އުކުޅަހުން ފަތުރުވެރިއަކު ކޮވިޑް-19 އަށް ޕޮޒިޓިވް ވެއްޖެ
އއ. އުކުޅަހުން ، ފަތުރުވެރިއަކު އަނެއްކާ ވެސް ކޮވިޑް-19 އަށް ޕޮޒިޓިވް ވެއްޖެއެވެ.
އޮންލައިން ނޫހެއް ކަމަށްވާ "ސީއެންއެމް" އަށް މައުލޫމާތު ދެމުން އުކުޅަހު ކައުންސިލްގެ ރައީސް ޝައުކަތް އިބްރާހިމް ވިދާޅުވީ، އުކުޅަހުގެ "ނަލަވެލި ވިލާ ގެސްޓް ހައުސް"ގައި ޗުއްޓީ ހޭދަކުރަމުންދިޔަ ފަތުރުވެރިއަކު ކޮވިޑަށް މިއަދު ޕޮޒިޓިވް ވެފައިވާ ކަމަށާއި، މިހާރު އޭނާ ކަރަންޓީނު ކުރުމުގެ މަސައްކަތް ކުރަމުންދާ ކަމަށެވެ.
ފަތުރުވެރިއަކު ކޮވިޑް-19 އަށް ޕޮޒިޓިވް ވިކަން އުކުޅަހު ސިއްހީ މަރުކަޒުން ވެސް ވަނީ ކަށަވަރު ކޮށްދީފައެވެ. މީގެކުރިން ދެފަހަރު އެރަށުން ވަނީ ކޮވިޑް-19 އަށް ފަތުރުވެރިން ޕޮޒިޓިވް ވެފައެވެ. ކުރިން ޕޮޒިޓިވްވީ ވެސް ނަލަވެލި ވިލާ ގެސްޓުހައުސްގައި ޗުއްޓީ ހޭދަކުރަމުންދިޔަ ދެ ފަތުރުވެރިންނެވެ.
އުކުޅަހު ސިއްހީ މަރުކަޒުން ނެރުނު ބަޔާނެއްގައި ބުނެފައިވަނީ ނަލަވެލި ވިލާ ގެސްޓް ހައުސްއިން ފަތުރުވެރިއަކު ޕޮޒިޓިވް ވެފައިވާ ކަމަށާއި، މި ފަތުރުވެރިޔާ ކަރަންޓީނު ކުރުމާއި، ފަތުރުވެރިޔާއާ ޑައިރެކްޓް ކޮންޓެކްޓް ވެފައިވާ ފަރާތްތައް ދެނެގަނެ އެފަރާތްތައް އެކަހެރި ކުރުމުގެ މަސައްކަތް ކައުންސިލް އަދި ކޮވިޑް ޓާސްކްފޯސް ކޮމިޓީ ގުޅިގެން ކުރިއަށްދާ ކަމަށެވެ.
ޓޫރިޒަމް މިނިސްޓްރީގެ އެންމެ ފަހުގެ ހިސާބުތަކަށް ބަލާއިރު، 136 ރިސޯޓެއް ހުޅުވާ، ވަނީ ހިންގަން ފަށާފައެވެ. ޔޮޓް މެރީނާ ރިސޯޓުގެ ގޮތުގައި 2 ރަށެއް ހިންގަމުން ދާއިރު 5 ރަށެއްގައި ވަނީ ޓޫރިސްޓް ހޮޓާ ހުޅުވާފައެވެ.
