މުދައްރިސުންގެ ހުނަރުވެރިކަން އިތުރުކޮށް ޒަމާނީ ތަމްރީނުތައް މުހިންމު: ފަސްޓް ލޭޑީ

ތައުލީމީ ދާއިރާއަށް އަންނަ ޓެކްނޮލޮޖީގެ ކުރިއެރުންތަކާ ފައިހަމަކުރުމަށްޓަކައި ޓީޗަރުން ބާރުވެރިކުރުވައި ޒަމާނީ ފަންނީ ތަމްރީނުތައް ފޯރުކޮށްދިނުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ގޮވާލައްވައިފިއެވެ.

ބައިނަލްއަގުވާމީ މުދައްރިސުންގެ ދުވަހާ ގުޅިގެން މީސްމީޑިއާ މެދުވެރިކުރައްވައި ދެއްވި ހާއްސަ ހިތާބެއްގައި އެ ކަމަނާ ވަނީ ދުނިޔެއަށް އަންނަމުންދާ ހަލުވި ބަދަލުތަކާ އެކު ތައުލީމީ ނިޒާމަށް ކުރިމަތިވާ ގޮންޖެހުންތައް އިތުރުވަމުންދާކަން ފާހަގަކުރައްވާފައެވެ. އެހެންކަމުން، މިފަދަ ބަދަލުތަކަށް އަހުލުވެރިވެފައިވާ ބަޔަކަށް މުދައްރިސުން ހެދުމަށްޓަކައި، އެ ބޭފުޅުންގެ ޤާބިލުކަން ތަރައްގީކޮށް ފަންނީ ގޮތުން ކުރިއެރުވުމަކީ މިއަދު ކޮންމެހެން ކުރަންޖެހިފައިވާ ކަމެއްކަން މެޑަމް ސާޖިދާ ބަޔާންކުރެއްވިއެވެ.

މީގެ އިތުރުން، ދަރިވަރުންގެ މުސްތަޤުބަލު އުޖާލާކޮށްދިނުމަށްޓަކައި މުދައްރިސުން ވެވަޑައިގަންނަވާ މަތިވެރި ޤުރުބާނީއާއި ބަހައްޓަވާ އޯގާތެރިކަމަށް އެކަމަނާ ވަނީ ތައުރީފުކުރައްވާފައެވެ. ޤައުމަށް ފައިދާހުރި ހަރުދަނާ ޖީލެއް ބިނާކުރުމުގެ އެންމެ މުހިންމު ޒިންމާ އަދާކުރައްވަނީ އެދުރުންކަން ފާހަގަކުރައްވައި، މުދައްރިސުންގެ ބުރަ މަސައްކަތުގެ ނަތީޖާ ހަމައެކަނި ކްލާސްރޫމަކުން ނިމިގެން ނުދާނެކަމަށް ވިދާޅުވިއެވެ. އަދި އެކަމަނާ ވަނީ މުދައްރިސުންގެ ހިދުމަތްތެރިކަމާއި ކެތްތެރިކަން ބަލައިގަނެ، އެ އެންމެހާ ފަރާތްތަކަށް ހިތުގެ އަޑިން ޝުކުރު ދަންނަވާފައެވެ.