އެމްޑީޕީއަށް ކައުންސިލް އިންތިހާބު ދީފިނަމަ ގައުމު ފެއިލް ވާނެ: ގައްސާން
އެމްޑީޕީއަށް ކައުންސިލް އިންތިހާބު ދީފި ނަމަ ގައުމު ފެއިލްވާނެ ކަމަށާއި ހިތް ދަމައިގަންނަ ގޮތަށް ކެމްޕެއިން ކުރަން އެނގޭ ކޮންމެ މީހަކީ ގާބިލް މީހެއް ނޫން ކަމަށް ޕީޕީއެމްގެ ނައިބު ރައީސް އަދި ތ.ގުރައިދޫ ދާއިރާގެ މެންބަރު ގައްސާން މައުމޫން މިރޭ ވިދާޅުވެއްޖެއެވެ.
ގައްސާން ވިދާޅުވީ މިއަދު ޑޮލަރުގެ އަގު މަތިވެ، ގައުމުގެ އިގްތިސާދު ހީނަރު ވުމާއި ރައްޔިތުންނަށް އާމްދަނީ ލިބޭނެ ގޮތްތައް ބަންދުވެފައި މިވަނީ ކީއްވެތޯ ރައްޔިތުން ވިސްނާލަން ޖެހޭ ކަމަށެވެ. އަދި މިހާރު ކޮވިޑް-19 ފެތުރިފައި ވިޔަސް 2008ވަނަ އަހަރު އެމްޑީޕީގެ ވެރިކަމުގައި ވެސް ކަންތައްތައް ވެގެން ދިޔައީ ހަމަ މިގޮތަށް ކަމުގައި ގައްސާން ވިދާޅުވިއެވެ.
މި މޭރުމުން ގައްސާން ވާހަކަފުޅު ދެއްކެވީ މިރޭ ކާނިވާ ސަރަހައްދުގައި ބޭއްވި އިދިކޮޅުގެ “ވިސްނާ” ޖަލްސާގައެވެ.
ގައްސާން އިތުރަށް ވިދާޅުވީ ކުރީގެ ރައީސް އަބްދުﷲ ޔާމީން 2013 ގައި އެކުލަވައިލި މެނިފެސްޓޯގައި ހުރި ބޮޑެތި މަޝްރޫއުތައް މިއަދު ފެންނަން އެބަހުރި ކަމަށާއި އެ ކަންކަމުގެ ފައިދާ ރައްޔިތުންނަށް ލިބެމުން އަންނަ ކަމަށެވެ. ނަމަވެސް މި ސަރުކާރުން 2018 ގައި ވައުދުވި ގޮތަށް އެއްވެސް ކަމެއް ނުހިނގާ ކަމަށާއި ގިނަ މަޝްރޫއުތައް ފެށުން ލަސްވުމުގެ އިތުރުން އަޅާފައި ހުރި ފްލެޓުތަކަށް ވެސް މީހުން ނުވެއްދިގެން އުޅޭ ކަމަށް ވެސް ގައްސާން ވިދާޅުވިއެވެ.
ޕީޕީއެމް ކޯލިޝަނުން ބޭއްވި “ވިސްނާ” ޖަލްސާގައި އެ ގުޅުމުގެ ލީޑަރޝިޕްގެ ގިނަ ބޭފުޅުން ވަނީ ގައުމުގައި ހުރި މައްސަލަތަކަށް އަލިއަޅުވާލައްވާ ވާހަކަފުޅު ދައްކަވާފައެވެ.
