ދަގަނޑޭގެ ހިތްގައިމު ގޯލަކާއެކު ވެލެންސިއާއަށް މޮޅެއް
ދިރާގު ދިވެހި ޕްރިމިއަރ ލީގުގައި މިރޭ ކްލަބް ވެލެންސިއާ އާއި ގްރީން ސްޓްރީޓްސް ބައްދަލު ކުރި މެޗު ވެލެންސިއާ އިން ކާމިޔާބު ކޮށްފިއެވެ.
މި މެޗުގައި ފެނިގެން ދިޔަ ހަމައެކަނި ގޯލު މެޗުގެ 27 ވަނަ މިނެޓުގައި ކާމިޔާބު ކޮށްދިނީ އަލީ އަޝްފާގު ، ދަގަނޑޭއެވެ. މިރޭގެ މެޗަކީ 15 އަހަރަށްފަހު ވެލެންސިއާގެ ޖާރޒީގައި ދަގަނޑޭ ދަނޑުމަތިން ފެނުނު ފުރަތަމަ މެޗެވެ.
ދަގަނޑޭ މިރޭ ކާމިޔާބު ކުރި ގޯލަކީ ހިތްގައިމު ގޯލެކެވެ. ގްރީން ސްޓްރީޓްސްގެ އޭރިއާ ތެރެއިން މަތީ ދުރު ކަނަށް ފޮނުވާލި ބާރު ހަމަލާއެކެވެ.
މެޗުގެ ފުރަތަމަ ހާފުގައި ފެނިގެން ދިޔައީ ވާދަވެރި ކުޅުމެކެވެ. ގްރީން ސްޓްރީޓްސްއަށް ވެސް ލަނޑު ޖަހާނެ ފުރުސަތު ތަކެއް ލިބުނު ނަމަވެސް ގިނަ ހަމަލާތަކެއް މެޗުގައި އުފައްދާފައި ވަނީ ވެލެންސިއާ އިންނެވެ. އެހެން ނަމަވެސް ގިނަ ހަމަލާތަކެއް ގްރީން ސްޓްރީޓްސްގެ ކީޕަރު ލަބާން ވަނީ ދިފާއު ކޮށްފައެވެ.
މި ސީޒަނަށް އެންމެ ބޮޑަށް ތައްޔާރުވެފައި އޮތް އެއް ޓީމަކީ ކްލަބް ވެލެންސިއާ އެވެ. ވެލެންސިއާގައި ރާއްޖޭގެ މޮޅެތި އެތައް ކުޅުންތެރިންނެއް މި ސީޒަންގައި ހިމެނެއެވެ. އޭގެ ތެރޭގައި ފާސިރު، އަކްރަމް އަދި ހުސެން ނިޔާޒް (ބޮކުރީ) ވެސް ހިމެނެއެވެ.
ގްރީން ސްޓްރީޓްސްގެ ޓީމަކީ ވެސް ދަށް ޓީމެއް ނޫނެވެ. ކުލަބުގެ ކެޕްޓަން އަކީ ތަޖުރިބާ ކާރު ކުޅުންތެރިޔާ ރިލުވާން (ރިލޭ) އެވެ.
މިރޭގެ މެޗުގައި ދަގަނޑޭގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު މެޗުގެ މޮޅު ކުޅުންތެރިޔާގެ މަގާމު ހާސިލު ކުރީ ވެސް އޭނާއެވެ.
