އައްޑޫ ކުޅިވަރު އެކުވެނީގެ ޢަމަލީ މަސައްކަތް މިއަހަރު ފަށަނީ

އައްޑޫ ސިޓީގެ ޒުވާނުންނަށް އަމާޒުކޮށްގެން ސަރުކާރުން ތަރައްޤީކުރާ ކުޅިވަރު އެކުވެނީގެ ޢަމަލީ މަސައްކަތް މިއަހަރުގެ ތެރޭގައި ފަށައި، އަންނަ އަހަރުގެ ނޮވެމްބަރު މަހަށް އެއްކޮށް ނިންމާލުމަށް އަމާޒުހިފާފައިވާކަން ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ހާމަކުރައްވައިފިއެވެ.

ދައުލަތުގެ މީޑިއާއިން ގެނެސްދިން "އަހާ" ޕްރޮގްރާމްގައި ވާހަކަފުޅުދައްކަވަމުން ވަޒީރު ވިދާޅުވީ، މި ބޮޑު މަޝްރޫޢުގެ ކުރެހުންތަކާއި ފަންނީ ހުރިހާ މަރުޙަލާތަކެއް މިހާރު ފުރިހަމަކުރެވިފައިވާ ކަމަށެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އާ ގުޅިގެން ކުރިއަށްގެންދާ މި ޕްރޮޖެކްޓުގެ މައިގަނޑު އޮނިގަނޑު ހެދުމުގެ މަސައްކަތް ވެސް މިހާރު ކޮންޓްރެކްޓަރަކާ ޙަވާލުކުރެވިފައިވާކަން އެމަނިކުފާނު ފާހަގަކުރެއްވިއެވެ.

އައްޑޫގައި މިހާރު ކުރިއަށްދާ ކުޅިވަރުގެ އެހެން އުމްރާނީ މަސައްކަތްތަކަށް އަލިއަޅުއްވާލައްވަމުން ރާފިޢު ވިދާޅުވީ، އެ ސިޓީގައި ބިނާކުރާ ބެޑްމިންޓަން ހޯލުގެ ކޮންކްރީޓް ބިންގާ އެޅުމުގެ މަސައްކަތް ނިމިފައިވާ ކަމަށެވެ. ނަމަވެސް އެ މަސައްކަތް ކުރިއަށްދާ ދުވެއްޔާމެދު ކަންބޮޑުވުން ފާޅުކުރައްވައި ވަޒީރު ވަނީ، ކޮންޓްރެކްޓަރާ އެކު މިހާރު މަޝްވަރާތައް ކުރިއަށްދާ ކަމަށާއި، އެކަށީގެންވާ ހަލުވިމިނެއްގައި މަސައްކަތް ނުކުރާނަމަ އެއްބަސްވުން އުވާލައި އެހެން ފަރާތަކާ ޙަވާލުކުރައްވާނެ ކަމުގެ އިންޒާރު ދެއްވާފައެވެ.

އައްޑޫ ސިޓީގައި ޒަމާނީ ފެންވަރުގެ ކުޅިވަރު ކޮމްޕްލެކްސެއް ޤާއިމުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ސިޓީއަށް ކުރެއްވި ދަތުރުފުޅެއްގައި ވެވަޑައިގެންފައިވާ ވަޢުދުފުޅެކެވެ. މި މަޝްރޫޢު ކުރިއަށްގެންދިއުމަށް އެމްއޭސީއެލްއާ ޙަވާލުކުރެވުނީ ނިމިދިޔަ އަހަރުގެ ނޮވެމްބަރު މަހުގެ 5ވަނަ ދުވަހުއެވެ.