!ތިޔައީ ރައްޓެއްސެއްތަ؟ ނޫނީ ރަހުމަތްތެރިއެއްތަ؟ މިސުވާލަށް ޖަވާބު ދީބަލަ
އެންމެން ވެސް ރަށްޓެހިން ގެންގުޅެއެވެ. ބައެއް ރައްޓެހިންނާ އަބަދު ދިމާ ނުވެ ވެސް ހުރެއެވެ. އެއްބައި ރައްޓެހިން ނުދަންނަ މީހުނަށް ވެއްޖެއެވެ. އަނެއް ބައި ރައްޓެހިން މަޑުމަޑުން ގެއްލޭހެން ވެސް ހީވެއެވެ. އެހެންނަމަވެސް އެމީހުންނާ އެއްކޮށް އެ ހޭދަކުރި މަޖާ ވަގުތު ތަކަކީ ދުވަހަކުވެސް ހަނދާނުން ފޮހެވޭނެ އެއްޗެއް ނޫނެވެ. ދުވަހަކުވެސް ހަނދާނުން ފޮހެލަން ބޭނުން ވާނެ ކަންތައްތަކެއް ވެސް ނޫނެވެ.
ރައްޓެހިންނާއެކު ހޭދަކުރާ އެ ވަގުތު ތަކަކީ ޙަޔާތުގެ އެހެން ދަތިތައް ހަނދާން ނެތޭ ކަމެއްވެސް މެއެވެ. އެމީހުންނާ އެއްކޮށް ކޮފީ އަށް އަރާލާ އެ ދައްކާ ސަކަ މަޖާ ވާހަކަ ތަކުގައި ކިތަންމެ އިރެއް ވަންދެން ވެސް އިނދެވިދާނެއެވެ. ސަބަބަކީ އެމީހުންނަކީ ތިމާއާއި “ވައިބު” ދިމާވާ މީހުނަށް ވާތީއެވެ. ތިމާގެ އިހުސާސުތައް ދަންނަ ތިމާއަށް އިޙުތިރާމް ކުރާ މީހުންނަށް ވާތީއެވެ.
ދުވަހެއް ފެށިގެން ނިމޭއިރުގައި އެމީހުނަށް ޚަބަރު ނުވެވޭ ދުވަހަކީ ވަރަށް ނާންނާނެ ދުވަހެކެވެ. އެހެންވެއްޖެ ނަމަ ދުވަސް ދާނީ ވެސް މުޅިން ގޯސްކޮށެވެ. ދިރިއުޅުމުގެ ކަންތައްތައް ހިއްސާ ކުރުމަށް އެންމެ ބޭނުންވާނެ، އިތުބާރު ހިފޭ ރަޙުމަތްތެރިންނަކީ އެއީ އެވެ. ޤަބޫލު ކުރަމެވެ. ހުރިހާ ރައްޓެހިން ވެސް ރަނގަޅު ލަފާ ދޭނެއެވެ. އެހެން ނަމަވެސް ރަޙުމަތްތެރިންނާއި ރައްޓެހިންގެ ފަރަޤު، ވަރަށް ވެސް ބޮޑެވެ.
ރަޙުމަތްތެރިންނަކީ ތިމާއަށް ހެޔޮ އެދިގެން ތިމާ އާއި އެކު ރަނގަޅު މަންފާއެއް ކުރާނެ ގޮތަކަށް ތިމާގެ ދިރިއުޅުމުގެ ވައްޓަފާޅި ބަދަލުކޮށްލައި ދިނުމަށް ތިމާއަށް އެހީތެރި ވެދޭނެމީހުންނެވެ. އެއާ ޚިލާފަށް ރައްޓެހިންނަކީ އެމީހުންގެ ފައިދާއަށް ކަންކަން ކުރިން މަސައްކަތްކޮށް، އަވަހަށް ބޮލުން ދުއްވާލެވޭތޯ، އަނެކާއާމެދު އެއްވެސް ވަރަކަށް ވިސްނުމެއް ޚިޔާލެއް ނެތި އޭނާގެ ބޭނުން ފުއްދާލުމަށް ޓަކައި ތިމާ ބޭނުން ކުރަން އެއްވެސް ވަރަކަށް ޖެހިލުމެއް ނުވާ ބައެކެވެ.
ތިބާ ޙާލުގައި ޖެހޭ ދުވަހެއްގައި ތިބާއަށް އެހީތެރިކަމުގެ އަތެއް ދިއްކޮށްލާނޭ ރަޙުމަތްތެރިއެއް ނުވަތަ ރަޙުމަތްތެރިން ތިބުމަކީ ހާދަ ބޮޑު ނަސީބެކެވެ. އެއްބައި މީހުން ތިމާއަށް އެހީތެރި ވެދޭކަން ދައްކަން މަސައްކަތް ވެސް ކުރާނެއެވެ. ނަމަވެސް އޭގެ ފަރަޤު އަމިއްލައަށް ދެނެގަނެވޭނެެއެވެ.
ދުވަހަކުވެސް ތިމާއަށް ހެޔޮހިތުން އެހީއެއް ވެދިން ރަޙުމަތްތެރިއެއްގެ މަތިން ހަނދާން ނުނައްތާލާށެވެ. މިދެންނެވީ ފެން ކައްކާ ބޮލީގެ އިއްޒަތަކަށް ތިމާގެ ހެޔޮ އެރަޙުމަތްތެރިޔާ ނުހަދާށެވެ. ހެޔޮ އެދޭ ރަޙުމަތްތެރިންނަކީ ދިރިއުޅުމުގެ ވަރަށް ބޮޑު ރޯލެއް އަދާކުރާ އަދި އެހާމެ އަގުހުރި ޖަވާހިރުތަކެއް ފަދަ ބައެކެވެ. އެމީހުންނާ ކޮންމެ ދުވަހަކު ބައްދަލު ނުވިކަމުގައި ވީ ނަމަވެސް އެންމެ ކުޑަމިނުން ތިމާގެ އަތުގައި 24 ގަޑިއިރު އޮންނަ ފޯނުން ޚަބަރެއްވެލާ އެމީހުންގެ ޙާލު އަހުވާލު ބަލާލާ ހަދާށެވެ. އެމީހުން ވެސް ހިތްހަމަޖެހި އުފާވާނެއެވެ.
Ads by STO
