ކޮވިޑް-19: ދެއްވަދޫން އިތުރު އަށް މީހަކު ފައްސި ވެއްޖެ
ގއ. ދެއްވަދޫން އިތުރު އަށް މީހަކު ކޮވިޑް-19 އަށް ފައްސި ވެއްޖެއެވެ.
މިއަދަދާއެކު އެރަށުން ކޮވިޑަށް ފައްސިވީ މީހުންގެ ޖުމްލަ އަދަދު މިވަނީ 24 އަށް އަރާފައެވެ.
ދެއްވަދޫ ގެ އާންމު ހާލަތު ރަނގަޅު ކަމަށް އެރަށުގެ ކައުންސިލު ރައީސް އިބްރާހިމް ތައުފީގު ވަނީ އޮންލައިން ނޫސް "ވަގުތު" އަށް މައުލޫމާތު ދެއްވަމުން ވިދާޅުވެފައެވެ. އަދި ރައްކާތެރިކަމުގެ ފިޔަވަޅުތަކަށް އެރަށުގެ ރައްޔިތުން ބޯލަނބާ ކަމަށް ވެސް ތައުފީގު ވިދާޅުވިއެވެ.
މީގެއިތުރުން އެރަށުގައި ރޭންޑަމް ސާމްޕަލް ނެގުމުގެ މަސައްކަތް ކުރިއަށްދާ ކަމަށާއި މިހާތަނަށް ގިނަ އަދަދެއްގެ ސާމްޕަލް ނަގާފައިވާ ކަމަށް ވެސް ތައުފީގު ވަނީ ފާހަގަ ކުރައްވާފައެވެ.
ދެއްވަދޫން ބަޔަކު ކޮވިޑް-19 އަށް ފައްސިވުމުން އެރަށުން ޑައިރެކްޓް ކޮންޓެކްޓުވި 149 މީހަކު ފާހަގަ ކުރެވިފައިވާ ކަމަށާއި އަދި ފޮނަދޫން 56 ފަރާތެއް ފާހަގަ ކުރެވިފައިވާ ކަމަށް އެޗްއޯސީ އިން މައުލޫމާތު ދެއެވެ.
ރާއްޖެއިން އިއްޔެ ކޮވިޑަށް 50 މީހުން ފައްސިވެފައިވާއިރު، އޭގެ ތެރެއިން 20 މީހުން ފައްސި ވެފައިވަނީ ރިސޯޓަކުން ކަމަށް އެޗްއީއޯސީން ރޭގައި ވަނީ މައުލޫމާތު ދެއްވާފައެވެ.
Ads by STO
