މާރާމާރީތައް ހުއްޓުމަކަށް އައިސްފި، ގޭންގުތަކުގެ 10 ލީޑަރެއްގެ މައްސަލަ ދަނީ ބަލަމުން

ގޭންގު ކުށްތައް ވަރަށް ބޮޑަށް ކޮންޓްރޯލްކުރެވިފައިވާކަމަށާއި، މިހާރު ވެސް ނުރައްކާތެރި ދިހަ ގޭންގު ލީޑަރެއްގެ މައްސަލަ ފުލުހުން ތަހުގީގުކުރަމުންދާކަމަށް، ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

"އަހާ" ފޯރަމްގައި އާންމުންގެ ސުވާލުތަކަށް ޖަވާބުދެއްވަމުން ވަޒީރު ފާހަގަކުރެއްވި ގޮތުގައި، މާޒީގައި އަހަރެއްގެ މައްޗަށް 2 ނުވަތަ 5 ޒުވާނުން މާރާމާރީތަކުގައި މަރުވަމުން ދިޔަ ނަމަވެސް، ފާއިތުވި ތިން އަހަރު ދުވަހުގެ ތެރޭގައި އެފަދަ އެއްވެސް ހިތާމަވެރި ހާދިސާއެއް ހިނގާފައެއް ނުވެއެވެ. މި ކާމިޔާބީގެ މައިގަނޑު ސިއްރަކީ ކުށްކުރާ މީހުންނަށްވުރެ ފުލުހުންގެ އަދަދު ގިނަވާނެހެން، ނުރައްކާތެރި ސަރަހައްދުތަކުގައި ސަލާމަތީ ބާރުތަކުގެ ހަރަކާތްތައް އެތައް ގުނައެއް އިތުރުކުރުން ކަމުގައި އެމަނިކުފާނު ވިދާޅުވިއެވެ.

އިންތިޒާމުވެގެން ހިންގާ ކުށްތައް ހުއްޓުވުމަށް ފުލުހުން ވަނީ ބޮޑެތި މަސައްކަތްތަކެއް ކޮށްފައެވެ. އެގޮތުން 52 ހާއްސަ އޮޕަރޭޝަނެއް ހިންގައި، 10،000 އަށްވުރެ ގިނަ މީހުން ބަލައިފާސްކޮށްފައިވެއެވެ. އަދި މި އޮޕަރޭޝަންތަކުގެ ތެރެއިން 517 މީހަކު ހައްޔަރުކޮށް، ގޭންގުތަކާ ގުޅުންހުރި 670 އުޅަނދެއް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް އިހުސާނު މައުލޫމާތުދެއްވިއެވެ.

ކުޑަކުދިންނަށް އަމާޒުކޮށްގެން ގޭންގުތަކުން ހިންގާ ހަރަކާތްތައް ހުއްޓުވުމުގެ ގޮތުން، އެފަދަ ކުދިން ބޭތިއްބުމަށް ބޭނުންކުރަމުންދިޔަ 26 "ސޭފް ހައުސް"އެއް ވަނީ ރެއިޑްކޮށް ބަންދުކޮށްފައެވެ. އަދި މިދިޔަ ޖޫން މަހުން ފެށިގެން ތަހުގީގުކުރެވެމުންދާ 10 ލީޑަރުންގެ މައްސަލައިގައި އައު ގާނޫނުގެ ތެރެއިން ހަރުކަށި ފިޔަވަޅުތަކެއް އެޅިގެންދާނެކަމުގެ ޔަގީންކަން ވަޒީރު ދެއްވިއެވެ.

މީގެ އިތުރުން، ކުށުގެ ވެށީގައި އުޅޭ ޒުވާނުންނަށް އިސްލާހުވުމުގެ ފުރުސަތު ސަރުކާރުން ފަހިކޮށްދީފައިވާކަން އެމަނިކުފާނު ފާހަގަކުރެއްވިއެވެ. ގާނޫނީ ފިޔަވަޅު އެޅުމުގެ ބަދަލުގައި، ވަޒީފާގެ މައިދާނަށް ނުކުތުމަށް ދެވުނު ފުރުސަތުގެ ބޭނުން ގިނަ ޒުވާނުންތަކެއް ހިފާފައިވުމަކީ ލިބުނު ވަރަށް ބޮޑު އުފަލެއްކަމަށް ވިދާޅުވިއެވެ. ހަމައެހެންމެ، 14 އަދި 15 އަހަރުގެ 212 ކުޑަކުއްޖަކު ކުށުގެ ވެށިން ސަލާމަތްކޮށް، ނަސޭހަތް ދިނުމަށް ފަހު އާއިލާއާ ވަނީ ހަވާލުކުރެވިފައެވެ.

މި މައްސަލަތަކަށް ދާއިމީ ހައްލެއް ގެނައުމަށްޓަކައި، ކުށުގެ ވެއްޓަށް ހުށަހެޅޭ ކުދިންނަށް ބޭނުންވާ ތަރުބިއްޔަތާއި ހުނަރު އުނގަންނައިދިނުމަށް "ހޯޕް އައިލެންޑް"ގެ ނަމުގައި ހާއްސަ މަރުކަޒެއް ގާއިމުކުރުމުގެ މަސައްކަތް ކުރިއަށްދާކަން ވެސް ވަޒީރު އިހުސާނު ހާމަކުރެއްވިއެވެ.