އިންޑިއާގެ ގޭސް ކާރުޚާނާއެއް ގްރީން އަމޯނިއާ އުފައްދާ ތަނަކަށް ބަދަލުކުރަނީ

އިންޑިއާގައި ގުދުރަތީ ގޭސް ބޭނުންކޮށްގެން އަމޯނިއާ އަދި ޔޫރިއާ އުފައްދާ ކާރުޚާނާއެއް، އިޔާދަކުރަނިވި ހަކަތައިން ހިންގާ ނިޒާމަކަށް ބަދަލުކުރުމުގެ މަސައްކަތް ފަށައިފިއެވެ. އޭޝިއަން ޑިވެލޮޕްމަންޓް ބޭންކް (އޭޑީބީ) އާއި ޖަޕާނުގެ މާލީ އެހީތެރިކަމާއެކު ކުރިއަށްގެންދާ މި މަޝްރޫޢުގެ އަމާޒަކީ، އަހަރެއްގެ މައްޗަށް ގާތްގަނޑަކަށް 1.1 މިލިއަން ޓަނުގެ ގްރީން އަމޯނިއާ އުފެއްދުމެވެ.

މި ބޮޑު މަޝްރޫޢު ތަންފީޒުކުރާނީ "އޭއެމް ގްރީން އަމޯނިއާ (އިންޑިއާ) ޕްރައިވެޓް ލިމިޓެޑް" އިންނެވެ. އޭޑީބީން ސިފަކޮށްފައިވާ ގޮތުގައި މިއީ އިޔާދަކުރަނިވި ހަކަތައިން ހިންގާ ދުނިޔޭގެ އެންމެ ބޮޑު އެއް އަމޯނިއާ ކާރުޚާނާއަށް ވެގެންދާނެއެވެ. މިއީ "އެކްޝަން ފޯ ކްރިއޭޓިން އެނަރޖީ ސެކިއުރިޓީ ފޯ ލޯންގް-ޓަރމް ރެޒިލިއަންސް" (އެކްސެލް) ގެ ދަށުން ކުރެވޭ ފުރަތަމަ އިންވެސްޓްމަންޓެވެ. މިކަމަށް ފޯރުކޮށްދޭ މާލީ އެހީގެ ތެރޭގައި، ޖަޕާން އިންޓަނޭޝަނަލް ކޯޕަރޭޝަން އޭޖެންސީ (ޖައިކާ) އިން ފައިސާދީ، އޭޑީބީން ބަލަހައްޓާ "ލީޑިންގ އޭޝިއާސް ޕްރައިވެޓް އިންފްރާސްޓްރަކްޗަރ ފަންޑު 2" ގެ ފަރާތުން ދޫކުރާ 100 މިލިއަން ޑޮލަރުގެ ލޯނެއް ހިމެނެއެވެ.

މިކަމާ ގުޅޭގޮތުން އޭޑީބީގެ ރައީސް މަސާޓޯ ކަންޑާ ވިދާޅުވީ، ފޮސިލް ފިއުލްގެ ބަދަލުގައި އިޔާދަކުރަނިވި ހަކަތަ ބޭނުންކޮށްގެން، ޖައްވަށް ދޫކުރާ ވިހަ ގޭސްތައް ވަރަށް ބޮޑަށް މަދުކުރެވޭނެ ކަމަށެވެ. އަދި މުޅި ސިނާޢަތަށް އިންޤިލާބީ ބަދަލެއް ގެނެވޭނެ ފަދަ މިންވަރަކަށް އިންޑިއާއިން މި އުފެއްދުންތައް ތައްޔާރުކުރެވޭނެ ކަމަށްވެސް އޭނާ ވިދާޅުވިއެވެ.

އޭޝިއާ ޕެސިފިކް ސަރަޙައްދުގެ ވިޔަފާރިތަކާއި ޤައުމުތަކަށް ހަކަތައިގެ އަގުތައް އުފުލުމުގެ މައްސަލައާ ކުރިމަތިލުމަށާއި، ހަކަތައިގެ ނިޒާމުތައް ވަރުގަދަކުރުމަށް އެހީތެރިވުމުގެ ގޮތުން އޭޑީބީ އާއި ޖަޕާނުން އެކްސެލް ޕްރޮގްރާމް ތަޢާރަފުކުރީ 2026 ވަނަ އަހަރުގެ މެއި މަހުގައެވެ. މި އިސްނެގުމުގެ ދަށުން މައިގަނޑު ދެ ދާއިރާއަކަށް އެހީތެރިކަން ފޯރުކޮށްދޭނެއެވެ. އެއީ ކުދި އަދި މެދުފަންތީގެ ވިޔަފާރިތަކަށް އަމާޒުކޮށްގެން ކުރު މުއްދަތުގެ މާލީ އެހީތެރިކަން ދިނުމާއި، ދިގު މުއްދަތުގައި ދެމެހެއްޓެނިވި އަދި ތަފާތު ހަކަތައިގެ ނިޒާމުތަކަށް އެހީތެރިވުމެވެ.