ފާމަސިސްޓުން ތަމްރީނުކުރުމަށް ސްޓޭޓްފާމާއާއި ވިލާ ކޮލެޖުން ގުޅިގެން މަސައްކަތްކުރަން ނިންމައިފި

ފާމަސިސްޓުން ބިނާކޮށް، އެ ދާއިރާއިން ތައުލީމު ހާސިލުކުރާ ދަރިވަރުންނަށް ފަހި ފުރުސަތުތަކެއް ހޯދައިދިނުމުގެ ބޭނުމުގައި ސްޓޭޓް ފާމަސޫޓިކަލް އެންޑް މެޑިކަލް ސަޕްލައިސް ކޯޕަރޭޝަން (ސްޓޭޓް ފާމާ)ގެ އިސްވެރިން ވިލާ ކޮލެޖާއެކު މުހިންމު މަޝްވަރާތަކެއް ކުރިއަށް ގެންގޮސްފިއެވެ.

ސްޓޭޓް ފާމާއިން ހާމަކޮށްފައިވާ ގޮތުގައި، މި ބައްދަލުވުމުގެ އެންމެ ބޮޑު އަމާޒަކީ ބޭހުގެ ދާއިރާއިން މަތީ ތައުލީމު ހާސިލުކުރަން ބޭނުންވާ ޒުވާނުންގެ ނިސްބަތް އިތުރުކުރުމަށް ދެމެހެއްޓެނިވި ގޮތެއްގައި ކުރެވެން ހުރި މަސައްކަތްތައް ދެނެގަތުމެވެ. މީގެ އިތުރުން، ވިލާ ކޮލެޖުން ކިޔެވުން ފުރިހަމަކުރާ ދަރިވަރުންނަށް ސްޓޭޓް ފާމާގެ ތެރެއިން ވަޒީފާގެ ފުރުސަތުތައް ފަހިކޮށްދީ، އަމަލީ މައިދާނަށް ނުކުތުމަށް މަގުފަހިކޮށްދިނުމާ ގުޅޭގޮތުން ދެ މުއައްސަސާގެ ދެމެދުގައި ވަނީ ފުޅާ ދާއިރާއެއްގައި ވާހަކަދެކެވިފައެވެ.

މުޅިން އަލަށް ދާއިރާއަށް ނުކުންނަ ކުދިންގެ އިތުރުން، މިހާރުވެސް ފާމަސީތަކާއި ހަސްފަތާލުތަކުގައި މަސައްކަތްކުރަމުންދާ ފަންނީ މުވައްޒަފުންނަށް އަމާޒުކޮށްގެން ރިފްރެޝަރ ކޯސްތަކެއް ފަރުމާކުރުމަށް ވެސް މި ބައްދަލުވުމުގައި ވަނީ ނިންމާފައެވެ. މިގޮތުން ވިލާ ކޮލެޖުގެ އެހީތެރިކަމާ އެކު ކުރިއަށްގެންދާ މި ޕްރޮގްރާމްތަކުގެ ސަބަބުން ހިދުމަތުގެ ފެންވަރު ރަނގަޅުވެގެންދާނެކަމަށް އެ ކުންފުނިން ދެކެއެވެ.

ބޭސްވެރިކަމުގެ ރޮނގުން މީހުން ބިނާކުރުމަށް ސްޓޭޓް ފާމާއިން ހާއްސަ އިސްކަމެއް ދެމުން އަންނައިރު، ފާއިތުވި ޖުލައި މަހުގެ ތެރޭގައި އެ ކުންފުނިން ވަނީ ދިވެހިރާއްޖޭގެ ގައުމީ ޔުނިވާސިޓީ (އެމް.އެން.ޔޫ)އާ އެކު ވެސް މިފަދަ މަޝްވަރާތަކެއް ބާއްވާފައެވެ. ހަމައެއާ އެކު، ރާއްޖެއަށް ބޭނުންވާ ޒަރޫރީ ބޭހާއި ސިއްހީ އާލާތްތައް މެދުކެނޑުމެއްނެތި ފޯރުކޮށްދިނުމުގެ ނިޒާމު ހަރުދަނާކުރުމަށްޓަކައި، ވިލާތުގެ ބޮޑު ކުންފުންޏެއް ކަމަށްވާ އެސްޓްރަޒެނިކާގެ އިސް މަންދޫބުންނާ އެކު މި ހިނގާ އޮގަސްޓު މަހުގެ 5ވަނަ ދުވަހުވެސް ސްޓޭޓް ފާމާއިން ވަނީ ބައްދަލުވުންތަކެއް ކުރިއަށް ގެންގޮސްފައެވެ.