ފަލަސްޠީނުގެ ދިފާޢުގައި ކުރާ މަސައްކަތްތައް ވަރުގަދަކުރަންޖެހޭ: ޚާރިޖީ ވަޒީރު
އިސްރާއީލުން ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓުވައި، ފަލަސްޠީނުގެ މައްސަލައަށް ދާއިމީ ޙައްލެއް ހޯދުމަށް އިސްލާމީ ޤައުމުތަކުން ކުރަމުންދާ މަސައްކަތްތައް އިތުރަށް ހަރުދަނާކުރުމަށް ދިވެހިރާއްޖޭގެ ޚާރިޖީ ވަޒީރު އިރުތިޝާމް އާދަމް ގޮވާލައްވައިފިއެވެ.
ސަޢޫދީ ޢަރަބިއްޔާގެ ޖިއްދާގައި މިއަދު ކުރިއަށްދިޔަ އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ޚާރިޖީ ވަޒީރުންގެ ޚާއްޞަ ބައްދަލުވުމެއްގައި ތަޤުރީރުކުރައްވަމުން، ވަޒީރު ވަނީ ޔަހޫދީ ދައުލަތުން ފަލަސްޠީނުގެ ބިންތައް ފޭރިގަނެ، އެ ތަންތަން ޙިޞާރުކޮށްގެން ހިންގަމުންދާ ޤާނޫނާ ޚިލާފު ޢަމަލުތައް ހަރުކަށި އިބާރާތުން ކުށްވެރިކުރައްވާފައެވެ. އަދި ބައިނަލްއަޤްވާމީ މުޖުތަމަޢުން އިސްރާއީލާ މެދު ފިޔަވަޅު އެޅުމުގައި ނުކުޅެދިފައިވާތީ އެކަމާމެދު ފުން ކަންބޮޑުވުން ފާޅުކުރައްވައި، އިސްލާމީ އުންމަތުގެ އެއްބައިވަންތަކަން ދެމެހެއްޓުމަށް ގުޅިގެން މަސައްކަތްކުރުމަށް އެކަމަނާ ބާރުއެޅުއްވިއެވެ.
ރާއްޖޭގެ ޒަމާންވީ ސިޔާސަތު ތަކުރާރުކުރައްވަމުން، ވަޒީރު ޔަޤީންކަން ދެއްވީ 1967ވަނަ އަހަރުގެ ބޯޑަރުތަކުގެ މައްޗަށް ބިނާވެފައިވާ، އިރުމަތީ ޤުދުސް އަކީ ވެރިރަށް ކަމުގައި ހިމެނޭ މިނިވަން ފަލަސްޠީނުގެ ދައުލަތެއް ޤާއިމުކުރުމަށް ދިވެހިން އަބަދުވެސް ފުރިހަމައަށް ތާޢީދުކުރާނެ ކަމަށެވެ. ހަމައެހެންމެ، ޣައްޒާގެ ހަނގުރާމަ ނިމުމަކަށް ގެނައުމަށް އެކުލަވާލާފައިވާ ޝާމިލު ޕްލޭނަކީ ދެމެހެއްޓެނިވި ޞުލްޙައަކަށް ވާސިލުވުމަށް އޮތް އެންމެ މުހިންމު މަގުކަމުގައި ވިދާޅުވެ، އެ ޕްލޭން އަވަހަށް ތަންފީޒުކުރުމަށް ގޮވާލެއްވިއެވެ.
މި ސަމިޓުގެ ޙަވާސާގައި ވަޒީރު އިރުތިޝާމް ވަނީ އިސްލާމީ ބައެއް އެހެން ޤައުމުތަކުގެ ޚާރިޖީ ވަޒީރުންނާ ބައްދަލުކުރައްވައި، ރާއްޖެއާއި އޯއައިސީއާ ދެމެދު އޮންނަ ބަދަހި ގުޅުމާ ގުޅޭގޮތުން މަޝްވަރާކުރައްވާފައެވެ. ދުނިޔޭގެ 57 އިސްލާމީ ޤައުމު ތަމްސީލުކުރާ، އަދި ފަލަސްޠީނުގެ ޙައްޤުތަކަށް ވަކާލާތުކުރާ އެންމެ ބޮޑު ޖަމާޢަތް ކަމަށްވާ އޯއައިސީގެ މެންބަރަކަށް ދިވެހިރާއްޖެވެފައި ވަނީ 1976ވަނަ އަހަރުގައެވެ.
