ކެމިކަލް ވިއްކުމުގެ ހުއްދައަށް އެދުމުގެ ފުރުސަތު އިތުރުކޮށްފި

ރާއްޖޭގައި ނުރައްކާތެރި ކެމިކަލްގެ ބާވަތްތައް ވިއްކައި ގުދަންކުރާ ފަރާތްތަކުން ހުއްދަ ހޯދުމަށް ދީފައިވާ މުއްދަތު ހަމަވިއިރު ވެސް ގިނަ ބަޔަކު ރަޖިސްޓަރީކޮށްފައި ނުވާތީ، މިއަދުން ފެށިގެން އިތުރު އެއް މަސްދުވަހުގެ މުއްދަތެއް ދިފާއީ، ވަޠަނީ ޚިދުމަތާ ބެހޭ ވުޒާރާއިން ދީފިއެވެ.

އެ ވުޒާރާއިން ނެރުނު ބަޔާނެއްގައި އަންގާފައިވާ ގޮތުން، ކެމިކަލް ވިއްކުމާއި ގުދަންކުރުމުގެ ހުއްދައަށް އެދި ހުށަހަޅަންޖެހެނީ "މަކުޑި" ޕޯޓަލްގެ ޒަރީއާއިންނެވެ. އަދި އަލަށް ދެވުނު މި މުއްދަތުގެ ތެރޭގައި ޕޯޓަލް މެދުވެރިކޮށް ރަޖިސްޓަރީ ފުރިހަމަ ނުކުރާ ވިޔަފާރިތަކަށް، ރާއްޖެއިން ބޭރުން ކެމިކަލް އެތެރެކުރުމުގެ އެއްވެސް ފުރުސަތެއް ކުރިއަށް އޮތް ތަނުގައި ނުދިނުމަށް ވަނީ ކަނޑައަޅާފައެވެ.

މީގެ އިތުރުން، ދީފައިވާ މުއްދަތު ފާއިތުވުމަށް ފަހު، ޤަވާއިދާ ޚިލާފަށް ކެމިކަލްގެ ވިޔަފާރިކުރާ ފަރާތްތައް ހޯދައި، "ނުރައްކާތެރި ކެމިކަލާ ބެހޭ ޤަވާއިދު"ގެ ދަށުން އެ ފަރާތްތަކާ މެދު ހަރުކަށި ޤާނޫނީ ފިޔަވަޅުތަކެއް އެޅޭނެކަމުގެ އިންޒާރު ވެސް ދިފާއީ ވުޒާރާއިން ވަނީ ދީފައެވެ.

މިދިޔަ އަހަރުގެ ތަފާސްހިސާބުތަކަށް ނަޒަރު ހިންގާއިރު، މާލެ ސަރަހައްދުގައި އެކަނި ވެސް ކެމިކަލް ވިއްކާ 62 ފިހާރައަކާއި 144 ކެމިކަލް ގުދަން ހުރިކަމަށް ދިފާއީ ވުޒާރާގެ ރެކޯޑުތަކުން ދައްކައެވެ. މިތަންތަނުގެ ސަލާމަތީ ކަންކަން ހުރިގޮތް ބެލުމަށްޓަކައި އެމްއެންޑީއެފްގެ ފަޔަރ އެންޑް ރެސްކިއު ސަރވިސް އިން ދާދި ފަހުން ވަނީ "އޮޕަރޭޝަން ހިރާސް ފާސް"ގެ ނަމުގައި ހާއްސަ ހަރަކާތެއް ވެސް ހިންގާފައެވެ.

މާލޭގެ މީހުން ދިރިއުޅޭ ސަރަހައްދުތަކުގައި ކެމިކަލް ގުދަންކުރުން މަނާކޮށް އެފަދަ ތަންތަން ތިލަފުއްޓަށް ބަދަލުކުރަން ފެށީ 2019ވަނަ އަހަރު ހެންވޭރުގައި ހުރި ކެމިކަލް ގުދަނެއްގައި ރޯވެ، ފުރާނައަކާއި މުދަލަށް ލިބުނު ފޫނުބެއްދޭވަރުގެ ބޮޑު ގެއްލުމާ ގުޅިގެންނެވެ.