ލޮލަށް ބުޅި ހެރޭތީ ޑރ.ފައިސަލް ގެ އިލްތިމާސް: މިކަމަށް ހައްލެއް ލިބޭތޯ އައިނު އަޅަމާ
ފަހަކަށް އައިސް މަސްވެރިކަމަށް ނިކުމެ އުޅޭ މަސްވެރިންގެ ލޮލަށް ބުޅި ހެރޭ މައްސަލަ މިވަނީ އިތުރުވެފައެވެ. މިއަދު ވެސް މިފަދަ ހާދިސާއެއް ކުރިމަތިވެ، ސިފައިން ވަނީ އެހީތެރިވެދީފައެވެ.
ލޮލަށް ބުޅި ހެރޭ ހާދިސާތައް ގިނަ ވުމާއެކު މި މައްސަލައަށް އޮތް ހައްލަކީ ކޮބައިތޯ ގިނަ ބަޔަކު އަންނަނީ ސުވާލު އުފައްދަމުންނެވެ. ލޮލަށް ބުޅި ހެރޭ ހާދިސާތައް ކުރިމަތި ވަނީ އޭގައި މަސްވެރިންގެ އިހުމާލު އޮވެގެންތޯ ސުވާލު ކުރާ މީހުންގެ އަދަދު ވެސް މަދެއް ނޫނެވެ.
މަސްވެރިންގެ ލޮލަށް ބުޅި ހެރޭ މައްސަލައަށް ކުޑަކުދިންގެ ހާއްސަ ޑޮކްޓަރު އަހުމަދު ފައިސަލް ވެސް މިވަނީ ޚިޔާލެއް ހުށަހަޅުއްވާފައެވެ. އެގޮތުން ޑރ. ފައިސަލް މިއަދު ކުރެއްވި ޓްވީޓެއްގައި ވަނީ މަސްވެރިން އައިނު އަޅައިގެން މަހަށް ދިއުމަށް އިލްތިމާސްކޮށްފައެވެ.
"އަޅެ ހިނގާބަލަ އައިނު އަޅައިގެން މިކަމަށް ހައްލެއް އާދޭތޯބަލަން" މިއަދު މަސްވެރިއެއްގެ ލޮލަށް ބުޅިއެއް ހެރިގެން އަނިޔާވި ހަބަރެއް ރީޓްވީޓުކޮށް ޑރ.ފައިސަލް ވިދާޅުވިއެވެ.
ޑރ. ފައިސަލްގެ ޓްވީޓުގައި ވަނީ "މަހަށް ދާނީ އައިނު އަޅައިގެން" ނަމުގައި ހޭޝްޓެގެއް ވެސް ބޭނުން ކުރައްވާފައެވެ.
މިއަދު ހިނގި ހާދިސާ އާއެކު މި ހަފްތާގެ ތެރޭގައި ލޮލަށް ބުޅި ހެރިގެން ހިނގި ހާދިސާތަކުގެ އަދަދު ވަނީ ތިނަކަށް އަރާފައެވެ.
މަސްވެރިންގެ ލޮލަށް ބުޅިހެރުމަކީ މިހާރަކަށް އައިސް އާންމުކޮށް ދިމާވާ ނުރައްކާތެރި ހާދިސާއެކެވެ. މިކަމަކީ ލޮލުގެ ފެނުން ގެއްލިދާފަދަ ނުރައްކާތެރި ކަމެކެވެ. މިކަމުން ސަލާމަތްވުމަށް ދޮށިއަޅާއިރު އައިނާއި، ހެލްމެޓް އެޅުމަކީ މިކަމުން ރައްކާތެރިކޮށްދޭނެ ކަމެކެވެ.
