ކޮވިޑްގެ ދަތި ދުވަސްވަރުގައި ވެސް މޯލްޑިވް ގޭހަށް ރިކޯޑް ފައިދާއެއް!
2020ވަނަ އަހަރު މުޅި ދުނިޔެ އެފުށްމިފުށަށް ޖެހީ އިންސާނާގެ ލޮލަށް ވެސް ނުފެންނަ ކުޑަކުޑަ ވައިރަހެކެވެ. ކޮވިޑް-19ގެ ބަލިމަޑުކަމެވެ. ކޮވިޑް-19ގެ ސަބަބުން ގައުމުތަކުގެ އިގްތިސާދު ވެސް ސުންނާފަތިވީ އެވެ. ވޭތުވެގެން ދިޔަ ނުވަ ވަރަކަށް މަހަކީ ކުރިން އެއްވެސް ބަޔަކު ލަފާކޮށްފައި ނުވާނެ ފަދަ ބޮޑު ބަލިމަޑުކަމެއްގެ އަނދިރި ދުވަސްތަކެކެވެ.
ކޮވިޑް-19އާ ގުޅިގެން މުޅި ދުނިޔެއަށް ކުރިމަތިވި މި ބޮޑު އިޤްތިޞާދީ ކާރިސާގައި، ފަތުރުވެރިކަމުގެ ސިނާއަތަށް އިންތިހާއަށް ބަރޯސާވެފައިވާ، މި ކުޑަކުޑަ ދިވެހިރާއްޖެ އާއި ރާއްޖޭގެ ކުންފުނި ތަކަށް ބިލިއަނުން ގެއްލުންވެގެން ދިޔައެވެ. އެތައް ރިސޯޓް ތަކަކާއި ވިޔަފާރިއެއް ބަންދުކުރަން ޖެހި އެތައް ހާސް މުވައްޒަފުންގެ ވަޒީފާއަށް އަސަރު ކުރިއެވެ.
މި ނާޒުކު އަދި ހުތޫއަތްތެރި ވަގުތުގައި ވެސް މޯލްޑިވް ގޭސްއިން ވަނީ އެތަނުގެ މެނޭޖްމަންޓާއި އެންމެހާ ސްޓާފުންގެ ހިކުމަތްތެރި ރޭވުންތެރިކަމާއި މިންނަތް މަސައްކަތުން މި ނިމިދާ 2020 ވަނަ އަހަރަކީ މޯލްޑިވް ގޭސްގެ ހަޔާތުގައި ވެސް ވިޔަފާރީގެ ގޮތުން އެންމެ ކާމިޔާބު އެއް އަހަރަށް ހަދާފައެވެ.
މޯލްޑިވް ގޭހުގެ އެކްޓިންގ މެނޭޖިންގ ޑިރެކްޓަރ އަލްފާޟިލް އަލީ އިކްރާމް ވިދާޅުވީ، ރިސޯޓް ސެކްޓަރގެ އިތުރުން ކެފޭ ރެސްޓޯރެންޓު އެކްޓަރގެ ވިކުރާ ދަށްވެ ކުންފުނީގެ ޖުމުލަ ސޭލްސް އިން 40 މިލިއަން ވަރުގެ ދަށްވުމެއް އައިކަމުގައި ވިޔަސް، ގޭސް ޝިޕްމަންޓްތަކުގެ ފުރެއިޓް އަދި ޕްރިމިއަމް އަށް ގެނެވުނު ފަރަގުން ކުންފުނިން ގޭސް ގަތުމުގެ އަގު ބޮޑުތަނުން ހެޔޮ ކުރެވުނު ކަމަށެވެ. އަދި ޕެންޑަމިކާ ގުޅިގެން އެޅުނު ޚަރަދުކުޑަ ކުރުމުގެ ފިޔަވަޅުތަކެއްގެ ސަބަބުން ކުންފުނި ހިންގުމުގެ ޚަރަދުން އެތައް މިލިއަން ރުފިޔާއެއް ސަލާމަތްކުރެވި އޮޕަރޭޓިންގ ޕްރޮފިޓް ނުވަތަ ހިންގުމުގެ ފައިދާ ބޮޑުތަނުން އިތުރު ކުރެވުނު ކަމަށެވެ.
މޯލްޑިވް ގޭސްގެ އެކްޓިންގ މެނޭޖިންގް ޑިރެކްޓަރ އިކްރާމް
އިކްރާމް ލަފާކުރައްވާ ގޮތުގައި މޯލްޑިވް ގޭހުގެ މިސްރާބު މިހާރު ހުރިގޮތުން މިއަހަރު ނިމޭއިރު ކުންފުނީގެ ފައިދާ 50 މިލިއަން ރުފިޔާއަށްވުރެ އިތުރު ވާނެއެވެ. މި އަދަދަކީ މޯލްޑިވް ގޭހުގެ ތާރީހުގައި އަދި ދުވަހަކު ވެސް ފައިދާ ނުވާ ވަރުގެ މިންވަރެކެވެ. މިއީ މޯލްޑިވް ގޭހުގެ ހަޔާތުގައި އައު ރިކޯޑެކެވެ.
މޯލްޑިވް ގޭހުން ވަނީ ކޮވިޑްގެ އެންމެ ނުރައްކާތެރި ދުވަސްވަރުގައި ވެސް ކައްކާ ގޭހާއި މެޑިކަލް އޮކްސިޖަން މެދުކެނޑުމެން ނެތި މާރކެޓް ޑިމާންޑުގައި ފޯރު ކޮށްދީފައެވެ.
