ލޯންޗެއްގެ ބެޓަރީ ގޮވައި ހިނގި އަލިފާނުގެ ހާދިސާއެއްގައި މީހަކު ފިހިއްޖެ
ވ. ތިނަދޫ ފަޅުތެރޭގައި އޮތް ލޯންޗެއްގެ ބެޓަރީ ގޮވައި، ހިނގި އަލިފާނުގެ ހާދިސާއެއްގައި މީހަކު ފިހިއްޖެއެވެ.
ތިނަދޫ ކައުންސިލު ރައީސް ސާމިރު އަޙުމަދު "ދެން" އަށް މައުލޫމާތު ދެއްވަމުން ވިދާޅުވީ މިހާދިސާ ހިނގާފައި ވަނީ މިއަދު ހެނދުނު 7:45 ހާއިރު ކަމަށާއި، ލޯންޗުގެ ބެޓަރީ ގޮވައިގެން ފިހުނީ އެލޯންޗުގެ ކައްޕި ކަމަށެވެ.
"ކޮންމެ ދުވަހަކު ވެސް ހެނދުނު އޭނާ އަރާނެ އެލޯންޗަށް. އެގޮތަށް މިއަދު ވެސް އަރާފަ ލޯންޗު ސްޓާޓު ކުރިތަނުން ބެޓަރީ ގޮވީ. އޭނާއަށް އެކި ވަރުގެ އަނިޔާ ލިބިފައިވޭ. ފައި ވެސް ވަރަށް ބޮޑަށް ފިހިފަ، ބޮލަށް ވެސް ކޮންމެވެސް ވަރަކަށް ގެއްލުން ލިބިފަ ހުރި ކަމަށް މައުލޫމާތު ލިބެނީ" ސާމިރު ވިދާޅުވިއެވެ.
މިހާދިސާގައި ފިހިފައި ވަނީ ބ. ތުޅާދުއަށް ނިސްބަތްވާ ޒުވާން ފިރިހެނެއް ކަމަށާއި ނަމަވެސް އެމީހާއާ ބެހޭ އިތުރު މައުލޫމާތެއް އަދި ލިބިފައި ނުވާ ކަމަށް ވެސް ސާމިރު ވިދާޅުވިއެވެ.
ފިހުނު މީހާއަށް ފެލިދޫ ހޮސްޕިޓަލުގައި ފަރުވާ ދެމުންދާ ކަމަށާއި އިތުރު ފަރުވާއަށް އެމީހާ މާލެ ގެންނަން މަސައްކަތް ކުރަމުންދާ ކަމަށް ވެސް ސާމިރު ވިދާޅުވިއެވެ.
މީގެއިތުރުން ސާމިރު ވިދާޅުވީ ލޯންޗުގެ އަލިފާން ނިއްވާލުމަށްޓަކައި ފުލުހުން ފެން ޖަހައިގެން ކުރި މަސައްކަތް ނާކާމިޔާބުވި ކަމަށާއި އަލިފާންގަނޑު ނިވުނީ ލޯންޗް އަޑިއަށް ގޮސްގެން ކަމަށެވެ.
