އިންޑިއާގެ އޭއައި އިންގިލާބު: ޑިޖިޓަލް ބާރަކުން އޭއައި ގަވަރނަންސްގެ ދުނިޔޭގެ މޭސްތިރިއަކަށް

އާޓިފިޝަލް އިންޓެލިޖެންސް (އޭއައި) ގެ ސަބަބުން އިގުތިސާދުތަކާއި ސަރުކާރު ހިންގުމުގެ ނިޒާމުތަކުގެ އިތުރުން ދުނިޔޭގެ ނުފޫޒުތަކަށް ބޮޑެތި ބަދަލުތަކެއް އަންނަމުންދާއިރު، މި ރޮނގުން އެންމެ ނުފޫޒުގަދަ އެއް ގައުމުގެ ގޮތުގައި އިންޑިއާ ދަނީ ކުރިއަރަމުންނެވެ. ދުނިޔޭގެ ސޮފްޓްވެއަރ ހަބުގެ ގޮތުގައި ކުރިން މަޝްހޫރުވެފައިވާ އިންޑިއާއިން މިހާރު ދަނީ، އީޖާދީ އުފެއްދުންތެރިކަމާއި، އަގުހެޔޮކަމާއި، ޑިމޮކްރެޓިކް ހަމަތައް ގުޅުވާލައިގެން އޭއައިގެ ދާއިރާގެ ލީޑަރެއްގެ ގޮތުގައި އެ ގައުމު ތަމްސީލުކުރަމުންނެވެ.

މި ކުރިއެރުމުގެ އެންމެ މުހިންމު އެއް ބާރަކީ 10،372 ކްރޯޑު ރުޕީސްގެ ބަޖެޓަކާއެކު ފަށާފައިވާ 'އިންޑިއާ އޭއައި މިޝަން' އެވެ. މީގެ އަމާޒަކީ ކޮމްޕިއުޓިންގ އިންފްރާސްޓްރަކްޗަރ އާއި ދިރާސާތަކާއި ސްޓާޓްއަޕްތައް އަދި އިންސާނީ ވަސީލަތްތައް ތަރައްގީކުރުން ހިމެނޭހެން ފުރިހަމަ އޭއައި އީކޯސިސްޓަމެއް ބިނާކުރުމެވެ. މަދު ކުންފުނިތަކެއްގެ އަތްމައްޗަށް އޭއައިގެ ވަސީލަތްތައް ދޫކޮށްލާފައިވާ ގައުމުތަކާ ޚިލާފަށް، އިންޑިއާއިން ދަނީ 38،000 އަށްވުރެ ގިނަ ޖީޕީޔޫ އެކުލެވޭ ގޮތަށް އެންމެންނަށް ހިއްސާކުރެވޭ ކޮމްޕިއުޓިންގ ވަސީލަތްތަކެއް ގާއިމުކުރަމުންނެވެ. މީގެ ސަބަބުން ސްޓާޓްއަޕްތަކަށާއި ދިރާސާކުރާ ފަރާތްތަކުގެ އިތުރުން ދަރިވަރުންނަށް ވެސް ހެޔޮ އަގެއްގައި ޒަމާނީ އޭއައި އިންފްރާސްޓްރަކްޗަރ ބޭނުންކުރުމުގެ ފުރުސަތު ލިބިގެންދާނެއެވެ.

އިންޑިއާގެ އަނެއް ބާރަކީ އެ ގައުމުގެ ހުނަރުވެރިންނެވެ. ސްޓޭންފޯޑް ޔުނިވަރސިޓީގެ 2025 ވަނަ އަހަރުގެ 'ގްލޯބަލް އޭއައި ވައިބްރަންސީ ރޭންކިންގ' ގައި އެމެރިކާއާއި ޗައިނާއަށްފަހު އިންޑިއާ އޮތީ ތިންވަނައިގައެވެ. އޭއައި ދާއިރާއިން ހުނަރުވެރިން ހޯދުމުގައި ދުނިޔޭގެ އެންމެ ކުރީގައި އިންޑިއާ އޮތްއިރު، އެ ގައުމުގެ އޭއައި ހުނަރުގެ ފެންވަރު ދުނިޔޭގެ އެވްރެޖަށްވުރެ 2.5 ގުނަ މަތީގައި އުޅެއެވެ. އަދި ވިޔަފާރި ކުންފުނިތަކުގެ 87 އިންސައްތައިން މިހާރުވެސް އޭއައިގެ ޚިދުމަތްތައް ބޭނުންކުރަން ފަށާފައިވާއިރު، 2032 ވަނަ އަހަރާ ހަމައަށް އޭއައި މާކެޓުގެ އަގު 131.31 ބިލިއަން ޑޮލަރަށް އަރާނެކަމަށް ލަފާކުރެވެއެވެ. މިއާއެކު އިންޑިއާ ވެގެންދަނީ ދުނިޔޭގެ އޭއައި ކުރިއެރުމުގެ މައިގަނޑު އެއް ބާރަށެވެ.

އިންޑިއާގެ ޚާރިޖީ ސިޔާސަތުގައި ވެސް އޭއައި ވަނީ މުހިންމު ދައުރެއް އަދާކުރަން ފަށާފައެވެ. ބޮޑުވަޒީރު ނަރެންދުރަ މޯދީ ފްރާންސަށް ކުރެއްވި ދަތުރުފުޅާއި ޖީ7 ސަމިޓުގެ ބައްދަލުވުންތަކުގައި، އީޖާދީ އުފެއްދުންތަކާއި، ޑިޖިޓަލް އިންފްރާސްޓްރަކްޗަރ އަދި ޒިންމާދާރު ޓެކްނޮލޮޖީއާ ގުޅޭގޮތުން ކުރެވުނު މަޝްވަރާތަކުގައި އޭއައިއަށް ޚާއްސަ ސަމާލުކަމެއް ދެވިފައިވެއެވެ. 'ބާރަތު އިނޮވޭޓްސް 2026' އިވެންޓުގައި އޭއައި، ފިންޓެކް، ސިއްހީ ދާއިރާ، ޖައްވީ ހޯދުންތައް އަދި ޑީޕް ޓެކްނޮލޮޖީގެ ރޮނގުން އިންޑިއާގެ ގާބިލުކަން ދައްކާލާފައިވާއިރު، މިއީ ބައިނަލްއަގުވާމީ މައިދާނުގައި އެ ގައުމުގެ ނުފޫޒު އިތުރުވަމުންދާކަން ސާބިތުކޮށްދިން ކަމެކެވެ.

އޭއައި ރެގިއުލޭޓްކުރުމުގައި އިންޑިއާއިން ގެންގުޅޭ ސިޔާސަތު އެހެން ގައުމުތަކާ ތަފާތެވެ. ހަރުކަށި ގަވާއިދުތަކެއް ހެދުމުގެ ބަދަލުގައި، އިންޑިއާއިން މަސައްކަތްކުރަނީ އީޖާދީ އުފެއްދުންތަކަށް ހިތްވަރުދޭ ފަދަ ހަމަހަމަ އޮނިގަނޑެއް ގާއިމުކުރުމަށެވެ. ހަމައެއާއެކު ޕްރައިވެސީ، ބައިސްކަން، ދޮގު މައުލޫމާތު، ސައިބަރ ސެކިއުރިޓީ އަދި ޑިޖިޓަލް ސިޔާދަތާ ގުޅޭ ކަންބޮޑުވުންތަކަށް ވެސް މި އޮނިގަނޑުގެ ތެރެއިން ހައްލު ހޯދައިދެއެވެ. މި އަމަލީ ނިޒާމަށް ތަރައްގީވެފައިވާ ގައުމުތަކާއި ކުރިއަރަމުން އަންނަ ގައުމުތަކުގެ ސަމާލުކަން ވެސް ދަނީ ލިބެމުންނެވެ. އިންޑިއާގެ ޑިޖިޓަލް ޕަބްލިކް އިންފްރާސްޓްރަކްޗަރ (ޑީޕީއައި) ކަމަށްވާ އާދާރު، ޔޫޕީއައި، ޑިޖިލޮކަރ އަދި ބާޝިނީ ފަދަ ވަސީލަތްތަކަކީ އޭއައި މެދުވެރިކޮށް އާންމު ޚިދުމަތްތައް ފޯރުކޮށްދިނުމުގެ ވަރުގަދަ ބިންގަލެކެވެ. މި ޕްލެޓްފޯމްތަކަކީ މިހާރު ފުޅާދާއިރާއެއްގައި އަދި ހެޔޮ އަގެއްގައި ޑިޖިޓަލް ގަވަރނަންސް ހިންގުމުގެ ދުނިޔޭގެ ނަމޫނާތަކެކެވެ.

އިންޑިއާގެ އޭއައި ކުރިއެރުމަކީ ގަލްފުގެ ގައުމުތަކަށް ވެސް ވަރަށް މުހިންމު ކަމެކެވެ. ޔޫއޭއީ އަދި ސައުދީ އަރަބިއްޔާ ފަދަ ގައުމުތަކުން އޭއައި އާއި ޑިޖިޓަލް އިންފްރާސްޓްރަކްޗަރއަށް ބޮޑެތި އިންވެސްޓްމަންޓްތަކެއް ކުރަމުންދާއިރު، އިންޑިއާގެ ޓެކްނޮލޮޖީގެ ހުނަރުވެރިންނާއި، ޑިޖިޓަލް ޕްލެޓްފޯމްތަކުގެ އިތުރުން އީޖާދީ އުފެއްދުންތަކުގެ އެހީތެރިކަން އެ ގައުމުތަކަށް ލިބިގެންދާނެއެވެ. އޭއައި ދިރާސާތަކާއި، ޑޭޓާ ސެންޓަރުތަކާއި، ފިންޓެކް، ސިއްހީ ދާއިރާ، ސްމާޓް ސިޓީތައް އަދި ލޭންގުއޭޖް ޓެކްނޮލޮޖީގެ ދާއިރާއިން ގާއިމުކުރެވޭ ގުޅުންތައް ވެގެންދާނީ އިންޑިއާއާއި ގަލްފުގެ ގުޅުމުގެ އާ ތަނބަކަށެވެ. އޭއައިގެ ސަބަބުން ދުނިޔޭގެ އިގުތިސާދުގެ ސިފަ ބަދަލުވަމުންދާއިރު، އިންޑިއާ މިހާރު ފެންނަމުންދަނީ ހަމައެކަނި ޓެކްނޮލޮޖީ ބޭނުންކުރާ ގައުމެއްގެ ގޮތުގައެއް ނޫނެވެ. އޭގެ ބަދަލުގައި އީޖާދީ އުފެއްދުންތެރިކަމާއި، ޝާމިލުވުމާއި އަދި ޒިންމާދާރު އުސޫލުތަކުގެ ތެރެއިން އޭއައިގެ މުސްތަގުބަލު ބައްޓަންކުރުމަށް އެހީތެރިވެދޭ ގައުމެއްގެ ގޮތުގައެވެ.