް ވިކްރަމް-1 އަކީ ސެޓެލައިޓްތައް އޯބިޓުގައި ދެމިހުންނާނެހެން ބެހެއްޓޭ ވަރުގެ ބާރުމިނެއްގައި ދަތުރުކުރުމުގެ ޤާބިލުކަން ލިބިފައިވާ ރޮކެޓެކެވެ.

ސްކައިރޫޓްގެ ދިގު ރާސްތާގެ އަމާޒަކީ، ގިނަ ބަޔަކު ހިއްސާވާ ބޮޑެތި ރޮކެޓްތަކުން ޖާގަ ހޯދަން މަޑުކުރުމުގެ ބަދަލުގައި، ކުދި ސެޓެލައިޓްތަކަށް ޚާއްޞަކޮށްގެން ވަކިވަކިން ދަތުރުތައް ހަމަޖައްސައިދިނުމެވެ. އެ ކުންފުނިން މި ޚިދުމަތް ސިފަކުރަނީ ޖައްވަށްދާ "ކެބް ސަރވިސް" އެއްގެ ގޮތުގައެވެ. ސްކައިރޫޓްގެ ކޯ-ފައުންޑަރ އަދި ޗީފް އެގްޒެކެޓިވް ޕަވަން ކުމާރު ޗަންދަނާ މިކަން ސިފަކުރެއްވީ "ކޯޗަކަށް އެރުމުގެ ބަދަލުގައި ޓެކްސީއެއް ބުކްކުރުން" ފަދަ ކަމެއްގެ ގޮތުގައެވެ. ސްޕޭސް ޑޮޓް ކޮމް އަށް މަޢުލޫމާތު ދެއްވަމުން އޭނާ އިތުރަށް ވިދާޅުވީ ވިޔަފާރި އުޞޫލުން މަސައްކަތް ފެށުމުން މަހަކު އެއް ރޮކެޓް އުފެއްދުމަށް އުންމީދުކުރާ ކަމަށެވެ.

ސްޕޭސްއެކްސްގެ ފެލްކަން 9 ފަދަ، އެއްފަހަރާ އެތައް ދަރަޖަނަ ސެޓެލައިޓެއް ގެންދެވޭ ބޮޑެތި ރޮކެޓްތަކާ ސީދާ ވާދަކުރުމުގެ ބަދަލުގައި، ވިކްރަމް-1 ފަރުމާކޮށްފައިވަނީ ކަސްޓަމަރުން ބޭނުންވާ ވަކި އޯބިޓްތަކަކަށް 350 ކިލޯއާ ހަމައަށް ޕޭލޯޑް ގެންގޮސްދިނުމަށެވެ. ކާބަން ކޮމްޕޮސިޓް ބޭނުންކޮށްގެން ބަރުދަން ލުއިވާނެހެން އުފައްދާފައިވާ މި ރޮކެޓުގައި ބޭނުންކޮށްފައިވަނީ އެ ކުންފުނިން އަމިއްލައަށް އުފައްދާފައިވާ 'ކަލާމް-100' އިންޖީނެވެ. މިއީ 3ޑީ ޕްރިންޓިންގ ބޭނުންކޮށްގެން ހަދާފައިވާ ސޮލިޑް ރޮކެޓް މޯޓަރެކެވެ. މީގެ ސަބަބުން ޚަރަދު ކުޑަވެ، އުފައްދަން ނަގާ ވަގުތު ކުރުވެފައިވާކަމަށް އެ ކުންފުނިން ބުނެއެވެ. ސްޕޭސްކިޑްޒް އިންޑިއާގެ ފައުންޑަރ އަދި ޗީފް އެގްޒެކެޓިވް ސްރީމަތީ ކޭސަން 'ދަ ވީކް' އަށް މަޢުލޫމާތު ދެއްވަމުން ވިދާޅުވި ގޮތުގައި، މި މިޝަންގެ ސަބަބުން އިންޑިއާގެ އަމިއްލަ ޖައްވީ ސިނާޢަތުން ތަރައްޤީކޮށްފައިވާ ޒަމާނީ އޭވިއޮނިކްސް، އޮޓޮނޮމަސް ފްލައިޓް ސޮފްޓްވެއަރ، ނެވިގޭޝަން ސިސްޓަމްތައް އަދި މިޝަން މެނޭޖްމަންޓް ޓެކްނޮލޮޖީތަކުގެ ފުރިހަމަކަން ވަނީ ދައްކުވައިދީފައެވެ.

ރޮކެޓް އުދުއްސާލުމާއެކު، ބޮޑުވަޒީރު މޯދީ ވަނީ ޗަންދަނާ އަދި ކޯ-ފައުންޑަރ ނާގަ ބަރަތު ޑާކާއަށް ގުޅުއްވައި މަރުޙަބާ ވިދާޅުވެފައެވެ. އެންޑީޓީވީ އިން ރިޕޯޓްކޮށްފައިވާ ގޮތުގައި މޯދީ ވިދާޅުވީ، "ތިޔަ ބޭފުޅުން ވަނީ ޖައްވީ ދާއިރާއިން އިންޑިއާ ކުރާ އުންމީދުތައް އިންދައިދީފައި. އަދި ޒުވާނުންގެ ހުވަފެންތަކަށް މޫލާނެ މަގު ތަނަވަސްކޮށްދީފައި،" ކަމަށެވެ. އަދި ސްކައިރޫޓްގެ މުވައްޒަފުންގެ އެވްރެޖް އުމުރަކީ 28 އަހަރުކަން އެނގިވަޑައިގަތުމުން މޯދީ ވިދާޅުވީ، އެ ޒުވާނުން ވަނީ އިންޑިއާގެ ޒުވާނުންނަށް އިތުބާރުކޮށްފިނަމަ މުޢުޖިޒާތްތައް ގެނެވިދާނެކަން ސާބިތުކޮށްދީފައި ކަމަށެވެ.

މި ފޯނު ކޯލުގެ ތެރެއިން ޗަންދަނާ ވަނީ މޯދީ ލިޔުއްވި "ވަންދޭ މާތަރަމް" ޕޯސްޓްކާޑު މިހާރު ޖައްވުގައިވާކަން ފާހަގަކުރައްވާފައެވެ. މޯދީ ވިދާޅުވީ އެ ޢިބާރާތް ޚިޔާރުކުރެއްވީ 2026 ވަނަ އަހަރަކީ އެ ޤައުމީ ލަވައަށް 150 އަހަރު ފުރޭ އަހަރު ކަމަށް ވުމުންނާއި، އެ ލަވައިން އެތައް ޖީލެއްގެ ޒުވާނުންނަށް ހިތްވަރު ލިބިފައިވާތީ ކަމަށެވެ.

މިޝަން އާގަމަން އަކީ ވިޔަފާރި އުޞޫލުން ޚިދުމަތް ދޭން ފެށުމުގެ ކުރިން ވިކްރަމް-1 ޓެސްޓުކުރުމަށް ރާވާފައިވާ 3 ދަތުރުގެ ތެރެއިން ފުރަތަމަ ދަތުރެވެ. ސްކައިރޫޓުން ބުނާ ގޮތުގައި މި ދަތުރުން ލިބުނު ޑޭޓާ ބޭނުންކުރާނީ ރޮކެޓްގެ ޕްރޮޕަލްޝަން، ގައިޑެންސް، ނެވިގޭޝަން އަދި ޓެލެމެޓްރީ ސިސްޓަމްތައް އިތުރަށް ފުރިހަމަކޮށް ޔަޤީންކުރުމަށެވެ.