އެންގޯލާއާ ޚާރިޖީ ގުޅުން އިތުރަށް ފުޅާކުރުމަށް މުހިންމު ދެ އެއްބަސްވުމެއް އެކުލަވާލައިފި

ދިވެހިރާއްޖެއާއި އެންގޯލާއާ ދެމެދު އޮންނަ ދޭދޭ ގުޅުންތައް އައު ހަރުފަތަކަށް ގެންދިއުމުގެ މަޤުޞަދުގައި މުހިންމު ދެ ފަހުމުނާމާއެއްގައި ސޮއިކޮށްފިއެވެ.

އެމެރިކާގެ ނިއުޔޯކުގައި ކުރިއަށްދާ އދ. ގެ ޢާންމު މަޖިލީހުގެ 81ވަނަ ސެޝަންގެ ހައިލެވެލް ހަފުތާގެ ހަވާސާގައި، ދެ ޤައުމުގެ ސަރުކާރުގެ ފަރާތުން މި އެއްބަސްވުންތައް ތަޞްދީޤުކުރެއްވީ، ރާއްޖޭގެ ޚާރިޖީ ވަޒީރު އިރުތިޝާމް އާދަމް އާއި އެންގޯލާގެ އެކްސްޓަރނަލް ރިލޭޝަންސް މިނިސްޓަރ ޓޭޓޭ އެންޓޯނިއޯއެވެ.

މިކަމާ ގުޅޭގޮތުން ރާއްޖޭގެ ފޮރިން މިނިސްޓްރީން ހާމަކުރި ގޮތުގައި، މީގެ ތެރެއިން ފުރަތަމަ ފަހުމުނާމާގެ ދަށުން ދެ ޤައުމުގެ ޚާރިޖިއްޔާގެ މެދުގައި މެދުކެނޑުމެއްނެތި ސިޔާސީ މަޝްވަރާތައް ކުރިއަށް ގެންދިއުމުގެ ހަރުދަނާ ރަސްމީ ނިޒާމެއް ވުޖޫދުވެގެންދާނެއެވެ. އަދި ބައިނަލްއަޤުވާމީ މައިދާނުގައާއި ސަރަޙައްދީ ފެންވަރުގައި ހުރި މުހިންމު މައްސަލަތަކާ މެދު ދެ ޤައުމު ގުޅިގެން ޚިޔާލު ބަދަލުކުރުމަށާއި، އެއްބާރުލުން ދެވިދާނެ އައު ރޮނގުތައް ހޯދުމަށް މި އެއްބަސްވުމުގެ ސަބަބުން ފަހިވެގެންދާނެކަމަށް ވެސް އެ ވުޒާރާއިން މަޢުލޫމާތުދެއެވެ.

ދެވަނަ އެއްބަސްވުމަކީ ޑިޕްލޮމެޓިކް ދާއިރާއިން މީހުން ބިނާކުރުމަށް އަމާޒުކޮށް، ރާއްޖޭގެ ފޮރިން ސަރވިސް އިންސްޓިޓިއުޓް (ފޮސިމް)އާއި އެންގޯލާގެ ވެނާންސިއޯ ޑި މޯރާ ޑިޕްލޮމެޓިކް އެކަޑަމީއާ ދެމެދު އެކުލަވާލި ލިޔުމެކެވެ. މި އެއްބަސްވުމުގެ ތެރެއިން ދެ މުއައްސަސާ ގުޅިގެން ފަންނީ ތަމްރީނުތައް ހިންގުމާއި، ޑިޕްލޮމެޓިކް ފަންނުވެރިކަން ކުރިއެރުވުމުގެ އިތުރުން، ދެ ޤައުމުގެ ތަޖުރިބާއާއި އެންމެ އެކަށޭނެ އުޞޫލުތައް ޙިއްޞާކުރުމަށް ވަނީ ނިންމާފައެވެ.

މި ދެ އެއްބަސްވުމަކީ، 2026ވަނަ އަހަރުގެ ޖޫން މަހު ރާއްޖޭގެ ވެރިރަށް މާލޭގައި ދެ ޤައުމުގެ ވަޒީރުންގެ ފެންވަރުގައި ކުރިއަށްދިޔަ ބައްދަލުވުންތަކުގެ މަޝްވަރާތަކުގެ މައްޗަށް ބިނާކޮށް، ގުޅުންތައް އިތުރަށް ބަދަހިކުރުމަށް އެޅުނު ވަރަށް މުހިންމު ފިޔަވަޅެކެވެ. ދިވެހިރާއްޖެއާއި އެންގޯލާއާ ދެމެދު އެންމެ ފުރަތަމަ ރަސްމީކޮށް ޑިޕްލޮމެޓިކް ގުޅުން ޤާއިމުކުރީ 10 ނޮވެމްބަރު 2020ގައެވެ.