އުފެއްދުންތެރިކަމުގެ މައުރަޒަށް ތަކެތި ބަލައިގަންނަން ފަށާ ތާރީޚު އިއުލާންކޮށްފި
"ދިވެހިންގެ އުފެއްދުންތެރިކަމުގެ މައުރަޒު"އަށް ތަކެތި ބަލައިގަންނާނެ ތާރީޚުތަކާއި ގަޑިތައް ބިޒްނަސް ސެންޓަރ ކޯޕަރޭޝަން (ބީސީސީ)އިން މިއަދު އިއުލާންކޮށްފިއެވެ.
ރާއްޖޭގެ ކުދި އަދި މެދުފަންތީގެ ވިޔަފާރިތަކާއި އުފެއްދުންތެރިންނަށް ފުރުސަތުތައް ފަހިކޮށްދިނުމުގެ މަގުސަދުގައި ބިޒްނަސް ސެންޓަރ ކޯޕަރޭޝަން (ބީސީސީ)އިން އިންތިޒާމުކޮށްގެން ހުޅުމާލޭ ސެންޓްރަލް ޕާކުގައި މި މަހުގެ ފަހުކޮޅު ބޭއްވުމަށް ދަނީ ތައްޔާރުވަމުންނެވެ. އަންނަ އޮކްޓޯބަރު މަހުގެ 25އިން ފެށިގެން ނޮވެމްބަރު 2ގެ ނިޔަލަށް ކުރިއަށްދާ މި މައުރަޒުގައި ބައިވެރިކުރާ ތަކެތި ބަލައިގަތުމަށް ހަމަޖެހިފައި ވަނީ ކަނޑައެޅިފައިވާ ދުވަސްތަކުގެ ހެނދުނު 10:00 އިން ރޭގަނޑު 8:00 އަށެވެ.
މައުރަޒުގައި ބައިވެރިކުރާ ކާބޯތަކެތީގެ ގިންތިތަކާއި ބަލައިގަންނަ ތާރީޚް:
- 15 އޮކްޓޯބަރުގައި ބަލައިގަންނަ ތަކެތި
- ކާބޯތަކެތީގެ ގިންތި
- ދަނޑުވެރިކަމުގެ އުފެއްދުންތައް އަދި ވެލިއު އެޑިޝަން
- މަސްވެރިކަމުގެ އުފެއްދުންތައް އަދި ވެލިއު އެޑިޝަން
2. 17 އޮކްޓޯބަރުގައި ބަލައިގަންނަ ތަކެތި
- ކޭކް ޑެކަރޭޝަން
3. 07 އޮކްޓޫބަރުން ފެށިގެން 13 އޮކްޓޯބަރުގެ ނިޔަލަށް ބަލައިގަންނަ ތަކެތި
- އެހެނިހެން ހުރިހާ އުފެއްދުންތައް
ބީސީސީން މައުލޫމާތު ދޭގޮތުގައި، މައުރަޒު ބާއްވާ ސަރަހައްދަށް ތަކެތި ގެންނައިރު ޕޯޓަލް މެދުވެރިކޮށް ހުރިހާ މައުލޫމާތެއް ފުރިހަމަކޮށްފައި ހުރުމާއި، އެ ތަކެއްޗަކީ ރައްކާތެރިކަމާއެކު ބަންދުކޮށްފައިވާ ތަކެތި ކަމުގައިވުމަކީ ލާޒިމުކަމެކެވެ. ނަމަވެސް އިންފޮމޭޝަން އެންޑް ކޮމިއުނިކޭޝަން ޓެކްނޮލޮޖީ (އައިސީޓީ) ގިންތީގެ އުފެއްދުންތައް ބަލައިގަންނާނީ އެކަމަށް ޚާއްސަ އޮންލައިން ލިންކެއް މެދުވެރިކޮށެވެ.
މި މައުރަޒުގެ ވާދަވެރި ގިންތީގައި ބައިވެރިވުމުގެ މުއްދަތު މިހާރު ހަމަވެފައިވާއިރު، ފޯމުލީ ފަރާތްތަކަށް އެ ފަރާތްތަކުގެ އުފެއްދުންތައް ރަޖިސްޓްރީކުރުމުގެ ފުރުސަތު މިހާރު ވަނީ ހުޅުވާލާފައެވެ. މިހާތަނަށް 700 އަށްވުރެ ގިނަ ފަރާތުން މައުރަޒުގައި ވާދަކުރުމަށް ހުށަހަޅާފައިވާއިރު، ޑިސްޕްލޭ ކުރުމަށް 6000 އަށްވުރެ ގިނަ އުފެއްދުން ރަޖިސްޓްރީކޮށްފައިވާކަން އެ ކޯޕަރޭޝަނުން ފާހަގަކުރެއެވެ.
މި އަހަރުގެ މައުރަޒު ވަނީ ކުރީ އަހަރަށްވުރެ ފުޅާކޮށްފައެވެ. އެގޮތުން، މިދިޔަ އަހަރު 5 ޑިސްޓްރިކްޓެއް އޮތް ނަމަވެސް، މިއަހަރު ދީނީ، ޓެކްނޮލޮޖީ އަދި ބައިނަލްއަގުވާމީ ޑިސްޓްރިކްޓާ އެކު ޖުމްލަ 7 ޑިސްޓްރިކްޓެއް ހިމެނޭނެއެވެ. މީގެ އިތުރުން، އާންމުންނަށް ތަކެތި ވިއްކުމަށް ހާއްސަކޮށްފައިވާ "މާކެޓް ޕްލޭސް"ގެ ޖާގަތަކަށް ހުޅުވާލި ދުވަހު ވެސް އެއްކޮށް ފުރިފައިވާކަން ބީސީސީން ހާމަކުރެއެވެ.
ބީސީސީން ބުނާގޮތުގައި މި ގައުމީ ހަރަކާތުގެ އެންމެ ބޮޑު އަމާޒަކީ ދިވެހި އުފެއްދުންތެރިންނަށް އައު މާކެޓުތައް ހޯދައިދީ، އީޖާދީ ވިސްނުންތައް ދިރުވައި އާލާކޮށް، ގައުމުގެ އިގުތިސާދީ ދުވެލީގައި ކުދި ވިޔަފާރިތަކުގެ ހިއްސާ އިތުރުކުރުމެވެ.
