Monday, 16 November 2026
Advertisement
Allied Insurance (leaderboard)
ޚަބަރު

ބެލަރޫސްއަށް ދިވެހިން ވިސާ ހޯދަންނުޖެހޭ ގޮތް ހަމަޖައްސައިފި

ބެލަރޫސްއަށް ދިވެހިން ވިސާ ހޯދަންނުޖެހޭ ގޮތް ހަމަޖައްސައިފި

ދުރާލައި ވިސާ ނެގުމަކާ ނުލައި ދިވެހިންނަށް ބެލަރޫސްއަށް ދަތުރުކުރެވޭނެ އިންތިޒާމު ހަމަޖެއްސުމުގެ ގޮތުން ދެ ޤައުމުގެ ދެމެދުގައި ރަސްމީ އެއްބަސްވުމެއްގައި ސޮއިކޮށްފިއެވެ.

އެމެރިކާގެ ނިއުޔޯކުގައި މިހާރު ކުރިއަށްދާ އދ. ގެ އާންމު މަޖިލީހުގެ 81ވަނަ ސެޝަންގެ ހަވާސާގައި، ރާއްޖޭގެ ފަރާތުން މި މުހިންމު ލިޔުމުގައި ސޮއިކުރެއްވީ ޚާރިޖީ ވަޒީރު އިރުތިޝާމް އާދަމްއެވެ. އަދި ބެލަރޫސް ސަރުކާރު ތަމްސީލުކުރެއްވީ އެ ޤައުމުގެ ފޮރިން މިނިސްޓަރު މެކްސިމް ރޫޖެންކޯވްއެވެ. މި އެއްބަސްވުން ތަންފީޒުވާން ފެށުމާ އެކު، ދެ ޤައުމުގެ ރައްޔިތުންނަށް ވެސް އެއްވެސް އިތުރު ހުއްދައަކާ ނުލައި އެއް ޤައުމުން އަނެއް ޤައުމަށް އެތެރެވުމާއި ޓްރާންސިޓްކުރުމުގެ ފުރުސަތު ފަހިވެގެންދާނެއެވެ. މިގޮތުން، ކޮންމެ ދަތުރެއްގައި 30 ދުވަހުގެ މުއްދަތަކަށް ވިސާއާ ނުލައި މަޑުކުރެވޭނެއެވެ. އަދި އަހަރެއްގެ މައްޗަށް ގިނަވެގެން 90 ދުވަސް ވިސާއާ ނުލައި ހޭދަކުރުމުގެ ހުއްދަ ލިބޭނެއެވެ.

https://twitter.com/MoFAmv/status/2102932745915969818

Advertisement
Ooredoo — Square (box)

މި ރަސްމިއްޔާތަށް ފަހު ވާހަކަފުޅުދައްކަވަމުން ވަޒީރު އިރުތިޝާމް ވަނީ، ދިވެހިރާއްޖެއާއި ބެލަރޫސްއާ ދެމެދު އުފެދިފައިވާ ޒަމާންވީ ގުޅުން އިތުރު ހަރުފަތަކަށް ގެންދިއުމަށް އެ ޤައުމުން ދެއްވާ އެއްބާރުލުމަށް ޝުކުރު އަދާކުރައްވާފައެވެ. މީގެ އިތުރުން، މި ލުއިފަސޭހައިގެ ސަބަބުން ދެ ޤައުމުގެ ރައްޔިތުންގެ މެދުގައި އޮންނަ ގާތްކަން އިތުރުވެ، އެކި ދާއިރާތަކުން ގުޅިގެން އައު މަސައްކަތްތަކެއް ފެށުމަށް މަގުފަހިވާނެކަމުގެ ޔަޤީންކަން އެކަމަނާ ފާޅުކުރެއްވިއެވެ.

ދެ ޤައުމުގެ ދެމެދުގައި މިފަދަ އެއްބަސްވުމަކަށް އާދެވިފައި މި ވަނީ، މި އަހަރުގެ ފެބްރުއަރީ މަހުގެ 3ވަނަ ދުވަހު ދިވެހި ޚާރިޖިއްޔާގެ އިސް ވަފުދަކުން ބެލަރޫސްގެ ވެރިރަށް މިންސްކަށް ކުރެއްވި ރަސްމީ ދަތުރުފުޅާ ގުޅިގެންނެވެ. ބެލަރޫސްގެ ފަސްޓް ޑެޕިއުޓީ ފޮރިން މިނިސްޓަރު ސަރްގޭ ލުކަޝެވިޗްއާ އެކު ބޭއްވުނު އެ ތާރީޚީ ބައްދަލުވުމުގައި، ފަތުރުވެރިކަމާއި، ޞިއްޙަތާއި، ތަޢުލީމުގެ އިތުރުން އިޤުތިޞާދީ ގުޅުންތައް ފުޅާކުރުމާ ގުޅޭގޮތުން މުހިންމު މަޝްވަރާތަކެއް ވަނީ ކުރިއަށް ގެންގޮސްފައެވެ.

ރިއެކްޝަން

Advertisement
Allied — Dhen Online (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.