އައްޑޫ ފްލައިންގް ސްކޫލްގެ ދަރިވަރުންނަށް ދިމާވާ ގޮންޖެހުންތައް ނައިބު ރައީސް އޮޅުންފިލުވައިފި
އައްޑޫގައި ޤާއިމުކޮށްފައިވާ ފްލައިންގ ސްކޫލްގައި ކިޔަވަމުންދާ ދަރިވަރުންނާ ނައިބު ރައީސް ފައިސަލް ނަސީމު ބައްދަލުކުރައްވައި އެކުދިންނަށް ދިމާވާ ދަތިތަކާއި ގޮންޖެހުންތައް އޮޅުން ފިލުއްވައިފިއެވެ.
އައްޑޫސިޓީ އާއި ފުވައްމުލަކު ސިޓީ އަށް މިއަދު ނައިބު ރައީސް ކުރެއްވި ދަތުރުފުޅުގައި އައްޑޫއަށް ވަޑައިގެން ގަން އިންޓަރނޭޝަނަލް އެއަރޕޯޓުގައި އެ ދަރިވަރުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާގެ ނައިބު ވިދާޅުވީ، އެ ދަރިވަރުންނަށް ކުރިމަތިވެފައިވާ މައްސަލަތައް ސަރުކާރުން ވަރަށް ގާތުން ބައްލަވަމުން ގެންދަވާ ކަމުގައެވެ. އަދި، އެ މަނިކުފާނު ވަނީ ސަރުކާރުގެ ފަރާތުން ފްލައިން ސްކޫލްގެ ދަރިވަރުންނަށް އެހީތެރިވެދެވޭނެ ގޮތްތަކެއް ބައްލަވައިދެއްވުމަށް ފިނޭންސް މިނިސްޓަރުގެ އަރިހުން އެދިވަޑައިގަންނަވާފައެވެ. މީގެ ތެރޭގައި އެ ދަރިވަރުންނަށް އެމެރިކާ ޑޮލަރުގެ ބަދަލުގައި ދިވެހި ރުފިޔާއިން ފީ ދެއްކޭނެ އިންތިޒާމުތައް ހަމަޖެއްސުމުގައި ސަރުކާރަށް ވެދެވެން އޮތް އެހީތެރިކަމަކީ ކޮބައިކަމާމެދު ވެސް ނައިބު ރައީސް ވާހަކަ ދެއްކެވިއެވެ.
