ސަލްޓަން ޕާކް އަލުން ހުޅުވައިފި
ކޮވިޑާ ގުޅިގެން ބަންދު ކޮށްފައި ހުރުމަށް ފަހު މާލޭގެ ސަލްޓަން ޕާކް އަނެއްކާ ވެސް ހުޅުވައިފި އެވެ.
ކޮވިޑް-19 ބަލިމަޑުކަމާ ގުޅިގެން ބަލި ފެތުރުން ހުއްޓުވުމަށް ރައްކާތެރި ކަމުގެ ފިޔަވަޅެއްގެ ގޮތުން ސަލްޓަން ޕާކު މާރޗު މަހު ބަންދު ކުރުމަށް ފަހު އާންމުންނަށް މި ހުޅުވީ ނުވަ މަހަށް ފަހުއެވެ.
ކޮވިޑް-19 އާ ގުޅިގެން ސަލްޓަން ޕާކު ހިމެނޭ ގޮތަށް މާލޭގެ ގިނަ ޕާކުތަކާއި މައިޒާންތައް އޮތީ ބަންދުކޮށްފައެވެ. އެހެން ނަމަވެސް މިހާރު މާލޭގައި ކޮވިޑް ބަލި ޖެހޭ މީހުން މަދުވާން ފެށުމާއި ގުޅިގެން،އަލުން ޕާކުތަކާއި މައިޒާންތައް ހުޅުވުމަށް ވަނީ ހުއްދަ ދީފައެވެ.
ޕާކުތައް ހުޅުވި ނަމަވެސް ކޮވިޑާ ގުޅިގެން އަޅަންޖެހޭ ރައްކާތެރިކަމުގެ ފިޔަވަޅުތައް އެޅުމަށާއި ގައިދުރުކަން ބެހެއްޓުމަށް މާލޭސިޓީ މޭޔަރު ޝިފާ މުހައްމަދު ވަނީ އިލްތިމާސް ކޮށްފައެވެ. .
ޝިފާ ވަނީ ޕާކުގައި އުޅޭއިރު މާސްކް އެޅުމަށާއި ގައިދުރުކަމަށް ސަމާލުކަން ދިނުމަށް ނަސޭހަތްތެރިވެފައެވެ. ސަލްޓަން ޕާކް ހުޅުވާފައި ބެެހެއްޓުމަށް ހަމަޖެހިފައި ވާ ވަގުތު ތަކަކީ ފަތިހު 04:30 އިން ފެށިގެން ހެނދުނު 09:00 އަށް އަދި ހަވީރު 04:30 އިން ރޭގަނޑު 09:30 އާ ހަމައަށެވެ.
