ކޮންމެ ދުވަހަކު ވެސް ކީރިތި ޤުރްއާން ކިޔަވާ، އެހެން މީހުންނަށް ކިޔެވުން ހިއްސާކުރާ ޤާރީއެއް!
ފާތިޙް ސެފެރެޖިކްއަކީ ޖަރުމަނަށް އުފަންވި ބޮޒްނިއާގެ ރައްޔިތެކެވެ. އޭނާ އެންމެ ބޮޑަށް މަޝްހޫރުވެފައި ވަނީ ނުހަނު ރީތިކޮށް ކީރިތި ޤުރްއާން ކިޔަވާ ޤާރީ އެއްގެ ގޮތުގައެވެ.
އުމުރުން އެންމެ ހަތަރު އަހަރުގައި، މައިންބަފައިންނާއެކު އެމެރިކާއަަށް ، ޤާރީ ފާތިޙް ދިރިއުޅުން ބަދަލު ކުރިއެވެ. އަދި އުމުރުން 13 އަހަރުގައި ކީރިތި ޤުރްއާން ހިތުދަސް ކުރިއެވެ. ޤާރީ ފާތިޙް އަށް ކީރިތި ޤުރްއާން ހިތުދަސް ވެފައި ވޭތޯ ބަލައި ދެއްވީ އައްޝެއިޚް ޤާރީ ޒާހިދު އާއި ޤާރީ އާބިދު އެވެ. އެބޭފުޅުން އެއިމްތިހާން ނެންގެވީ ބާލްޓިމޯރްގެ އިސްލާމީ މަރުކަޒުގައެވެ.
މިހާރު ވެސް ޤާރީ ފާތިހް ދިރިއުޅެމުން ދަނީ އެމެރިކާ ގައެވެ. އުމުރުން 25 އަހަރެވެ. އޭނާ ކީރިތި ޤުރްއާން ކިޔަވާ އަޑު އިވުމުން، ގިނަ ބަޔަކު ތިބެނީ އާޝޯޚުވެފައެވެ. ހިތުގެ އެންމެ ފުންމިނަށް އޭނާގެ ކިޔެވުމުގެ އަޑު ވަދެގެންދާ ކަމަަށް މުސްލިމުންނާއި ޣައިރު މުސްލިމުން ވެސް އެއްބަސްވެއެވެ.
އެހެންކަމުން ކޮންމެ ދުވަހަކު ވެސް ކީރިތި ޤުރްއާން ކިޔަވާ މަންޒަރު ރިކޯޑުކޮށް، ޤާރީ ފާތިޙް އޭނާގެ ހުރިހާ މީސް މީޑިއާ އެކައުންޓެއްގައި އެވީޑިއޯތައް ހިއްސާ ކުރެއެވެ.
ޤާރީ ފާތިޙް ބުނިގޮތުގައި އޭނާ ބޭނުންވަނީ މާތް ﷲ ގެ ބަސްފުޅު މުޅި ދުނިޔޭގެ އެންމެންނަށް ވެސް ކޮންމެ ދުވަހަކުވެސް އިއްވުމެވެ.
ޤާރީ ފާތިޙްއަކީ މުޅި ދުނިޔެއިން ވެސް މީސް މީޑިއާގައި މިފަދަ ބޮޑު މަޤުބޫލު ކަމެއް ލިބިފައިވާ އެންމެ އުމުރުން ހަގު ޤާރީއެވެ. އޭނާ އުފަންވީ 1995 ވަނަ އަހަރުގެ މާރޗް މަހުގެ 1 ވަަނަ ދުވަހުގައެވެ.
