“މަރުވެފައިވާ” މީހަކު ދިރިހުރި ކަމަށް ކޯޓުގައި ވަކާލާތު ކޮށްފި
މިއީ ޕެރިހުގައި ހިނގައި ދިޔަ ވަރަށް އާދަޔާ ޚިލާފު ހާދިސާ އެކެވެ. ފަރަންސޭސިވިލާތަށް ނިސްބަތްވާ އުމުރުން 58 އަހަރުގެ "މަރުވެފައިވާ" އަންހެނެއް އޭނާ މަރު ނުވާކަން ސާބިތު ކޮށްދޭން ކޯޓުގައި ވަކާލާތު ކުރި ވާހަކައެވެ.
ޖީން ޕޮއުޗެއިން ނަމަކަށް ކިޔާ މި އަންހެން މީހާ 2017 ވަނަ އަހަރުގެ ނޮވެމްބަރ މަހުގައި މަރުވެފައިވާ ކަމަށް ވަނީ ނިންމާފައެވެ. މިކަން ހިނގައި ދިޔައީ ޕޮއުޗެއިން ގެ ކުންފުނީގައި ކުރިން މަސައްކަތް ކުރި މީހެއް ހިންގި ބޮޑު އޮޅުވާލުމެއްގެ ސަބަބުންނެވެ. ބަދަލު ހިފުމުގެ ރޫހެއްގައި އޭނާ ހިންގި މި ޖަރީމާ އިން ޕޮއުޗެއިން މަރުވެފައިވާ ކަމަށް ނިންމިއެވެ.އެހެންކަމުން ޕޮއުޗެއިން ގެ ހުރިހާ ލިޔެކިޔުންތަކެއް ވެސް ވަނީ މިކަމުގެ ތެރޭގައި ގެއްލިފައެވެ. އޭގެ ތެރޭގައި އޭނާގެ އައި ޑީ ކާޑާއި ލައިސަންސްގެ އިތުރުން ބޭންކް އެކައުންޓް ތަކާއި އިންޝުއަރެންސްތައް ވެސް ވަނީ ނައްތާލެވިފައެވެ.
މި މައްސަލައިގައި ޕޮއުޗެއިން ވަނީ އޭނާގެ ދަށުން މަސައްކަތް ކުރި މީހަކަށް ތުހުމަތު ކޮށްފައެވެ.
ޕޮއުޗެއިންގެ ވަކީލު ބުނެފައިވަ ނީ އޭނާ މަރުވެފައިވާ ކަމަށް ނިންމީ އެއްވެސް ހެއްކެއް ނެތި ކަމަށެވެ. އެހެންކަމުން އެއީ ވެގެން ވާނެ ގޮތެއް ނޫން ކަމަށާއި އެކަން ކުށްވެރި ކުރާ ކަމަށް ޕޮއުޗެއިން ވަނީ ބުނެފައެވެ.
ޕޮއުޗެއިން މަރުވެފައިވާ ކަމަށް ދައުވާ ކޮށް އެކަން ކުރި މަސައްކަތު މީހާ އަކީ 2000 ވަނަ އަހަރު ޕޮއުޗެއިންގެ ކޮމްޕެނީ އަކުން ވަޒީފާ އިން ކަނޑާލި މީހެކެވެ. 2004 ވަނަ އަހަރު މަސައްކަތު މީހާ ވަނީ އޭނާއަށް ލިބުނު ގެއްލުމަށް 14000 ޔޫރޯ ހޯދަން ދައުވާ ވެސް ކޮށްފައެވެ. ނަމަވެސް މި ދައުވާ ސާބިތު ނުވުމުން ޕޮއުޗެއިން އޭނާ އަށް ފައިސާ ނުދެއެވެ.
ނަމަވެސް 2009 އަކުން ފެށިގެން 2016 އާއި ހަމައަށް ދިގު ދެމިގެން ދިޔަ ވަޒީފާގެ ޓްރައިބިއުނަލް މައްސަލައެއްގައި ޕޮއުޗެއިން މަރުވެފައިވާ ކަމަށް ނިންމައި ޓްރައިބިއުނަލް މެދުވެރިކޮށް އޭނާގެ ފިރިމީހާ އާއި ދަރިފުޅުގެ އަތުން ވެސް މަސައްކަތު މީހާ ވަނީ ފައިސާ ހޯދާފައެވެ.
މި ހުރިހާ ކަމަކަށް ފަހު ވެސް ޕޮއުޗެއިން ދަނީ އޭނާ ދިރިހުރި ކަން ސާބިތު ކޮށްދޭން މަސައްކަތް ކުރަމުންނެވެ.
