ސަރވޭ: ހަގީގީ ރައްޓެހިންނަކީ ކޮބާކަން ބުނެލަދީބަލަ!
ހަމަޔަގީނުން ވެސް އަހަރުމެންގެ މައިންބަފައިންނާއި އާއިލާއަށްފަހު އަހަރުމެންނާއި ދެން އެންމެ ގާތްކޮށް އުޅޭ މީހުންނަކީ އަހަރުމެންގެ ރައްޓެހިންނެވެ. ބައެއް ފަހަރު އަހަރުމެންގެ އާއިލާއަށްވުރެ ވެސް ބޮޑަށް އެމީހުންނަށް އަހަރުމެންގެ މިޒާޖާއި، އެކިއެކި ޙާލަތްތައް އެނގި ވިސްނެއެވެ. ރައްޓެހިން ޚާއްސަ ވަނީ މިހެންވެއެވެ.
ނަމަވެސް މިފަދަ "ކޮރަޕްޓު" ވަމުން އަންނަ ޒަމާނެއްގައި، ރައްޓެހިންގެ ތެރޭގައިވެސް އަހަރުމެންނަށް ހެޔޮ ގޮތް މެދުވެރިވުމަށް ނޭދޭ މީހުން އުޅެއެވެ. އެމީހުންނަކީ އަހަރުމެންނަށް ހެޔޮއެދޭ ކަމަށް ހެދިގެން، އެހެން ނަމަވެސް ފަސްފަހަތުގައި އަހަރުމެންނާއި ދިމާލަށް އެއްޗެހި ކިޔާ "އެކުވެރިން" ނެވެ.
ކަމެއް ޖެހުނީމަ ނޫނީ އަހަރުމެންގެ މަތިން ހަނދާން ނުވާ، ކަމަކު އެދުމުން ވަރަށް ފަސޭހައިން ގެއްލޭ އެކުވެރިން ވެސް މަދެއް ނޫނެވެ. މިފަދަ ރައްޓެހިންނަކީ ހަގީގަތުގައި ވެސް ތިމާގެ ރައްޓެހިންކަމާއިމެދު ސުވާލު އުފެދެއެވެ. އަދި ހަގީގީ ރައްޓެހިންނަކީ ކޮބާ ކަމާމެދު ވެސް ވަނީ ސުވާލު އުފެދިފައެވެ.
އެހެންކަމުން، މީސް މީޑިއާ މެދުވެރިކޮށް "ދެން" އިން މިކަމާއިގުޅޭ ގޮތުން ކުޑަ ސަރވޭ އެއް ހަދާލީމެވެ.
ސުވާލު: ހަގީގީ ރައްޓެހިންނަކީ ކޮބާ؟
އެޑީ (21އ.): "ކޮންމެ ދުވަހަކު ދިމާވެ ވާހަކަ ނުދެއްކިޔަސް ކަމެއް ޖެހޭ ވަގުތު އެންމެ ކައިރީގައި އަޅާލަން ތިބޭ މީހުން"
ތަސްލީމާ (21އ.): "ތިމާއަށް ދިމާވާ ކޮންމެ ކަމެއްގައި ވެސް އެހީތެރިވެ، ހިތްވަރުދީ އުޅޭ މީހުންނަކީ ހަގީގީ ރައްޓެހިން. އެއީ ކިތަންމެ ދެރަ ކަމެއް ތިމާއާއި ކުރިމަތި ވިޔަސް، އަދި ކިތަންމެ އުފާވެރި ކަމެއް ދިމާ ވިޔަސް ތިމާގެ ކަންކަމުގައި އެހީތެރިވެ ކަންތައްތައް ޙިއްސާކޮށް އުޅޭ މީހުންނަކީ ހަގީގީ ރައްޓެހިން."
މައު (18އ.): "އެކަކު އަނެކަކަށް އެހީތެރިކަމަށް ބޭނުން ވެއްޖެ ހިނދު، އެކަމުން ތިމާއަށް އެއްވެސް ފައިދާއެއް ނުކުރި ކަމުގައި ވިޔަސް އެހީތެރިވެދޭ މީހުން. އެއީ ހަމައެކަނި ތިމާގެ ރައްޓެހި މީހާއަށްޓަކައި ހިތްވަރު ދިނުމަށްޓަކައި ކޮށްދޭ ކަމެއްގެ ގޮތުގައި އެހީތެރިވެ އެރައްޓެހި މީހާއަށްޓަކައި ހުރެދޭ މީހުން ހަގީގީ ރައްޓެހިންނަކީ"
ޝުޢާއު (20އ.): "ތިމާއަށް ޓަކައި އަބަދުވެސް ކޮންމެ ކަމެއްގައި ވެސް ތިބޭ މީހުން. އަދި ކަމެއް ޖެހިއްޖެ ހާލަތެއްގައި، ފަސް ޖެހުމެއް ނެތި ތިމާއަށް އެހީތެރިވެދޭން ތިބޭ މީހުން. އެބައެއް ކައިރީގައި އެހީތެރިކަމަށް ނޭދެނީސް ވެސް އެހީތެރިވެދޭ މީހުން. އަދި ތިމާއަށް އިޙްތިރާމްކޮށް، ތިމާއަށް ޖޯކު ނުޖަހާ މީހުން. ތިމާއަށް ހިތްވަރުދީ، ފަސްފަހަތުގައި ތިމާއަށް ގެއްލުމެއް ނުދީ ތިމާއަށް ކަންތައްތައް ކުރެވޭނެކަން ޤަބޫލު ކުރާ މީހުން"
ފަރްޝަދް (25އ.): "ތިމާ މީހާގެ ލޯބިވެރިޔާ ބުނެގެން ވިޔަސް، ރައްޓެހިން ދޫކޮށް ނުލާ މީހުން. މީގެއިތުރުން ކޮންމެ ޙާލަތެއްގައި ވެސް ތިމާއާއެކުވާ މީހުން، މާލީ ގޮތުން ނޫން ކަމުގައި ވިޔަސް ކަންކަމުގައި ތިމާއަށް އެހީތެރިވެދީ، އަދި އެމީހުން ތިމާއަށްޓަކައި ވާކަމާއި ތިމާ ދައްކާ ވާހަކަ ވެސް ކަނުލާ އަޑު އަހާނެ ކަމުގެ ރަނގަޅު އިޙުސާސް ދޭ މީހުން"
މިއީ ހަގީގީ ރައްޓެހިންނަކީ ކޮބައި ކަމާމެދު ބައެއް މީހުން ދެކޭ ގޮތެވެ. އަޅުގަނޑުގެ ނަޒަރުގައި ހަގީގީ ރައްޓެހިންނަކީ ތިމާއަށް ސީދާ ވެގެންވާ ތެދުމަގު ދައްކައިދީ، ދީނީ ކަންކަމުގައި ވެސް ތިމާ ހޭލުންތެރި ކުރުވާ މީހުންނެވެ. ތިމާގެ ރަޙުމަތްތެރިޔާ ނުބައި މަގަކުން ދާނަމަ، އޭނާ ހުއްޓުވާ، ރަނގަޅު މަގަށް އެޅުވޭތޯ މަސައްކަތް ކުރާ މީހުންނެވެ. ތިމާގެ ރަޙުމަތްތެރިޔާއަށް ނުބައި ކަމެއް ކުރެވޭނަމަ، އެއީ ރަނގަޅު ކަމެއް ނޫން ކަމަށް އޭނާއާ ދިމާލަށް ބުނާ މީހުންނެވެ. އެމީހަކީ ތިމާގެ އެންމެ ގާތް އެކުވެރިޔާއޭ އެހެންކަމުން އޭނާ ކުރާ ހުރިހާ ކަމެއްގައި އޭނާއާއި އެއްބައިވާން ވާނެ ކަމަށް ދުށުމަކީ، އަޅުގަނޑު ދެކޭ ގޮތުގައި ވަރަށް ބޮޑު ގޯހެކެވެ. ރަޙުމަތްތެރިޔާއަށް ހެވެއް ވާން އެދޭނަމަ، އޭނާއަށް ހެޔޮކަން ލިބޭނެ ގޮތް ދައްކައި އެކަން އަންގައިދިނުން މުހިންމެވެ.
