ނޮވެންބަރު 3 ގައި ރާއްޖެ ސަލާމަތްކޮށްދިނީ އިންޑިއާ އިން، ރާއްޖެ ސިފައިން ތިބީ ފިލައި : ދޮންބިލެތް

1988 ނޮވެމްބަރު-3 ގައި ރާއްޖެ އަށް ކުރިމަތިވި އުދުވާނީ ހަމަލާއިން ރާއްޖެ ސަލާމަތް ކޮށްދިނީ އިންޑިއާއިން ކަމަށް ބިލެތްދޫ ދާއިރާގެ އަހުމަދު ހަލީމް (ދޮންބިލެތް) ވިދާޅުވެއްޖެއެވެ.

Ads by MWSC

މަޖިލީހުގެ މިއަދުގެ ޖަލްސާގައި ވާހަކަދައްކަވަމުން އޭނާ ވިދާޅުވީ އެ ދުވަހު ހަމަލާ ދީފާނެ ކަމަށް ރާއްޖޭގެ ބައެއް ސިފައިންނާއި އިސްވެރިން ތިބީ ފިލައި ކަމަށެވެ.

"އެ ދުވަހުގެ ޑިފެންސް މިނިސްޓަރ އޮތީ ފާރެއް މަތިން ފުންމާލައިގެން އަތް ބިިންދައިގެން ގޮސްގެން. ރައީސުލްޖުމްހޫރިއްޔާ ވެސް އޮތީ ގޮށްޓެއްގެ ދަށަށް ވަދެ ފިލައި." ދޮންބިލެތް ވިދާޅުވިއެވެ.

ދޮންބިލެތް އިތުރަށް ވިދާޅުވީ އެދުވަހު ބަނޑޭރިގެއިން ނިކުތް ހައެއްކަ ސިފައިން ގައުމަށްޓަކާ ޝަހީދުވެ ގުރުބާންވީ ކަމަށާއި އެކަމަށްޓަކައި އެފަރާތްތަކަށް ޝުކުރު ހައްގުވާ ކަމަށެވެ.

ނަމަވެސް އެދުވަހު ހަގީގަތުގައި ރާއްޖެ ސަލާމަތް ކޮށްދިނީ އިންޑިއާއިން އައި އެގައުމުގެ ސިފައިން ކަމަށް އޭނާ ވިދާޅުވިއެވެ.

"އިންޑިއާއިން އަސްކަރީ ބޮޑެތި ބަޑި އާއި ބަޒޫކާ ކޮނޑަށް ލައިގެން އައިސްތިބީ މިލިޓަރީ ޔުނިފޯމްގައި. މިހާރު މި އަންނަހެން ސަފާރީގައި އައިސް ފްލެޓެއް އަޅާކަށް ނޫން އައީ. އެހެން ނަމަވެސް މަގުމައްޗަށް އައިސް އިންޑިިއާ އައުޓް ގޮވާކަށް ނުޖެހުނު." ދޮންބިލެތް ވިދާޅުވިއެވެ.

އޭނާ އިތުރަށް ވިދާޅުވީ އިންޑިއާއިން ރާއްޖެއަށް ކޮށްދީފައިވާ ކަންކަމަށް ރާއްޖެއިން ޝުކުރުވާން ޖެހޭ ކަމަށާއި އިންޑިއާ އައުޓްގެ ނަމުގައި އިންޑިއާ އާ ދެކޮޅަށް ކެމްޕެއިން ހިންގަމުން އަންނާތީ ކަންބޮޑުވުން ވާންޖެހޭ ކަމަށެވެ.

ދޮންބިިލެތްގެ ވާހަކަ މި މޭރުމުން ހުރުމުން އިދިކޮޅު މެންބަރުން ވަނީ ނިޒާމީ ނުކުތާ ނަންގަވައި އެ އުދުވާނީ ހަމަލާއިން ރާއްޖެ ސަލާމަތް ކޮށްދިނުމަށް ދިވެހި ސިފައިންވީ ގުރުބާނީ ދަށްކޮށް ވާހަކަދައްކާތީ އެކަމާމެދު ކަންބޮޑުވުން ފާޅުކޮށްފައެވެ.

ނަމަވެސް ދޮންބިލެތް ވިދާޅުވީ އޭނާ އަކީ މާލެ މީހެއް ކަމަށާއި އެދުވަހު ކަން ހިނގައި ދިޔަ ގޮތް ވަރަށް ގާތުން އޭނާއަށް ފެނުނު ކަމަށެވެ.