އޮޑިހަރުގެއެއް ވެއްޓި ގިނަ ބަޔަކަށް އަނިޔާވެ އެކަކު ސީރިއަސް ހާލުގައި

ތ.ހިރިލަންދޫގައި ހަދަމުންދިޔަ އޮޑިހަރުގެއެއް ވެއްޓިއްޖެއެވެ.

Ads by MWSC

ހިރިލަންދޫ ކައުންސިލްގެ ރައީސް މުހައްމަދު ޖަލާލް "ދެން" އާއި ވާހަކަދައްކަމުން ބުނެފައިވަނީ، އިއްޔެގެ ހަވީރު ގާތްގަނޑަކަށް 3:30 ހާއިރު ވެއްޓުނު އޮޑިހަރުގެ ވެއްޓެން ދިމާވި މައިގަނޑު ސަބަބު އަދި ހޯދިފައިނުވާ ކަމަށާއި، އެ ގެ ވެއްޓުނީ ހިޔާކުރުމުގެ މަސައްކަތް ކުރަމުން ދަނިކޮށް ކަމަށެވެ.

މި ހާދިސާގައި ގާތްގަނޑަށް 8 މީހަކަށް އަނިޔާ ވެފައިވާއި އެތަނުން އެކެއްގެ ހާލު ސީރިއަސް ކަމަށްވެސް ޖަލާލް ވަނީ ބުނެފައެވެ. ހާލު ސީރިއަސް ވެފައިވާ މީހާގެ މޫނުމަތި ކަފައިގެން ގޮސް މައިބަދައިގައި ރެނދުލާފައިވާ ކަމަށް ވެސް ޖަލާލް "ދެން" އާއި ވާހަކަ ދައްކަވަމުން ވަނީ ބުނެފައެވެ. އިއްޔެ އެކަނި ވެސް 5 މީހުން ރަށުގެ ސިއްހީ މަރުކަޒަށް ގެންގޮސްފައިވާ ކަމަށާއި މިއަދު ވެސް ބައެއްމީހުން ސިއްހީ މަރުކަޒަށް ގޮސްފައިވާ ކަންވެސް ޖަލާލް ފާހަގަ ކުރިއެވެ.

މިހާރު ވެއްޓިފައިވާ އޮޑިހަރުގެ ސާފުކުރުމުގެ މަސައްކަތް ކުރަމުން ދާ ކަމަށާއި، އެތަން ސާފު ކުރަމުން ގެންދަނީ އެހަރުގެއާއި ހަވާލުވެފައި ވާ މީހުންކަމަށް ވެސް ހިރިލަންދޫ ކައުންސިލުން ފާހަގަ ކުރިއެވެ. އަދި މި ހަރުގެ ވެއްޓެން ދިމާވި ސަބަބު ދެނެގަތުމުގެ މަސައްކަތް ކުރަމުން ދާކަމަށްވެސް ހިރިލަންދޫ ކައުންސިލްގެ ރައީސް މުހައްމަދު ޖަލާލް ވަނީ ބުނެފައެވެ.