ދީނަށް ފުރައްސާރަކުރި އާނިމްގެ މައްސަލަ ފުލުހަށް ހުށަހަޅައިފި
އިސްލާމްދީނަށް ކުޑަމީސްކޮށް، މާތް ނަބިއްޔާ (ޞޢޥ) އަށް ފުރައްސާރަކުރި ޢަލީ އާނިމް މުފީދު ގެ މައްސަލަ ފުލުހަށް ހުށަހަޅައިފިއެވެ.
"ރައްޔިތުންގެ އިއްތިހާދު" ގެ ރައީސް އިބްރާހިމް މުޙައްމަދު މިއަދު ކޮމިޝަނަރ އޮފް ޕޮލިސް މުޙައްމަދު ޙަމީދަށް އެޑްރެސް ކުރައްވާ ފޮނުއްވި ސިޓީ އެއްގައި ވިދާޅުވެފައި ވަނީ ނިމި ދިޔަ ނޮވެމްބަރ މަހުގެ ފަހު ހަފުތާއިން ފެށިގެން ދިވެހި މީސްމީޑިޔާއާއި އަދި ބައެއް ނޫސްތަކުން، ޢަލީ އާނިމް މުފީދުގެ ނަމުގައި މީސްމީޑިޔާގެ އެކި ޕުލެޓްފޯމްތަކުގައި އިސްލާމްދީނަށް ކުޑައިމީސްކޮށް، ފުރައްސާރައާއި މަލާމާތް ރައްދުކޮށް އަދި އަޅުގަނޑުމެންގެ މާތް ނަބިއްޔާ (ޞޢޥ) އަށް ހަޖޫ ޖަހާފައި ހުރި ބައެއް ޕޯސްޓުތައް ފަތުރާފައިވާކަން ފާހަގަވާ ކަމަށެވެ.
އާނިމްގެ މީސްމީޑިއާ ޕްރޮފައިލް ތަކުންނާއި ދައްކާފައިވާ ވާހަކަތަކުން އެއީ އައްޑޫގައި އުޅޭ މީހެއްކަން ހާމަވާ ކަމަށް ވެސް އިއްތިހާދުގެ ރައީސް ވިދާޅުވެފައިވެއެވެ.
އާނިމްގެ ޢާއިލާއަށް ނުރައްކާ އޮތްކަން އެންގުމަށްޓަކައި އައްޑޫގައި ހުންނަ ފުލުހުންގެ މަރުކަޒުން ޒިޔާރަތްކޮށް މަޢުލޫމާތު ދީފައިވާ ކަމަށާއި ފުލުހަށް ހާޒިރުވުމަށް ވެސް އަންގާފައިވާ ކަމަށް އޭނަގެ ޓުވިޓާގައި 29 ނޮވެމްބަރު 2020 ގައި ބުނެފައިވާކަން ވެސް ވަނީ ފާހަަގަ ކޮށްފައެވެ.
"މި މައްސަލައަކީ މިދިވެހި ފަސްގަނޑުގައި އަޅައި ނުލައި ދޫކޮށްލެވިގެން ވާނެ މައްސަލައެއް ނޫންކަމުން، އެމީހާ މިހާރުން މިހާރަށް ހައްޔަރުކޮށް، ހައްޔަރުގައި ބަހައްޓައިގެން މައްސަލަ ވީހާވެސް އަވަހަކަށް ތަޙްޤީޤު ކޮށްދެއްވައި، ޝަރުޢީ ގޮތުން އެފަދަ ކަންކަމަށް މާތް ﷲ ބާވައިލައްވާފައިވާ ޙުކުމްފުޅު ތަންޒީޛު ކުރުމަށްޓަކައި ޤާނޫނީ ގޮތުން އަޅަންޖެހޭ ފިޔަވަޅުތައް އަޅުއްވައި ދެއްވުމަށް ރައްޔިތުންގެ އިއްތިހާދުގެ ފަރާތުން އެދި ހުށައަޅަމެވެ." އިބްރާހިމް މުޙައްމަދު އެދިލައްވާފައިވެއެވެ.
މިފަދަ ކަންކަން މި ތަރުކާރު ވެގެން ދަނީ ދީނީ ގޮތުންނާއި ޤާނޫނީ ގޮތުން މިފަދަ ފަރާތްތަކާ މެދު އަޅަންޖެހޭ ފިޔަވަޅުތައް އެޅުމުގައި މާ ބޮޑަށްވެސް ލަސްވެ ކަންކަން ދިގުލައިގެން ދާތީ ކަމަށާއި އަދި އެކަމުގެ ޒިންމާ އެޅިފައިވާ ފަރާތްތަކުން ވަމުންދާ އިހުމާލު ނުވަތަ ބަރުހެލިކަން އެއީ ފަހުން ޖަވާބުދާރީވެ ހިސާބު ބެއްލެވޭނެ ކަންކަން ކަމުގައި ވެސް އެސިޓީގައި ހަނދުމަކޮށް ދީފައިވެއެވެ.
Ads by STO
